തിരുവനന്തപുരം: വിജിലന്‍സ് ഡയറക്‌ടര്‍ സ്ഥാനത്ത് നിന്ന് അടുത്തമാസം സ്വയം വിരമിക്കുന്ന ടി കെ വിനോദ് കുമാറിന് പകരം പുതിയ വിജിലന്‍സ് ഡയറക്‌ടര്‍ ആരാകുമെന്ന ചര്‍ച്ചകള്‍ പൊലീസ് തലപ്പത്ത് സജീവമായി. വിരമിക്കാന്‍ ഒരു വര്‍ഷം കൂടി ബാക്കി നില്‍ക്കേയാണ് സംസ്ഥാനത്തെ സീനിയര്‍ ഐഎഎസ് ഉദ്യോഗസ്ഥനായ ടികെ വിനോദ് കുമാറിന്‍റെ സ്വയം വിരമിക്കല്‍ അപേക്ഷയ്ക്ക് സര്‍ക്കാര്‍ അനുമതി നല്‍കിയത്. ഓഗസ്റ്റ് 11 ന് സര്‍വ്വീസില്‍ നിന്ന് വിരമിക്കാന്‍ സര്‍ക്കാര്‍ അനുമതി നല്‍കിയതോടെ സീനിയര്‍ എഡിജിപിയും ബിവറേജസ് കോര്‍പ്പറേഷന്‍ എംഡിയുമായ യോഗേഷ് ഗുപ്‌തയ്ക്ക്‌ ഡിജിപിയായി സ്ഥാന കയറ്റം ലഭിക്കും.
ഇതോടെ വിജിലന്‍സ് ഡയറക്‌ടര്‍ പദത്തിലേക്ക് നിലവില്‍ ഫയര്‍ഫോഴ്‌സ് മേധാവിയായ പത്മകുമാറിനെയോ പുതുതായി സ്ഥാന കയറ്റം ലഭിക്കുന്ന ബിവറേജസ് എംഡി യോഗേഷ് ഗുപ്‌തയെയോ പരിഗണിച്ചേക്കുമെന്നാണ് സൂചന. സംസ്ഥാനത്ത് നിലവില്‍ നാല് അംഗീകൃത ഡിജിപി തസ്‌തികകളാണുള്ളത്. സംസ്ഥാന പൊലീസ് മേധാവി, വിജിലന്‍സ് ഡയറക്‌ടര്‍, ഫയര്‍ഫോഴ്‌സ് മേധാവി, മനുഷ്യാവകാശ കമ്മിഷന്‍ ഡിജിപി എന്നീ തസ്‌തികകളാണ് അംഗീകൃത ഡിജിപി തസ്‌തികകള്‍.
അതില്‍ വിജിലന്‍സ് ഡയറക്‌ടര്‍ അടുത്തമാസം ഒഴിയുന്നതോടെ ഒരു ഡിജിപി തസ്‌തികയിലേക്ക് ഒഴിവ് വരും. ഈ ഡിജിപി തസ്‌തികയിലേക്കാണ് യോഗേഷ് ഗുപ്‌ത എത്തുന്നത്.
എന്നാല്‍ വിജിലന്‍സ് ഡയറക്‌ടര്‍ ആരാകണമെന്ന് തീരുമാനിക്കുന്നത് സര്‍ക്കാരാണ്. നിലവില്‍ മനുഷ്യാവകാശ കമ്മിഷന്‍ ഡിജിപിയായ സഞ്ജീവ് കുമാര്‍ പട്‌ജോഷി 2025 ജനുവരിയില്‍ വിരമിക്കുന്ന സാഹചര്യത്തില്‍ വിജിലന്‍സ് ഡയറക്‌ടറായി അദ്ദേഹത്തെ പരിഗണിച്ചേക്കില്ല. പകരം ഏകദേശം ഒരു വര്‍ഷത്തോളം സര്‍വ്വീസുള്ള കെ പത്മകുമാറിനോ പുതുതായി സ്ഥാന കയറ്റം ലഭിച്ച യോഗേഷ് ഗുപ്‌തയ്‌ക്കോ നറുക്ക് വീണേക്കുമെന്നാണ് സൂചന.
അങ്ങനെയല്ലെങ്കില്‍ എഡിജിപിമാര്‍ക്കാര്‍ക്കെങ്കിലും വിജിലന്‍സ് ഡയറക്‌ടറായി നിയമനം നല്‍കിയേക്കും. മുന്‍പ് എഡിജിപി എം ആര് അജിത്കുമാര്‍, മനോജ് എബ്രഹാം എന്നിവരെ വിജിലന്‍സ് ഡയറക്‌ടറായി നിയമിച്ചിരുന്നു. യോഗേഷ് ഗുപ്‌ത വിജിലന്‍സ് ഡയറക്‌ടറാകുന്നില്ലെങ്കില്‍ അദ്ദേഹം വഹിക്കുന്ന ബിവറേജസ് കോര്‍പ്പറേഷന്‍ എംഡി പദവിയെ ഡിജിപി തസ്‌തികയിലേക്കുയര്‍ത്തും. 2025 ജനുവരിയില്‍ സഞ്ജീവ് പട്‌ജോഷി വിരമിക്കുന്നതോടെ മനോജ് എബ്രഹാമും ഡിജിപി പദവിയിലെത്തിയേക്കും.
