കോഴിക്കോട്: കേരളം നടുങ്ങിയ വയനാട്ടിലെ ദുരന്തത്തിന് വഴി വച്ചത് അനധികൃത നിർമാണവും അനാസ്ഥയുമാണോ എന്ന ചോദ്യമാണ് പല കോണുകളില്‍ നിന്നുമുയരുന്നത്. കേന്ദ്രമന്ത്രി ഭൂപേന്ദ്ര യാദവ് ഉൾപ്പെടെയുള്ളവർ ഈ ചോദ്യമാണ് മുന്നോട്ട്‌ വെച്ചതും. കേരളത്തിൽ ഏറ്റവും കൂടുതൽ റിസോർട്ടുകളും എണ്ണമറ്റ ഹോംസ്‌റ്റേകളുമുള്ള പഞ്ചായത്താണ് മേപ്പാടി. ഉരുൾപൊട്ടലുണ്ടായ ചൂരൽമല, മുണ്ടക്കൈ, അട്ടമല പ്രദേശങ്ങൾ ഈ പഞ്ചായത്തിൻ്റെ കീഴിലാണ്. 2019 മുതല്‍ റിസോർട്ടുകളും ഹോം സ്‌റ്റേകളും ഉള്‍പ്പെടുന്ന നാല്‍പ്പതോളം കെട്ടിടങ്ങള്‍ക്കാണ് മൂന്ന് വാര്‍ഡുകളിലായി മേപ്പാടി പഞ്ചായത്ത് അനുമതി നല്‍കിയത്.
സ്‌പെഷ്യല്‍ റെസിഡന്‍ഷ്യല്‍ അനുമതി നല്‍കിയതോടെ കെട്ടിട ബാഹുല്യമായി. രണ്ടായിരത്തിലേറെ വീടുകളാണ് അട്ടമലയിലും മുണ്ടക്കൈയിലും ചൂരല്‍മലയിലും ഉണ്ടായിരുന്നതെന്നതും ഞെട്ടിക്കുന്ന കണക്കാണ്. അനധികൃത നിര്‍മാണത്തിലടക്കം ജില്ലാ ഭരണകൂടത്തിന് റിപ്പോർട്ട് നൽകി എന്നാണ് വനം വകുപ്പ് പറയുന്നത്.
റെഡ് കാറ്റഗറിയിലുള്ള ഈ പ്രദേശത്തെ കുറിച്ച് വിദഗ്‌ധരടങ്ങിയ സംയുക്ത കമ്മിറ്റി നിരവധി റിപ്പോർട്ടുകൾ നൽകിയതാണെന്ന് വയനാട് സൗത്ത് ഡിഎഫ്ഒ അജിത്ത് കെ രാമന്‍ ഇടിവി ഭാരതിനോട് പറഞ്ഞു. സുരക്ഷ ഇല്ലാത്തതിനാൽ ഈ മേഖലയിൽ കെട്ടിടങ്ങൾ നിയന്ത്രിക്കേണ്ടതുണ്ട്. എൻഒസി ഇല്ലാതെ പ്രവർത്തിക്കുന്ന റിസോർട്ടുകളും മറ്റും അടിയന്തരമായി നിർത്തലാക്കണം. പുഞ്ചിരിമട്ടം ഭാഗത്തെ വനമേഖലയോട് ചേർന്നുള്ള സ്ഥലങ്ങൾ ആവശ്യമെങ്കിൽ വനം വകുപ്പ് ഏറ്റെടുക്കണം എന്നും ഡിഎഫ്ഒ നിർദേശിക്കുന്നു.
മുമ്പ് പല തവണ ഉരുള്‍പൊട്ടലുണ്ടായ മുണ്ടക്കൈ, ചൂരല്‍മല മേഖലയില്‍ ഇതൊന്നും കണക്കിലെടുക്കാതെയാണ് കെട്ടിടങ്ങള്‍ പണിയാൻ അനുമതികള്‍ നല്‍കിയിരുന്നതെന്നതാണ് കണക്കുകള്‍ വ്യക്തമാക്കുന്നത്. സാധാരണ മനുഷ്യർ ജീവിക്കാൻ കുടിയേറിയതിന് പുറമെ വൻതോതില്‍ വിനോദ സഞ്ചാരികളെ ആകർഷിക്കാൻ വ്യാപകമായി റിസോര്‍ട്ടുകള്‍ക്കും ഹോം സ്‌റ്റേകള്‍ക്കും അനുമതി കൊടുത്തു.
അഡ്വഞ്ചർ ടൂറിസത്തിനും ട്രക്കിങിനുമായി ആയിരക്കണക്കിന് വിനോദ സഞ്ചാരികളാണ് ഓരോ മാസവും ഈ മലമുകളിലേക്ക് വന്നുകൊണ്ടിരുന്നത്. വിനോദ സഞ്ചാരികളുടെ സുരക്ഷ കാര്യമായി ഉറപ്പാക്കാതെ കനത്ത മഴയിലും ഇവിടങ്ങളില്‍ പ്രവേശനം തടസമില്ലാതെ തുടർന്നു. ട്രക്കിങിനും അഡ്വഞ്ചർ ടൂറിസത്തിനും വിലക്കേർപ്പെടുത്തിയിട്ടും റിസോർട്ടുകളിലെല്ലാം ആളുകള്‍ താമസക്കാരായി ഉണ്ടായിരുന്നു. അനധികൃത നിർമാണം വ്യാപകമായി നടക്കുന്നുവെന്ന പരാതി ഉയർന്നിട്ടും ആരും ഇടപെട്ടില്ല.
അതേസമയം 29ന് ചെറിയ മണ്ണിടിച്ചിലുണ്ടായ ദിവസം വിനോദ സഞ്ചാരമേഖലകളില്‍ നിയന്ത്രണം ഉണ്ടായിട്ടും നിർദേശങ്ങള്‍ കൃത്യമായി പാലിക്കപ്പെട്ടില്ലെന്നാണ് പ്രദേശിവാസികളുടെ പരാതി. കാലാവസ്ഥ മുന്നറിയിപ്പും കൃത്യമല്ലാതായതോടെ ജനവാസ മേഖലയിലെ ദുരന്തം ഇരട്ടിച്ചു.
1984 മുതൽ വയനാട്ടിൽ ഉരുൾപൊട്ടിയതെല്ലാം മഴക്കാലത്താണ്. അതിതീവ്ര മഴപെയ്‌തപ്പോഴൊക്കെ ഉരുൾ പൊട്ടിയിട്ടുണ്ട്. എന്നാൽ കാലാവസ്ഥ നിരീക്ഷണ വകുപ്പിന്‍റെ ഭാഗത്ത് നിന്നുണ്ടായത് വലിയ വീഴ്‌ചയാണ്. അമിതമായി മഴവെള്ളത്തെ താങ്ങാൻ കഴിയാത്ത ഭൂപ്രകൃതിയാണിത്. ഈ നാട് വിട്ട് പലരും പോകാൻ തയ്യാറാകില്ല. എന്നാൽ കർശന മുന്നറിയിപ്പ് ഉണ്ടായിരുന്നെങ്കിൽ ഒരുപാട് പേർ രക്ഷപ്പെടുമായിരുന്നുവെന്ന് പ്രദേശവാസിയായ സെയ്‌ദ് മേപ്പാടി പറഞ്ഞു.
ഈ മലഞ്ചൊരുവില്‍ സ്വർണ ഖനിയാകാം എന്ന് കരുതി ഈസ്‌റ്റ് ഇന്ത്യ കമ്പനി ഇവിടെ തമ്പടിച്ചിരുന്നു. എന്നാൽ ഖനനം ദുഷ്‌കരമായതോടെ അവർ കൃഷിയിലേക്ക് തിരിഞ്ഞു. അന്ന് തുടങ്ങിയതാണ് ഈ പ്രദേശത്ത് തേയില, കാപ്പി കൃഷികൾ. പിന്നീടാണ് ജനവാസം കൂടി വന്നത്. അത് ഒടുവിൽ തങ്ങാവുന്നതിലും അപ്പുറത്തായി എല്ലാവിധത്തിലും. നഷ്‌ടം ആർക്കും താങ്ങാവുന്നതിന് അപ്പുറത്തും.
Also Read: വയനാട് ദുരന്തം: പശ്ചിമഘട്ട സംരക്ഷണത്തിന് പുത്തന്‍ മാര്‍ഗ നിര്‍ദേശങ്ങള്‍ തേടി കേന്ദ്രം
