പത്തനംതിട്ടയില്‍ കാറിനു തീ പിടിച്ചു (ETV Bharat)
പത്തനംതിട്ട: റാന്നി തെക്കേപ്പുറത്ത് ഓടിക്കൊണ്ടിരുന്ന കാറിന് തീപിടിച്ചു. കാർ ഓടിച്ച യുവതിയുടെ സമയോചിതമായ ഇടപെടൽ മൂലം വൻ ദുരന്തം ഒഴിവായി. മാരുതി സെന്‍ കാര്‍ പൂർണ്ണമായും കത്തി നശിച്ചെങ്കിലും യുവതി പരിക്കേൽക്കാതെ രക്ഷപ്പെട്ടു.
സംഭവ സമയത്ത് യുവതി മാത്രമായിരുന്നു കാറിലുണ്ടായിരുന്നത്. കാറിൽ നിന്നും പുക ഉയരുന്നത് കണ്ട് യുവതി കാർ റോഡരികിൽ നിർത്തി പുറത്തിറങ്ങി. ഉടൻ തന്നെ കാറിനു തീ പടർന്ന് പിടിച്ചു.
കൃത്യസമയത്ത് യുവതി കാറിന് പുറത്തിറങ്ങിയതിനാലാണ് വലിയ ദുരന്തം ഒഴിവായത്. അഗ്നിരക്ഷാ സേനയെത്തിയാണ് തീ അണച്ചത്. ഷോര്‍ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.
