ശ്രേഷ്‌ഠ ബാവയ്‌ക്ക് വിട നല്‍കാന്‍ വിശ്വാസി പ്രവാഹം; കബറടക്കത്തിന് ഒരുക്കങ്ങൾ പൂർണം

ബാവയ്ക്ക് അന്ത്യാഞ്ജലി അർപ്പിച്ചത് കേന്ദ്രമന്ത്രി സുരേഷ് ഗോപി, നടൻ മമ്മൂട്ടി എന്നിവരുൾപ്പെടെ നിരവധി പ്രമുഖർ

എറണാകുളം: യാക്കോബായ സുറിയാനി സഭയുടെ അന്തരിച്ച കാതോലിക്ക ബസേലിയോസ് തോമസ് പ്രഥമൻ ബാവയുടെ സംസ്‌കാരം ഇന്ന്. പുത്തൻ കുരിശ് പാത്രിയാർക്ക സെൻ്ററിലെത്തി നിരവധിയാളുകളാണ് ബാവയ്ക്ക് അന്തിമോപചാരം അർപ്പിച്ചത്. കേന്ദ്ര സഹമന്ത്രി സുരേഷ് ഗോപി, നടൻ മമ്മൂട്ടി ഉൾപ്പെടെ നിരവധി പ്രമുഖരാണ് ബാവയ്ക്ക് അന്ത്യാഞ്ജലി അർപ്പിച്ചത്.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

വിശ്വാസികൾ ഉൾപ്പടെ സമൂഹത്തിൻ്റെ നാനാ തുറകളിൽപ്പെട്ട നൂറുകണക്കിനാളുകളാണ് ബാവയെ അവസാനമായി ഒരു നോക്കു കാണാനായി എത്തിക്കൊണ്ടിരിക്കുന്നത്. പുത്തൻകുരിശ് വഴിയുള്ള വാഹന ഗതാഗതത്തിന് നിയന്ത്രണമേർപ്പെടുത്തിയിട്ടുണ്ട്.

വ്യാഴാഴ്‌ച അന്തരിച്ച ബാവയുടെ ഭൗതിക ശരീരം കൊച്ചിയിലെ സ്വകാര്യ ആശുപത്രിയിൽ നിന്ന് വെള്ളിയാഴ് പുലർച്ചെയാണ് കോതമംഗലം ചെറിയ പള്ളിയിൽ എത്തിച്ചത്. തുടർന്ന് അവിടെ പൊതുദർശനത്തിന് വെച്ചു. വെള്ളിയാഴ്‌ച രാവിലെ പത്തരയോടെയാണ് സംസ്‌കാര ശുശ്രൂഷയുടെ പ്രാരംഭ നടപടികൾ ആരംഭിച്ചത്.

ഉച്ച നമസ്‌കാരം കഴിഞ്ഞ് ഒരു മണിക്ക് കോതമംഗലം ചെറിയ പള്ളിയിൽ നിന്ന് വലിയ പള്ളിയിൽ മൃതദേഹം എത്തിച്ചു. നാല് മണിക്ക് കോതമംഗലം വലിയ പള്ളിയിൽ നിന്ന് മൂവാറ്റുപുഴ വഴി പുത്തൻകുരിശ് പാത്രിയർക്കാ സെൻ്ററിൽ ഭൗതിക ശരീരം എത്തിച്ചു.

ഇന്ന് രാവിലെ എട്ട് മണിക്ക് പാത്രിയർക്കാ സെൻ്റർ മോർ അത്തനേഷ്യസ് കത്തീഡ്രലിൽ കുർബാന നടന്നു. ഇന്ന് മൂന്ന് മണിക്ക് കബറടക്ക ശുശ്രൂഷയുടെ സമാപന ശുശ്രുഷകൾ ആരംഭിക്കും. ബാവായുടെ വിയോഗത്തിൽ പള്ളികളിലും സ്ഥാപനങ്ങളിലും 14 ദിവസത്തെ ദുഃഖാചരണവും പ്രഖ്യാപിച്ചിട്ടുണ്ട്.

യാക്കോബായ സുറിയാനി സഭയുടെ കാതോലിക്ക ബസേലിയോസ് തോമസ് പ്രഥമൻ ബാവാ (95) വ്യാഴാഴ്‌ച വൈകുന്നേരമാണ് അന്തരിച്ചത്. കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അന്ത്യം. വാർധക്യസഹചമായ അസുഖങ്ങളെ തുടർന്ന് കഴിഞ്ഞ ആറുമാസത്തിലേറെയായി ചികിത്സയിലായിരുന്നു. വൈകുന്നേരം 5:21ന് മരണം സംഭവിച്ചതായി സഭാ നേതൃത്വം അറിയിക്കുകയായിരുന്നു.

തുടർന്ന് സഭയുടെ അടിയന്തിര സിനഡ് ചേർന്ന് കബറടക്ക സമയം ഉൾപ്പെടെ തീരുമാനിച്ചു. ആരോഗ്യകരമായ കാരണങ്ങളെത്തുടർന്ന് ബസേലിയോസ് തോമസ് പ്രഥമൻ ബാവാ 2019 മെയ് മാസം സഭയുടെ ഭരണപരമായ ചുമതലകളിൽ നിന്നും ഒഴിവായിരുന്നു. എന്നാൽ ആത്മീയ നേതൃത്വം നൽകിവരികയായിരുന്നു.

ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക

മലങ്കര സഭാ പ്രശ്‌നത്തിൽ യാക്കോബായ സുറിയാനി സഭയെ മുന്നിൽനിന്ന് നയിച്ച ആത്മീയ നേതാവു കൂടിയായിരുന്നു അദ്ദേഹം. 1929 ജൂലൈ 22 ജനിച്ച തോമസ് പ്രഥമൻ ബാവ 1958 ൽ വൈദിക പട്ടം സ്വീകരിച്ചു. 1974ൽ അങ്കമാലി ഭദ്രാസാധിപനായി.

2002 ലാണ് കാതോലിക്കാ ബാവയായത്. തുടർന്നിങ്ങോട്ട് യാക്കോബായ സഭയെ നയിച്ചുവരികയായിരുന്നു. സാമൂഹ്യ, സാംസ്‌കാരിക, ജീവകാരുണ്യ പ്രവർത്തനങ്ങളിലും സജീവമായിരുന്നു അദ്ദേഹം.