2025ൽ രണ്ട് വീതം സൂര്യഗ്രഹണവും ചന്ദ്രഗ്രഹണവും: ഇത്തവണ ഇന്ത്യയിൽ ദൃശ്യമാവുക ഒരു ഗ്രഹണം മാത്രം

2025ൽ നടക്കുന്ന നാല് ഗ്രഹണങ്ങളിൽ ഇന്ത്യയിൽ ദൃശ്യമാവുക ഒരു ഗ്രഹണം മാത്രം. വിശദമായി അറിയാം.

ഹൈദരാബാദ്: ഓരോ വർഷവും നിരവധി ആകാശവിസ്‌മയങ്ങൾ സംഭവിക്കാറുണ്ട്. 2025ൽ 4 ഗ്രഹണങ്ങൾക്കാണ് ആകാശം വേദിയാകാൻ പോകുന്നത്. ഉജ്ജയിനിലെ ജിവാജി ഒബ്‌സർവേറ്ററി സൂപ്രണ്ടായ രാജേന്ദ്ര പ്രകാശ് ഗുപ്‌ത് പറയുന്നതനുസരിച്ച് ഇത്തവണ രണ്ട് സൂര്യഗ്രഹണങ്ങളും രണ്ട് ചന്ദ്രഗ്രഹണങ്ങളും ഉൾപ്പെടെ നാല് ഗ്രഹണങ്ങൾ ഉണ്ടാകും. എന്നാൽ ഇന്ത്യക്കാർക്ക് ദൃശ്യമാകുക ഒരു ചന്ദ്രഗ്രഹണം മാത്രമായിരിക്കും. 'ടൈം ആൻഡ് ഡേറ്റ്' എന്ന വെബ്‌പോർട്ടലിലും നേരത്തെ ഇക്കാര്യം വ്യക്തമാക്കിയിരുന്നു. പ്രകാശ് ഗുപ്‌ത് വാർത്താ ഏജൻസിയായ പിടിഐക്ക് നൽകിയ വിശദാംശങ്ങളിലേക്ക്....

പൂർണ ചന്ദ്രഗ്രഹണം (2025 മാർച്ച് 14):

2025 ലെ ആദ്യത്തെ ചന്ദ്രഗ്രഹണമാണിത്. രക്തചന്ദ്രൻ അഥവാ ബ്ലഡ് മൂൺ കാഴ്‌ചയിലുള്ള ഈ പൂർണ ചന്ദ്രഗ്രഹണം ഇന്ത്യയിൽ പകൽസമയത്താണ് നടക്കുന്നത്. അതിനാൽ തന്നെ ഇന്ത്യക്കാർക്ക് ദൃശ്യമാകില്ലെന്നാണ് റിപ്പോർട്ടുകൾ. യുഎസ്എ, പടിഞ്ഞാറൻ യൂറോപ്പ്, പടിഞ്ഞാറൻ ആഫ്രിക്ക, വടക്ക്, തെക്ക് അറ്റ്ലാൻ്റിക് സമുദ്രം എന്നീ പ്രദേശങ്ങളിൽ ദൃശ്യമാകും.

ഭാഗിക സൂര്യഗ്രഹണം (2025 മാർച്ച് 29):

സൂര്യന്‍റെ കുറച്ച് ഭാഗം മാത്രമേ ചന്ദ്രൻ മറയ്‌ക്കൂ എന്നതിനാൽ 2025ലെ ആദ്യ സൂര്യഗ്രഹണം ഭാഗികമായിരിക്കും. പകൽസമയത്ത് സംഭവിക്കുന്നതിനാൽ തന്നെ ഈ ഭാഗിക സൂര്യഗ്രഹണവും ഇന്ത്യക്കാർക്ക് ദൃശ്യമാകില്ല. വടക്കേ അമേരിക്ക, ഗ്രീൻലാൻഡ്, ഐസ്‌ലാൻഡ്, വടക്കൻ അറ്റ്ലാൻ്റിക് സമുദ്രം, യൂറോപ്പ്, വടക്കുപടിഞ്ഞാറൻ റഷ്യ തുടങ്ങിയ പ്രദേശങ്ങളിലാണ് ഭാഗിക സൂര്യഗ്രഹണം ദൃശ്യമാകുക.

പൂർണ ചന്ദ്രഗ്രഹണം (2025 സെപ്റ്റംബർ 7-8):

2025ൽ ഇന്ത്യക്കാർക്ക് ദൃശ്യമാകുന്ന ആകാശവിസ്‌മയമായിരിക്കും സെപ്റ്റംബറിലെ പൂർണ ചന്ദ്രഗ്രഹണം. സെപ്റ്റംബർ 7ന് രാത്രി 8:58 മുതൽ സെപ്റ്റംബർ 8ന് 2:25 AM വരെ ഇന്ത്യക്കാർക്ക് പൂർണ ചന്ദ്രഗ്രഹണം ദൃശ്യമാകും. കടും ചുവപ്പ് നിറത്തിലായിരിക്കും ഈ ദിവസം ചന്ദ്രൻ കാണപ്പെടുക. യൂറോപ്പ്, അൻ്റാർട്ടിക്ക, പശ്ചിമ പസഫിക് സമുദ്രം, ഓസ്‌ട്രേലിയ, ഇന്ത്യൻ മഹാസമുദ്ര പ്രദേശങ്ങൾ, ഇന്ത്യ, ഏഷ്യയിലെ മറ്റ് രാജ്യങ്ങൾ എന്നിവിടങ്ങളിൽ ദൃശ്യമാകുമെന്നാണ് റിപ്പോർട്ടുകൾ.

ഭാഗിക സൂര്യഗ്രഹണം (2025 സെപ്റ്റംബർ 21-22):

2025ലെ അവസാന ഗ്രഹണമാണ് സെപ്റ്റംബർ 21-22 തീയതികളിൽ നടക്കാൻ പോകുന്ന ഭാഗിക സൂര്യഗ്രഹണം. ഇത് ഇന്ത്യയിൽ ദൃശ്യമാകില്ല. ന്യൂസിലാൻഡ്, കിഴക്കൻ മെലനേഷ്യ, തെക്കൻ പോളിനേഷ്യ, പടിഞ്ഞാറൻ അൻ്റാർട്ടിക്ക തുടങ്ങിയ രാജ്യങ്ങളിൽ പൂർണ സൂര്യഗ്രഹണം ദൃശ്യമാകും.