കോഴിക്കോട്: അന്താരാഷ്ട്ര തലത്തില്‍ തിളങ്ങാനൊരുങ്ങി ഒമ്പത് വയസുകാരി ഉമ്മു ഹബീബ. കുടുംബശ്രീ-ബാലസഭ കുട്ടികള്‍ക്കായി സംഘടിപ്പിക്കുന്ന അന്താരാഷ്ട്ര ഉച്ചകോടിയിലാണ് തിക്കോടി പള്ളിക്കര സ്വദേശി ഉമ്മു ഹബീബ പ്രബന്ധം അവതരിപ്പിക്കുക. കീഴൂര്‍ എയുപി സ്‌കൂളിലെ നാലാംക്ലാസ് വിദ്യാര്‍ത്ഥിയാണ് ഉമ്മു ഹബീബ.
ശുചിത്വോത്സവം സീസണ്‍ 2 വില്‍ മാലിന്യ മുക്ത നവകേരളം - പ്രശ്‌നങ്ങളും സാധ്യതകളും എന്ന വിഷയത്തിൽ ഉമ്മു ഹബീബ മത്സരിച്ചിരുന്നു. ഇതിന്‍റെ അടിസ്ഥാനത്തിൽ നാട്ടിലെ വിഷയങ്ങള്‍ അവതരിപ്പിക്കാനായിരുന്നു കുട്ടികള്‍ക്ക് കിട്ടിയ നിര്‍ദേശം. നീന്തൽ കുളത്തിലെ ജല മലിനീകരണവും അമീബിക് മസ്‌തിഷ്‌ക ജ്വരവുമായിരുന്നു ഉമ്മു ഹബീബ പ്രബന്ധത്തിനായി തെരഞ്ഞെടുത്ത വിഷയം.
ഇതിനായി അമീബിക് മസ്‌തിഷ്‌ക ജ്വരം ബാധിച്ച് രോഗമുക്തി നേടിയ കുട്ടിയുമായി അഭിമുഖം നടത്തുകയും ചെയ്‌തു. ഉമ്മു ഹബീബയുടെ ഈ പ്രബന്ധമാണ് അന്താരാഷ്ട്ര ഉച്ചകോടിയിലേക്ക് തെരഞ്ഞെടുക്കപ്പെട്ടിരിക്കുന്നത്. നവംബര്‍ മാസം അവസാനമോ, ഡിസംബര്‍ ആദ്യവാരമോ ആയിരിക്കും ഉച്ചകോടി നടക്കുക.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
പഠനത്തോടൊപ്പം കലാരംഗത്തും ഒരുപോലെ മിടുക്കിയാണ് ഉമ്മു ഹബീബ. പയ്യോളി മുനിസിപ്പല്‍ കലാമേളയില്‍ ഖുര്‍ആന്‍ പാരായണത്തില്‍ ഫസ്‌റ്റ് എ ഗ്രേഡ്, അറബി ഗാനത്തില്‍ ഫസ്‌റ്റ് എ ഗ്രേഡ്, സംഘഗാനം (അറബിക്) - സെക്കന്റ് എ ഗ്രേഡ്, കഥ പറയല്‍ (അറബിക്) - സെക്കന്റ് എ ഗ്രേഡ്, അറബിക് പദ്യം (ജനറല്‍)- തേര്‍ഡ് എ ഗ്രേഡ്, പ്രസംഗം (മലയാളം) - സെക്കന്റ് എ ഗ്രേഡ് എന്നിങ്ങനെ ഒട്ടേറെ തിളങ്ങുന്ന വിജയങ്ങള്‍ ഉമ്മു ഹബീബ കരസ്ഥമാക്കിയിട്ടുണ്ട്.
മാത്രമല്ല, മേലടി ഉപജില്ലാ മേളയില്‍ മലയാള പ്രസംഗത്തില്‍ ഫസ്‌റ്റ് എ ഗ്രേഡും ഈ കൊച്ചു മിടുക്കിക്കായിരുന്നു. ഒപ്പം കഥ (അറബിക്), അറബി ഗാനം, അറബിക് പദ്യം, ഖുര്‍ആന്‍ പാരായണം, മലയാള പ്രസംഗം എന്നീ ഇനങ്ങളിലും മത്സരിച്ചിരുന്നു.
