കണ്ണൂര്‍ : പഴയ മൊയ്‌തുപാലത്തിന്‍റെ ബലപരിശോധന ഫലം അനുകൂലമെന്ന് റിപ്പോർട്ട്. ഈ പാലം ഉപയോഗപ്പെടുത്തി ടൂറിസം സര്‍ക്യൂട്ടിന് ആരംഭം കുറിക്കുന്നതിന്‍റെ ഭാഗമായി കഴിഞ്ഞ സെപ്‌റ്റംബറിൽ ബലപരിശോധന നടത്തിയിരുന്നു. ധര്‍മ്മടം പുഴയ്ക്ക് കുറുകേയുള്ള മൊയ്‌തുപാലത്തിന് സമാന്തരമായി പുതിയ പാലം നിര്‍മിച്ചതിനെ തുടര്‍ന്ന് ഏറെക്കാലമായി ഈ പാലം ഉപയോഗിക്കാതെ കിടക്കുകയായിരുന്നു.
വിനോദസഞ്ചാരം മുന്‍നിര്‍ത്തി പാലത്തിന്‍റെ വികസന സാധ്യത ഉപയോഗിക്കാന്‍ തീരുമാനിച്ചതോടെ പാലത്തിന്‍റെ മുകളില്‍ മണല്‍ചാക്കുകള്‍ നിറച്ച് ഭാരപരിശോധന നടത്തിയിരുന്നു. കേരള ഹൈവേ റിസേര്‍ച്ച് ഇന്‍സ്‌റ്റിറ്റ്യൂട്ടിലെ സാങ്കേതിക വിദഗ്‌ധരാണ് പാലത്തിന്‍റെ ബലപരിശോധന നടത്തിയത്.
1930ല്‍ നിര്‍മാണം പൂര്‍ത്തിയാക്കിയ മൊയ്‌തുപാലത്തിലൂടെ ഗതാഗതം നടത്തുന്നത് അപകടം വരുത്തുമെന്ന നിര്‍ദേശത്തെ തുടര്‍ന്നാണ് സമാന്തരമായി പുതിയ പാലം നിര്‍മിക്കപ്പെട്ടത്. നാളിതുവരെ ഉപയോഗിക്കാതെ കിടക്കുകയായിരുന്ന പാലത്തില്‍ ഇരുമ്പ് ഗേഡറുകളും ബാറുകളും കേടുപാടുകള്‍ സംഭവിക്കാതെ കിടക്കുകയാണ്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ബലപരിശോധന നടത്തുമ്പോള്‍ ഓരോ സ്‌പാനുകളിലും 2,200 ചാക്ക് മണല്‍ നിരത്തിയിരുന്നു. പാലത്തിന് കാര്യമായ ക്ഷതം സംഭവിച്ചിട്ടില്ലെന്നാണ് റിപ്പോര്‍ട്ട്. അതേസമയം ഹൈവേ റിസേര്‍ച്ച് ഇന്‍സ്‌റ്റിറ്റ്യൂട്ട് പൊതുമരാമത്ത് വകുപ്പിനും റിപ്പോര്‍ട്ട് കൈമാറിയെന്നാണ് വിവരം.
ഔദ്യോദികമായി ഉടന്‍ തന്നെ പാലത്തിന്‍റെ വിനോദസഞ്ചാര വികസനത്തെക്കുറിച്ച് റിപ്പോര്‍ട്ട് വരും. അതോടെ ഈ പാലത്തിലൂടെയുള്ള വിനോദ സഞ്ചാര സാധ്യതകളെക്കുറിച്ച് പഠനം നടത്തും. നടപ്പുസാമ്പത്തിക വര്‍ഷത്തില്‍ തന്നെ പാലത്തിന്‍റെ വികസനത്തിന് തുടക്കമിട്ടേക്കും.
Also Read: റെയില്‍വേയുടെ എഞ്ചിനീയറിങ് മികവിന്‍റെ പ്രതീകം; കരുത്തു തെളിയിച്ച് പുതിയ പാമ്പന്‍ പാലം
