मुंबई - बॉक्स ऑफिसवर साऊथ फिल्म इंडस्ट्री आणि बॉलिवूडच्या चित्रपटामध्ये स्पर्धा पाहायला मिळत आहे. यात साऊथच्या सिनेमांनी नेहमीच बाजी मारली आहे. सध्या साऊथचा सुपरस्टार अल्लू अर्जुन स्टारर चित्रपट पुष्पा 2 द रुलने बॉक्स ऑफिसवर दबदबा निर्माण केला आहे. दरम्यान, साऊथ फिल्म इंडस्ट्रीतून एक धक्कादायक बातमी समोर येत आहे. मॉलीवूड (मल्याळम) या दक्षिण चित्रपटसृष्टीला चालू वर्षात 700 कोटी रुपयांचे नुकसान झालं आहे.
केरळ फिल्म प्रोड्युसर असोसिएशनने एका निवेदनात म्हटलं आहे की 2024 मध्ये मॉलीवूडमधून 199 चित्रपट प्रदर्शित झाले आहेत आणि या चित्रपटांची किंमत 1000 कोटी रुपये आहे. यावर्षी रिलीज झालेल्या 199 चित्रपटांपैकी केवळ 26 मॉलीवूड चित्रपट हिट झाले आहेत, ज्यामुळे मॉलीवुडला 700 कोटी रुपयांचे मोठे नुकसान झालं आहे. चित्रपटांचं वाढतं बजेट आणि अभिनेत्यांची भरमसाठ फी हे यामागे कारण असल्याचं असोसिएशननं म्हटलं आहे. असोसिएशननं 2024 हे वर्ष मॉलीवूडसाठी सर्वात तोट्याचं वर्ष ठरल्याचं म्हटलं आहे. 1000 रुपये किमतीच्या चित्रपटांकडून केवळ 300 कोटी रुपयांचा परतावा मिळवला आहे.
सर्वाधिक कमाई करणारे मॉलीवूड चित्रपट
2024 मध्ये मॉलीवूडमधील केवळ 5 चित्रपटांनी 100 कोटींहून अधिक कमाई केली आहे. यामध्ये 'प्रेमालू', 'अवेशम', 'मंजुमेल बॉईज', 'एआरएम' तसेच पृथ्वीराज सुकुमारन यांच्या 'आदुजीवतम' यांचा समावेश आहे. 'मंजुमेल बॉईज' हा 2024 चा सर्वाधिक कमाई करणारा मॉलीवूड चित्रपट ठरला आहे. 'मंजुमेल बॉईज'नं बॉक्स ऑफिसवर 242 कोटींची कमाई केली आहे. 'गुरुवायर अंबालनदयील', 'वर्षांगलकू शेषम', 'कांडम' आणि 'किष्किंदा' हे ते चित्रपट आहेत ज्यांनी 2024 मध्ये 50 कोटी क्लबमध्ये प्रवेश केला आहे. सध्या मॉलीवूड चित्रपट 'मार्को' बॉक्स ऑफिसवर राज्य करत आहे, ज्याकडून मोठ्या अपेक्षा आहेत. चालू वर्षात मॉलीवूड सुपरस्टार मोहनलाल देखील बॉक्स ऑफिसवर अपयशी ठरला आहे. 2024 साली प्रदर्शित झालेला मोहनलालचा 'बरोज' हा चित्रपट फ्लॉप झाला आहे.
