തിരുവനന്തപുരം: 2026 ലെ നിയമസഭാ തെരഞ്ഞെടുപ്പില്‍ അധികാരം തിരിച്ചു പിടിക്കാന്‍ വഴി തേടുന്ന കോണ്‍ഗ്രസിന് പിടിവള്ളിയാകുകയാണ് എന്എസ്എസ്, എസ്എന്‍ഡിപി സാമുദായിക സംഘടനകളുടെ അപ്രതീക്ഷിത പിന്തുണ. അടുത്ത വര്‍ഷം ജനുവരി രണ്ടിനു ചങ്ങനാശേരി എന്എസ്എസ് ആസ്ഥാനത്തു നടക്കുന്ന മന്നം ജയന്തി ആഘോഷങ്ങളില്‍ മുഖ്യാതിഥിയായി മുന്‍ പ്രതിപക്ഷ നേതാവ് രമേശ് ചെന്നിത്തലയ്ക്കു ക്ഷണം ലഭിച്ചതിനു പിന്നാലെ എസ്‌എന്‍ഡിപിയുടെ വൈക്കം യൂണിയന്‍ ശിവഗിരിയിലേക്കു നടത്തുന്ന പദയാത്രയുടെ ഉദ്ഘാടകനായും ചെന്നിത്തലയ്ക്കു സ്വീകരണം ലഭിച്ചിരിക്കുകയാണ്.
ഇതോടെ 2026ലെ നിയമസഭാ തെരഞ്ഞെടുപ്പില്‍ കോണ്‍ഗ്രസിന്‍റെ മുഖ്യമന്ത്രി ആരായിരിക്കണം എന്നതു സംബന്ധിച്ച് കേരളത്തിലെ രണ്ടു സുപ്രധാന സംഘടനകളുടെ സന്ദേശം പരസ്യമായതു പ്രതിപക്ഷ നേതാവ് വിഡി സതീശനു കനത്ത പ്രഹരമായി. വിഡി സതീശന്‍ പ്രതിപക്ഷ നേതാവായതു മുതല്‍ കോണ്‍ഗ്രസിനോട് കടുത്ത അതൃപ്‌തി പരസ്യമാക്കിയിരുന്ന രണ്ടു സാമുദായിക സംഘടനകളാണ് യുഡിഎഫിന്‍റെ കേരളത്തിലെ നേതാവായ വിഡി സതീശനു ശക്തമായ താക്കീതു നല്‍കുന്നത് എന്നതും ശ്രദ്ധേയമാണ്. രമേശ് ചെന്നിത്തലയുടെ കീഴില്‍ നിന്ന് പ്രതിപക്ഷ നേതാവായതിനു പിന്നാലെ കോണ്‍ഗ്രസിലെയും യുഡിഎഫിലെയും ഒന്നാമന്‍ താനാണെന്നു വരുത്താന്‍ വിഡി സതീശന്‍ നടത്തി വന്നിരുന്ന ശ്രമങ്ങള്‍ക്ക് ഈ സംഘടനകളുടെ പുതിയ നീക്കം തെല്ലൊന്നുമല്ല തിരിച്ചടി നല്‍കുന്നത്.
2026ല്‍ കോണ്‍ഗ്രസ് അധികാരത്തിലേക്കു തിരിച്ചെത്തിയാല്‍ ആരായിരിക്കണം മുഖ്യമന്ത്രി എന്ന തങ്ങളുടെ വ്യക്തമായ ആശയം നായര്‍, ഈഴവ സംഘടനകള്‍ പരസ്യമാക്കുന്നതായിക്കൂടി വേണം പുതിയ നീക്കത്തെ വിലയിരുത്താന്‍. കെപിസിസി പ്രസിഡന്‍റ് കെ സുധാകരനെ അപ്രസക്തനാക്കി കോണ്‍ഗ്രസിലെ തന്‍റെ എതിരാളികളെ തന്നെ അപ്രസക്തനാക്കി 2026ലെ തെരഞ്ഞെടുപ്പ് നയിക്കാന്‍ സതീശന്‍ കോപ്പുകൂട്ടുന്നതിനിടയിലാണ് നായര്‍, ഈഴവ സംഘടനകള്‍ സതീശനു താക്കീതു നല്‍കിയിരിക്കുന്നതെന്നതും ഈ അവസരത്തില്‍ ശ്രദ്ധേയമാണ്.
പരിക്കു തിരിച്ചറിഞ്ഞ സതീശന്‍ അതിവേഗം അതു പരിഹരിക്കുന്നതിനുള്ള ശ്രമങ്ങള്‍ ആരംഭിച്ചു എന്നതാണ് ഇന്നത്തെ അദ്ദേഹത്തിന്‍റെ മാധ്യമങ്ങളോടുള്ള പ്രതികരണം സൂചിപ്പിക്കുന്നത്. ഒരു കോണ്‍ഗ്രസ് നേതാവ് എന്ന നിലയില്‍ സാമുദായിക നേതാക്കളുടെ തിണ്ണ നിരങ്ങാന്‍ തന്നെ കിട്ടില്ലെന്നും സാമുദായിക നേതാക്കള്‍ ഇരിക്കാന്‍ പറഞ്ഞാല്‍ കിടക്കുന്ന ആളല്ല താനെന്നുമുള്ള മുന്‍ പ്രസ്‌താവനകളില്‍ നിന്നു സതീശന്‍ പിന്നാക്കം വലിഞ്ഞു. എസ്എന്‍ഡിപിയുടെയും എന്‍എസ്എസിന്‍റെയും പുതു നീക്കം സംബന്ധിച്ച പ്രസ്‌താവനകള്‍ക്കു കരുതലോടെയായിരുന്നു ഇന്നു സതീശന്‍റെ പ്രതികരണം.
ഇരു സംഘടനകളുടെയും നേതാക്കള്‍ക്കെതിരെ മുന്‍പ് ഉയര്‍ത്തിയിരുന്ന വിമര്‍ശനത്തിന്‍റെ തരിമ്പും പ്രകടിപ്പിക്കാതിരുന്ന സതീശന്‍ ഇരു നേതാക്കളെയും പുകഴ്ത്തുകയായിരുന്നു എന്നതും ശ്രദ്ധേയം. വെള്ളാപ്പള്ളി നടേശന്‍ തന്നെ വിമര്‍ശിക്കാന്‍ സ്വാതന്ത്ര്യമുള്ള മുതിര്‍ന്ന നേതാവ് എന്നു വിശേഷിപ്പിച്ച സതീശന്‍, സുകുമാരന്‍ നായരുടെ പേരെടുത്തു പറഞ്ഞില്ലെങ്കിലും എന്എസ്എസ് നേതൃത്വം എന്നു പറഞ്ഞു ശബരിമല കാലത്തു സംഘപരിവാറിനെ അകറ്റി നിര്‍ത്തിയ കാര്യം പ്രത്യേകം എടുത്തു പറഞ്ഞു.
തന്നെ വിമര്‍ശിക്കാന്‍ ആര്‍ക്കും സ്വാതന്ത്യമുണ്ടെന്നും പ്രത്യേകം പരാമര്‍ശിച്ചു. പക്ഷേ ഇതൊന്നും ഇരു സംഘടനകളെയും അനുനയിപ്പിക്കാന്‍ പര്യാപ്‌തമാണെന്നു കരുതുക വയ്യ. ഇതോടെ കോണ്‍ഗ്രസില്‍ പൊതുവേയും യുഡിഎഫില്‍ പ്രത്യേകിച്ചും പ്രതിപക്ഷ നേതാവ് വിഡി സതീശനുള്ള മേല്‍ക്കൈ ക്രമേണ ഇല്ലാതാക്കുന്നതാണെന്ന വിലയിരുത്തല്‍ പൊതുവേ ഉണ്ട്. 2026ലെ നിയമസഭാ തെരഞ്ഞെടുപ്പില്‍ അധികാരത്തിലേക്ക് 10 വര്‍ഷത്തിനു ശേഷം തിരിച്ചെത്തുക എന്നതിന് അപ്പുറം മറ്റൊന്നും കോണ്‍ഗ്രസിനും യുഡിഎഫിനും മുന്നിലില്ല.
ഘടക കക്ഷികളെ സംബന്ധിച്ച് പ്രത്യേകിച്ചും മുസ്ലീം ലീഗിനെ സംബന്ധിച്ച് അധികാരമില്ലാത്ത മറ്റൊരു അഞ്ചു വര്‍ഷം അവര്‍ക്ക് അണികളെ പിടിച്ചു നിര്‍ത്താന്‍ നന്നേ ശ്രമകരമാകുമെന്നറിയാം. ഈ സാഹചര്യത്തില്‍ യുഡിഎഫുമായി അകന്നു നിന്ന രണ്ടു സാമുദായിക സംഘടനകള്‍ പൊടുന്നനെ കേരളത്തിലെ കോണ്‍ഗ്രസിന്‍റെ ഏറ്റവും മുതിര്‍ന്ന നേതാവിനെ ആലിംഗനം ചെയ്യുന്നതിന്‍റെ ആഹ്ളാദം ലീഗിനെ സംബന്ധിച്ചിടത്തോളം ചെറുതല്ല.
അതിനാല്‍ ഇനിയങ്ങോട്ട് ചെന്നിത്തലയെ ഉയര്‍ത്തിക്കാട്ടിയാകും ലീഗിന്‍റെയും ഭാവി പ്രവര്‍ത്തനങ്ങള്‍ എന്നതും വ്യക്തമാണ്. പ്രത്യേകിച്ചും പിരണിത പ്രജ്ഞനായ കുഞ്ഞാലിക്കുട്ടിക്ക് ഇക്കാര്യത്തില്‍ വ്യക്തമായ കാഴ്‌ചപ്പാടുണ്ടാകും എന്നതുറപ്പ്. സതീശന്‍ പ്രതിപക്ഷ നേതാവായ ശേഷം രമേശ് ചെന്നിത്തലയെ മാത്രമല്ല, മുതിര്‍ന്ന പല നേതാക്കള്‍ക്കും അര്‍ഹിക്കുന്ന ബഹുമതി നല്‍കുന്നില്ല എന്നൊരു പ്രതീതി കോണ്‍ഗ്രസില്‍ പൊതുവേയുണ്ട്.
നേരത്തെ ശശി തരൂരിനെ ലീഗിന്‍റെയും എന്‍എസ്എസിന്‍റെയും പരിപാടികളില്‍ പങ്കെടുപ്പിച്ചതിനെതിരെ സതീശന്‍ രംഗത്തു വന്നിരുന്നു. എന്നാല്‍ ചെന്നിത്തലയും മുരളീധരനും ഉള്‍പ്പെടെയുള്ള സതീശന്‍ വിരുദ്ധര്‍ ശശി തരൂരിനു ശക്തമായ പിന്തുണ നല്‍കിയപ്പോള്‍ സതീശന്‍റെ നീക്കങ്ങള്‍ക്കു തിരിച്ചടിയേല്‍ക്കുകയായിരുന്നു. പക്ഷേ ശശി തരൂരല്ല രമേശ് ചെന്നിത്തല.
കെഎസ്‌യു സംസ്ഥാന പ്രസിഡന്‍റ്, യൂത്ത് കോണ്‍ഗ്രസ് സംസ്ഥാന പ്രസിഡന്‍റ്, അഖിലേന്ത്യ പ്രസിഡന്‍റ്, എഐസിസി പ്രവര്‍ത്തക സമിതി അംഗം, കെപിസിസി പ്രസിഡന്‍റ് ഈ നിലകളില്‍ രമേശിന്‍റെ ബഹുജന ബന്ധം ആഴത്തിലുള്ളതാണ്. ഇത്തരം പദവികളിലൊന്നുമില്ലാത്ത സതീശനെ സംബന്ധിച്ചിടത്തോളം ചെന്നിത്തലയോളം ഇക്കാര്യത്തിലെത്തുക എളുപ്പവുമല്ല. മാത്രമല്ല, മുഖ്യമന്ത്രി പദം മാത്രം ലക്ഷ്യമിട്ടുള്ള കഴിഞ്ഞ മൂന്നേ മുക്കാല്‍ വര്‍ഷത്തെ പ്രവര്‍ത്തനങ്ങള്‍ക്കിടയിലും ഒരു ബഹുജന നേതാവിലേക്കു വളരാന്‍ സതീശനായില്ലെന്നതും പരാജയമായി.
സഹപ്രവര്‍ത്തകരെ കേള്‍ക്കുന്നതില്‍ സഹിഷ്‌ണുതയില്ലെന്ന ശക്തമായ വിമര്‍ശനം അടുത്ത സഹപ്രവര്‍ത്തകരില്‍ നിന്നു പോലും സതീശനെതിരെ ഉയര്‍ന്നു. താഴെത്തട്ടില്‍ പാര്‍ട്ടിയെ ചലിപ്പിക്കുന്നതില്‍ കെപിസിസി പ്രസിഡന്‍റിനോടൊപ്പം തോള്‍ ചേര്‍ന്നു നില്‍ക്കുന്നതിന് ഒപ്പം സുധാകരന്‍റെ ആശയങ്ങളെ പലതിനെയും തുരങ്കം വയ്ക്കാനായിരുന്നു സതീശന്‍റെ ശ്രമം എന്ന അതിശക്തമായ വിമര്‍ശനവും സതീശനെതിരെയുണ്ട്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
പാര്‍ട്ടിയെ അടിത്തട്ടില്‍ ശക്തമാക്കുന്നതിനു ലക്ഷ്യമിട്ട് സുധാകരന്‍ ആവിഷ്‌കരിച്ച കോണ്‍ഗ്രസ് യൂണിറ്റ് കമ്മിറ്റി(സിയുസി) എന്ന ആശയവും സെമി കേഡര്‍ ആശയവും സതീശന്‍ തകര്‍ക്കാന്‍ ശ്രമിച്ചു. ഒരുപക്ഷേ ഇതു രണ്ടും ശക്തമായിരുന്നെങ്കില്‍ കേരളത്തിലെ കോണ്‍ഗ്രസ് താഴെ തട്ടില്‍ സംഘടനാപരമായി ശക്തമാകുമായിരുന്നു എന്ന അഭിപ്രായം പല തട്ടിലുള്ള കോണ്‍ഗ്രസ് നേതാക്കള്‍ക്കിടയിലുണ്ട്.
കോണ്‍ഗ്രസിലെ പ്രബലരായ കെ മുരളീധരന്‍, ശശി തരൂര്‍, കെ സുധാകരന്‍ എന്നിവരും ചെന്നിത്തലയ്ക്കു പിന്നിലുണ്ട്. കാര്യങ്ങള്‍ മനസിലായ സ്ഥിതിക്ക് 2026ല്‍ അധികാരം മാത്രം ലക്ഷ്യം വയ്ക്കുന്ന ഘടകകക്ഷികളും ഇനി സതീശനെ കൈവിടുമെന്ന കാര്യം ഉറപ്പാണ്.
