ശ്രീനഗർ: അഗര്‍ ഫിര്‍ദൗസ് ബാര്‍ റൂ-ഇ ജമീന്‍ ആസ്റ്റ്, ഹമീന്‍ അസ്‌ത്-ഓ, ഹമീന്‍ അസ്‌ത്-ഓ അമീന്‍ അസ്‌ത്...'ഭൂമിയില്‍ ഒരു സ്വര്‍ഗം ഉണ്ടെങ്കില്‍ അത് ഇതാണ്, ഇതാണ്, ഇതാണ്...' ദിവാനി ഖാസില്‍ ആലേഖനം ചെയ്യപ്പെട്ട ഉറുദു കവി അമീര്‍ ഖുസ്രുവിന്‍റെ മഹത്തായ വാചകം. മഞ്ഞുമലകളാലും പുല്‍മേടുകളാലും കണ്ണാടിച്ചില്ല് പോലെ തെളിഞ്ഞ തടാകങ്ങളാലും അനുഗ്രഹീതമായ ഭൂമിയിലെ സ്വര്‍ഗം. ഏതൊരാളുടെയും സ്വപ്‌ന ഭൂമികയാണ് കശ്‌മീര്‍. യാത്രാപ്രേമികളുടെ ഒരിക്കലെങ്കിലും കണ്ടിരിക്കേണ്ട സ്ഥലങ്ങളുടെ ലിസ്റ്റില്‍ കശ്‌മീര്‍ മുന്‍നിരയില്‍ തന്നെയുണ്ടാകും.
കശ്‌മീര്‍ താഴ്‌വരയിലെ ദാല്‍ തടാകം, പ്രശസ്‌തമായ വിനോദസഞ്ചാര കേന്ദ്രങ്ങളിലൊന്ന്. ദാല്‍ തടാകത്തിലെ ശിക്കാര സവാരിയില്ലാതെ കശ്‌മീര്‍ സന്ദര്‍ശനം പൂര്‍ണമാകില്ലെന്നാണ് പറയപ്പെടുന്നത്. കശ്‌മീരിന്‍റെ വശ്യത കാണാന്‍ ഇവിടേക്കെത്തുന്ന സഞ്ചാരികള്‍ക്ക് ദാല്‍ തടാകത്തിലെ ശിക്കാര യാത്ര സമ്മാനിക്കുന്നത് ഒരിക്കലും മറക്കാനാകാത്ത അനുഭവമാണ്.
പക്ഷേ ദാല്‍ ലേക്കിലെ സവാരിക്കായി ശിക്കാര കണ്ടെത്തുക എന്നത് അല്‍പം പ്രയാസമാണ്. പറ്റിക്കപ്പെടാന്‍ സാധ്യതയേറെ എന്നത് തന്നെ കാരണം. പരിചയക്കുറവ് മുതലെടുത്ത് അധിക തുക വാങ്ങുന്ന ഏജന്‍റുമാരാല്‍ പറ്റിക്കപ്പെട്ടവര്‍ ഏറെയാണ്. എന്നാല്‍ ഇതിന് പരിഹാരവുമായി എത്തിയിരിക്കുകയാണ് ഊബര്‍ ഇന്ത്യ. ഇനി ദാല്‍ തടാകത്തിലെ ശിക്കാര സവാരി വളരെ ഈസിയാകും.
ഊബര്‍ ശിക്കാരയെ കുറിച്ചറിയാം...: രാജ്യത്ത് ആദ്യമായാണ് ഊബര്‍ ജലഗതാഗത സേവനം ആരംഭിക്കുന്നത്. പുതിയ സേവനം ആരംഭിക്കുന്നതായി ഊബര്‍ എക്‌സിലൂടെ അറിയിച്ചു. 'ഊബർ ശിക്കാര' എന്ന് പേരിട്ടിരിക്കുന്ന സേവനം, ടൂറിസം വർധിപ്പിക്കുന്നതിനും ശിക്കാര ഓപ്പറേറ്റർമാർക്ക് സാമ്പത്തിക പിന്തുണ നൽകുന്നതിനും സഹായിക്കുമെന്ന് ഊബര്‍ പറയുന്നു. യാത്രകള്‍ തടസമില്ലാത്തതും ആസ്വാദ്യകരവുമാക്കുന്നതിലാണ് ഞങ്ങളുടെ ശ്രദ്ധ.
ഊബര്‍ ശിക്കാര ഉപയോഗിച്ച് ഞങ്ങൾ സാങ്കേതിക വിദ്യയും പാരമ്പര്യവും സംയോജിപ്പിച്ച് സഞ്ചാരികൾക്ക് അതുല്യമായ അനുഭവം സമ്മാനിക്കും. ഈ സേവനം വിനോദ സഞ്ചാരത്തെ ഉയർത്തുക മാത്രമല്ല, കശ്‌മീരിന്‍റെ മനോഹര ഭൂപ്രകൃതിയിൽ ഉപജീവനം കണ്ടെത്തുന്ന ശിക്കാര ഡ്രൈവർമാരെ ശാക്തീകരിക്കുകയും ചെയ്യുന്നു.'- ഊബര്‍ വക്താവ് പറഞ്ഞു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഏഷ്യയിലെ തന്നെ ഊബറിന്‍റെ ആദ്യ ജലഗതാഗത സംരംഭമാണിത്. വാട്ടർ ടാക്‌സികൾ ജനപ്രിയമായ ഇറ്റലിയിലെ വെനീസ് പോലുള്ള നഗരങ്ങളിൽ കമ്പനിക്ക് സമാനമായ സേവനങ്ങളുണ്ട്. തുടക്കത്തിൽ ഏഴ് ശിക്കാര ഓപ്പറേറ്റർമാരെയാണ് പദ്ധതിയില്‍ ഉൾപ്പെടുത്തിയിരിക്കുന്നത്. ഡിമാൻഡ് അനുസരിച്ച് ഫ്ലീറ്റ് വിപുലീകരിക്കുമെന്നും ഊബര്‍ അറിയിച്ചു.
സര്‍ക്കാര്‍ നിയന്ത്രിത നിരക്കുകൾക്കനുസൃതമായാണ് റൈഡുകൾക്ക് വില നിശ്ചയിച്ചിരിക്കുന്നത്. ഓപ്പറേറ്റർമാർക്ക് മുഴുവൻ നിരക്കും ലഭിക്കുന്നതിനായി സേവന ഫീസ് ഊബര്‍ ഒഴിവാക്കിയട്ടുണ്ട്. ദിവസവും രാവിലെ 10 മുതൽ വൈകിട്ട് 5 വരെ ഊബർ ശിക്കാര റൈഡുകൾ പ്രവർത്തിക്കുമെന്ന് വക്താവ് അറിയിച്ചു. ഓരോ യാത്രയിലും നാല് യാത്രക്കാരെ ഉൾക്കൊള്ളിക്കും. ഒരു മണിക്കൂർ നീണ്ട് നിൽക്കുന്നതാണ് യാത്ര. യാത്രക്കാർക്ക് 12 മണിക്കൂർ മുതൽ 15 ദിവസം വരെ അഡ്വാന്‍സ് ബുക്ക് ചെയ്യാം.
'ദാൽ തടാകത്തില്‍ ഏകദേശം 4,000 ശിക്കാരകളുണ്ട്. ഊബര്‍ പ്ലാറ്റ്‌ഫോം റൈഡുകള്‍ക്ക് ഒരു നിശ്ചിത വില ഉറപ്പാക്കുന്നു. ഇത് വിലപേശലിന്‍റെ ആവശ്യകത ഒഴിവാക്കുകയും വിനോദ സഞ്ചാരികൾക്ക് തടസരഹിതമായ അനുഭവം നൽകുകയും ചെയ്യും. കൂടുതൽ ശിക്കാര ഓപ്പറേറ്റർമാർ ഉടൻ ഈ സംരംഭത്തിൽ ചേരുമെന്ന് ഞങ്ങൾ പ്രതീക്ഷിക്കുന്നു.'- ശിക്കാര ഓണേഴ്‌സ് അസോസിയേഷൻ കശ്‌മീര്‍ പ്രസിഡന്‍റ് വാലി മുഹമ്മദ് ഭട്ട് പറഞ്ഞു.
ബുക്ക് ചെയ്യേണ്ടതിങ്ങനെ...: ഊബര്‍ ആപ്പിന്‍റെ ഏറ്റവും പുതിയ പതിപ്പിലാണ് ശിക്കാര റൈഡുകള്‍ ബുക്ക് ചെയ്യാനുള്ള സൗകര്യമുള്ളത്.
ആപ്പ് തുറന്ന് 'Where to' എന്ന വിഭാഗത്തിൽ ആരംഭ പോയിന്‍റായി 'ശിക്കാര ഘട്ട് നമ്പർ 16' നൽകുക. അടുത്തതായി, ലഭ്യമായ റൈഡ് ചോയ്‌സുകളിൽ നിന്ന് 'ഊബര്‍ ശിക്കാര' ഓപ്ഷൻ തെരഞ്ഞെടുക്കുക. തുടർന്ന് റൈഡിനായുള്ള സമയവും തീയതിയും തെരഞ്ഞെടുക്കുക.
സമയവും തീയതിയും തെരഞ്ഞെടുത്ത ശേഷം, ഘട്ട് നമ്പർ 16ൽ പിക്ക്-അപ്പ് ലൊക്കേഷൻ സ്ഥിരീകരിക്കുക. അവസാനമായി, ബുക്ക് ബട്ടൺ ക്ലിക്ക് ചെയ്യുക. ഇതോടെ ശിക്കാര റൈഡ് ബുക്കിങ് പൂര്‍ത്തിയാകും.
Also Read: താപനില ഫ്രീസിങ് പോയിന്‍റിനും മുകളില്‍, തണുത്തുവിറച്ച് കശ്‌മീര്‍; സഞ്ചാരികള്‍ക്ക് തിരിച്ചടി
