मुंबई - Heeramandi First Look : दिग्दर्शक संजय लीला भन्साळी यांच्या 'हिरामंडी'वेब सीरीजची वाट प्रेक्षक बऱ्याच दिवसांपासून पाहत आहेत. भन्साळी हे त्यांच्या भव्य सेट आणि पोशाखांसह उत्कृष्ट कहाणी पडद्यावर आणण्यासाठी ओळखले जातात. आता ते प्रेक्षकांसाठी 'हिरामंडी' घेऊन येत आहेत. या वेब सीरीजमध्ये 'हिरामंडी' नावाचे एक ठिकाण दाखवण्यात येणार आहे, जिथे वेश्या राहतात. या वेश्या इथे एखाद्या राणीप्रमाणे राज्य करत असतात. 1 फेब्रुवारीला स्ट्रीमिंग प्लॅटफॉर्म नेटफ्लिक्सनं त्यांच्या अधिकृत इंस्टाग्राम हँडलवर 'संजय लीला भन्साळी यांच्या 'हीरामंडी'चा फर्स्ट लूक रिलीज केला आहे.
'हिरामंडी'चा फर्स्ट लूक रिलीज : फेब्रुवारीमध्ये, निर्मात्यांनी एक टीझर शेअर केला होता, ज्यामध्ये मनीषा कोईराला एका रॉयल गेटअपमध्ये जबरदस्त दिसत होती, त्यानंतर उर्वरित कलाकारांच्या अशाच हसमुख झलक दिसल्या होत्या. ज्यामध्ये सोनाक्षी सिन्हा,रिचा चढ्ढा, अदिती राव हैदरी, शर्मीन सहगल आणि संजीदा शेख यांच्या पात्रांचे शाही, सुंदर लूक दाखवण्यात आले होते. या अभिनेत्री या भव्य वेब सीरीजमध्ये हिरामंडी नावाच्या ठिकाणी राहणाऱ्या गणिकेच्या भूमिकेत दिसतील. भन्साळी वेब सीरीजद्वारे सर्वांना एका जादुई दुनियेत घेऊन जाणार आहेत. 1940च्या दशकातील भारतीय स्वातंत्र्यलढ्याच्या पार्श्वभूमीवर आधारित ही वेब सीरीज वेश्या आणि त्यांच्या ग्राहकांच्या कहाणीभोवती फिरणारी आहे. दरम्यान 'हिरामंडी'चा फर्स्ट लूक खूप जोरदार आहे.
'हिरामंडी'साठी घेतलं नृत्याचं प्रशिक्षण : सोनाक्षी, मनीषा, अदिती, ऋचा, संजीदा या सर्व अभिनेत्रींना त्यांच्या भूमिका साकारण्यासाठी नृत्याचे प्रशिक्षण देण्यात आले आहे. संजय लीला भन्साळी यांचा मागील चित्रपट 'गंगूबाई काठियावाडी' हा देखील वेश्याच्या आयुष्यावर आधारित होता, ज्यामध्ये आलिया भट्टची प्रमुख भूमिका होती. या चित्रपटाचे समीक्षकांनीच कौतुक केले नाही तर 2022 मध्ये सर्वाधिक कमाई करणारा तो पाचवा चित्रपट ठरला होता. आलिया भट्टशिवाय या चित्रपटात अजय देवगण, शंतनू माहेश्वरी, विजय राज, इंदिरा तिवारी, सीमा पाहवा, वरुण कपूर आणि जिम सरभ यांच्याही भूमिका आहेत. दरम्यान 'हिरामंडी' ही वेब सीरीज नेटफ्लिक्सवर कधी स्ट्रीम होईल हे अद्याप जाहीर करण्यात आलेले नाही.
हेही वाचा :
