ഒരു പ്രത്യേക സംവിധായകന് വേണ്ടി തിരക്കഥ രചിക്കുമ്പോൾ ആ സംവിധായകന്‍റെ ശൈലിക്ക് അനുസരിച്ച് എഴുതാൻ തയ്യാറല്ലെന്ന് തിരക്കഥാകൃത്ത് എസ്എൻ സ്വാമി. ജോഷിയാണെങ്കിലും ഷാജി കൈലാസ് ആണെങ്കിലും കെ മധു ആണെങ്കിലും വ്യത്യസ്‌ത ശൈലിയിൽ സിനിമ ചെയ്യുന്നവരാണ്. അവരുടെ ആഖ്യാന രീതികളെ ചോദ്യം ചെയ്യാനും തിരുത്തുവാനും ഒരിക്കലും ശ്രമിച്ചിട്ടില്ല. താൻ എഴുതിയ തിരക്കഥ അവരുടെ കൈകളിലേക്ക് എത്തുമ്പോൾ എന്‍റെ തിരക്കഥയിൽ അവർക്ക് ഒരു സംശയം ഉണ്ടാകാതിരിക്കുക എന്നുള്ളത് മാത്രമാണ് ശ്രദ്ധിക്കാറുള്ളത്.
എങ്കിലും ചില കാര്യങ്ങളൊക്കെ ചില സംവിധായകർ ചോദിക്കും കൃത്യമായ മറുപടിയിലൂടെ സംശയനിവാരണം താൻ നടത്തുകയും ചെയ്യും. 'സീക്രട്ട്' എന്ന ആദ്യ സംവിധാന സംരംഭത്തിന് ഒരുങ്ങുന്ന മലയാളത്തിന്‍റെ ഹിറ്റ് തിരക്കഥാകൃത്ത് എസ്എൻ സ്വാമി ഇടിവി ഭാരതത്തിന് അനുവദിച്ച അഭിമുഖത്തിൽ ആണ് തന്‍റെ സിനിമ കരിയർ വിശേഷങ്ങൾ തുറന്നുപറഞ്ഞത്. തന്‍റെ എക്കാലത്തെയും വിഖ്യാത കഥാപാത്രം സാഗർ ഏലിയാസ് ജാക്കി രണ്ടാമതും എഴുതേണ്ടി വന്നു.
ആദ്യഭാഗമായ ഇരുപതാം നൂറ്റാണ്ടിനോട് കൃത്യമായി നീതിപുലർത്താൻ ആ ചിത്രത്തിന് സാധിച്ചിട്ടില്ല. തന്‍റെ തിരക്കഥയിൽ നിന്ന് ധാരാളം മാറ്റങ്ങൾ വരുത്തിയാണ് സംവിധായകൻ അമൽ ആ സിനിമ ചിത്രീകരിച്ചത്. സംവിധായകർക്ക് അതിനുള്ള സ്വാതന്ത്ര്യമുണ്ട്. നിർദേശങ്ങളും ഡയലോഗുകളും മാത്രമാണല്ലോ ഒരു തിരക്കഥാകൃത്ത് സംവിധായകൻ കൊടുക്കുക. അതെങ്ങനെ ചിത്രീകരിക്കണം എന്നുള്ളത് സംവിധായകന്‍റെ മാത്രം തീരുമാനമാണെന്നും എസ്എൻ സ്വാമി പറഞ്ഞു.
സാഗർ ഏലിയാസ് ജാക്കി സ്റ്റൈലിഷ് ചിത്രമായിരുന്നെങ്കിലും ആത്മസംതൃപ്‌തി തന്നില്ല. പുതിയ സിനിമയായ സീക്രട്ട് സ്വയം സംവിധാനം ചെയ്യാൻ ചില ഘടകങ്ങളുണ്ട്. ലോക സിനിമയിൽ തന്നെ ഇതുപോലെ ഒരു ആശയം ഇതിനുമുമ്പ് ചർച്ച ചെയ്‌തിട്ടില്ല. അത്രയും വ്യത്യസ്‌തമായ ഒരു ആശയം മനസിൽ ഉദിക്കുമ്പോൾ അത് കൃത്യമായി പേപ്പറിൽ പകർത്തുക എന്നുള്ളതിനു ചില പരിമിതികൾ ഉള്ളതായി തോന്നി. പക്ഷേ അതൊക്കെ ചിത്രീകരിക്കണമല്ലോ.
മറ്റൊരു സംവിധായകനെ പറഞ്ഞു മനസിലാക്കുന്നതിലും ഭേദം സ്വയം സംവിധാനം ചെയ്യുന്നതാണെന്ന് കരുതിയെന്ന് എസ്എൻ സ്വാമി ഇടിവി ഭാരതിനോട് പറഞ്ഞു. സിനിമ കാണുന്നതും പുസ്‌തകങ്ങൾ വായിക്കുന്നതും ആണ് പ്രധാന ഹോബി. സിനിമ തന്‍റെ ആഹാരം ആണ്. സോഷ്യൽ മീഡിയയൊക്കെ വന്നശേഷം ധാരാളം ആൾക്കാർ തിരിച്ചറിയുന്നുണ്ടെന്നും അദ്ദേഹം പറഞ്ഞു. എന്നാൽ ആരും തിരിച്ചറിയാതെ സാധാരണക്കാരനായി ജീവിക്കാനാണ് ആഗ്രഹമെന്നും അദ്ദേഹം കൂട്ടിച്ചേർത്തു.
ഇനി ജനങ്ങൾ തിരിച്ചറിഞ്ഞതുകൊണ്ടും പ്രശ്‌നമൊന്നുമില്ല. ആദ്യം മുതലേ സ്‌കൂട്ടറിൽ തന്നെയാണ് യാത്ര. ലളിത ജീവിതം നയിക്കുന്നു എന്ന് ബോധിപ്പിക്കാൻ ഒന്നുമല്ല. എറണാകുളം നഗരത്തിലെ ട്രാഫിക് ബ്ലോക്കിൽ നിന്ന് രക്ഷപ്പെടാൻ സ്‌കൂട്ടറാണ് നല്ലതെന്ന് തോന്നി. കാലത്തിനനുസരിച്ച് തന്നിലെ കലാകാരനെ അപ്ഡേറ്റ് ചെയ്യാൻ ശ്രമിക്കാറൊക്കെയുണ്ട്.
ടെക്‌നിക്കലി ഞാൻ അൽപം പിന്നോട്ടാണെങ്കിലും എഴുത്തിൽ അങ്ങനെ പിന്നോട്ട് പോകാൻ സാധ്യമല്ല. പിന്നെ അപ്ഡേഷൻ എന്ന് പറയുന്നത് ഒരാശയം എങ്ങനെ അവതരിപ്പിക്കുന്നു എന്നതിൽ മാത്രം ബന്ധപ്പെട്ട് കിടക്കുന്ന വസ്‌തുതയാണ്. ഇപ്പോൾ സങ്കടം എന്ന് പറയുന്ന വികാരം അന്നും ഇന്നും ഒരുപോലെ തന്നെ. സങ്കടം സിനിമയിൽ എങ്ങനെ ആവിഷ്‌കരിക്കുന്നു എന്നുള്ളത് മാത്രമാണ് മാറുന്നതെന്നും അദ്ദേഹം പറഞ്ഞു.
അങ്ങനെയുള്ള മാറ്റങ്ങൾ ശ്രദ്ധിക്കാറുണ്ട്. മികച്ച ഇൻവെസ്റ്റിഗേറ്റീവ് ത്രില്ലറുകൾ മലയാളത്തിന് സമ്മാനിച്ച തിരക്കഥാകൃത്തിന് ഏത് ജോണർ സിനിമകൾ എഴുതാനാണ് ആഗ്രഹം എന്ന് ചോദിച്ചാൽ ഒരു പ്രത്യേക ജോണർനോടും ആഭിമുഖ്യം ഇല്ല എന്നാണ് മറുപടി. ഏത് സാഹചര്യങ്ങളുള്ള കഥയും എഴുതും. നിർബന്ധ ബുദ്ധിയോട് കൂടി സിനിമയെ സമീപിച്ചാൽ പരാജയമാകും ഫലമെന്നും എസ്എൻ സ്വാമി പറഞ്ഞു.
വിജയചിത്രങ്ങളെക്കുറിച്ച് സംസാരിക്കുമ്പോഴും തന്‍റെ എത്രയോ ചിത്രങ്ങൾ തിയറ്ററിൽ പരാജയപ്പെട്ടിട്ടുണ്ട്. അതിൽ ആരെയും കുറ്റപ്പെടുത്താൻ സാധിക്കില്ല. സിനിമയുടെ പരാജയം പല കാര്യങ്ങൾ കൊണ്ടാണ്. ഒരു വ്യക്തിയിൽ മാത്രം അധിഷ്‌ഠിതമല്ല സിനിമയുടെ പരാജയം. എല്ലാവരും മനുഷ്യരല്ലേ തെറ്റുപറ്റും. ചിലപ്പോൾ എഴുതിവയ്ക്കുന്ന കഥാപാത്രത്തെ മികച്ച രീതിയിൽ ഒരു നടൻ സ്ക്രീനിൽ അവതരിപ്പിച്ചില്ലെങ്കിൽ, എഴുതിവെച്ചിരിക്കുന്ന ഒരു സീൻ അർത്ഥവത്തായ രീതിയിൽ ചിത്രീകരിച്ചില്ലെങ്കിൽ സിനിമയുടെ പരാജയത്തിന് അങ്ങനെ നിരവധി കാരണങ്ങളാണ്.
Also Read: 'സിബിഐ 6' വരുന്നു? അപസർപ്പക കഥകളുടെ തോഴൻ എസ് എൻ സ്വാമി മനസുതുറക്കുന്നു
മുൻവിധിയോടുകൂടി തിരക്കഥകൾ എഴുതാറില്ല. ഈയൊരു സിനിമ തിയേറ്ററിൽ വലിയ വിജയമാകണം, ഈ സീനിന് തിയേറ്ററിൽ വലിയ കൈയ്യടി കിട്ടണം, പിൽക്കാലത്ത് ഈ സിനിമ ജനങ്ങൾ വീണ്ടും വീണ്ടും കാണണം അങ്ങനെയൊന്നും മനസിൽ കണ്ട് തിരക്കഥ എഴുതുക സാധ്യമല്ല. കഥയുടെ ഒഴുക്കിനനുസരിച്ച് എഴുതി പോകുന്നതാണ് ശരിയായ മാർഗമെന്നും അദ്ദേഹം പറഞ്ഞു.
ഒരുപാട് തിരക്കഥാകൃത്തുക്കൾക്കും സംവിധായകർക്കും തെറ്റ് പറ്റുന്നതും ഈ ഒരു മേഖലയിലാണ്. മുൻ വിജയങ്ങൾ പുതിയ തിരക്കഥ എഴുതുമ്പോൾ അവരെ തെറ്റായ രീതിയിൽ സ്വാധീനിക്കുന്നതാണ് കുഴപ്പമെന്നും എഴുത്തുകാരനായ എസ് എൻ സ്വാമി പറഞ്ഞു.
