തിരുവനന്തപുരം: ലോക്‌സഭ തെരഞ്ഞെടുപ്പിന് ഇനി ദിവസങ്ങൾ മാത്രമാണ് ബാക്കിയുള്ളത്. ആഘോഷമായി പ്രചരണത്തിന് മുൻപിലേക്കെത്തുന്ന സ്ഥാനാർഥികളെക്കുറിച്ച് ഓരോ വോട്ടർമാരും അറിഞ്ഞിരിക്കേണ്ടത് ജനാധിപത്യ വ്യവസ്ഥയിൽ അത്യാവശ്യമാണ്. അങ്ങനെ സ്ഥാനാര്‍ഥിയുടെ പേരിലുള്ള കേസുകൾ എന്തെല്ലാം? ആസ്‌തി എത്ര? വിശദമായി അറിയാൻ സഹായിക്കുന്ന തെരഞ്ഞെടുപ്പ് കമ്മിഷന്‍റെ ആപ്പാണ് കെവൈസി.
ഓരോ മണ്ഡലത്തിലെയും സ്ഥാനാർഥികളെ കുറിച്ച് കൂടുതലറിയാൻ കെവൈസി (Know Your Candidate) മൊബൈൽ ആപ്പ് അവതരിപ്പിച്ചിരിക്കുകയാണ് തെരഞ്ഞെടുപ്പ് കമ്മീഷൻ. 194 സ്ഥാനാർഥികളാണ് സംസ്ഥാനത്ത് ലോക്‌സഭാ തെരഞ്ഞെടുപ്പിൽ ജനവിധി തേടുന്നത്. എല്ലാ സ്ഥാനാര്‍ഥികളുടെയും ക്രിമിനല്‍ പശ്ചാത്തലം, ആരോപിക്കപ്പെട്ട കുറ്റകൃത്യത്തിന്‍റെ സ്വഭാവം, കേസിന്‍റെ നിലവിലെ സ്ഥിതി എന്നീ വിവരങ്ങൾ ആപ്പ് വഴി അറിയാനാവും. നാമനിര്‍ദേശ പത്രികക്കൊപ്പം സ്ഥാനാര്‍ഥി സമര്‍പ്പിച്ച സത്യവാങ്മൂലവും ആപ്പിൽ ഡൗണ്‍ലോഡ് ചെയ്യാം.
എന്‍റെ സ്ഥാനാർഥിയെ എങ്ങനെ തിരിയാം?
ആന്‍ഡ്രോയ്‌ഡ്, ഐഒഎസ് പ്ലാറ്റ്‌ഫോമുകളില്‍ ആപ്പ് ലഭ്യമാണ്. ഗൂഗിള്‍ പ്ലേ സ്‌റ്റോ റില്‍ നിന്നോ ആപ്പിള്‍ ആപ്പ് സ്‌റ്റോറില്‍ നിന്നോ ആപ്പ് ഡൗണ്‍ലോഡ് ചെയ്‌ത് ഇന്‍സ്‌റ്റാള്‍ ചെയ്യണം. ശേഷം ലോക്‌സഭ തെരഞ്ഞെടുപ്പ് സെലക്‌ട് ചെയ്‌ത് മണ്ഡലം നല്‍കിയാല്‍ അവിടെ മത്സരിക്കുന്ന മുഴുവന്‍ സ്ഥാനാര്‍ഥികളുടെയും വിവരങ്ങള്‍ ലഭ്യമാകും. സ്ഥനാര്‍ഥികളുടെ പേര് ടൈപ്പ് ചെയ്‌തും ആപ്പിൽ തിരയാം. ലോക്‌സഭ തെരഞ്ഞെടുപ്പില്‍ ഇതുവരെ എത്ര നാമനിര്‍ദേശ പത്രികകള്‍ സമര്‍പ്പിക്കപ്പെട്ടു, എത്ര സ്ഥാനാര്‍ഥികള്‍ മല്‍സരിക്കുന്നുണ്ട്, ക്രിമിനല്‍ പശ്ചാത്തലമുള്ളവര്‍ എത്ര, തള്ളിയ നാമനിര്‍ദേശപ ത്രികകള്‍ എത്ര തുടങ്ങിയ വിവരങ്ങളും ആപ്പില്‍ നിന്ന് ലഭിക്കും.
