തിരുവനന്തപുരം: ഗവർണറുടെ വിഡ്ഢി വേഷം കേന്ദ്ര സർക്കാരിന്‍റെ പൂർണ പിന്തുണയോടെയാണെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ. ഗവർണർ ബാഹ്യമായ ഇടപെടൽ ഭരണഘടനയിൽ നടത്തുകയാണ് (CPM Leader MV Govindan Slams Kerala Governor). ഗവർണർ സാധാരണ പ്രവർത്തിക്കും പോലെ അല്ല പ്രവർത്തിക്കുന്നത് എസ് എഫ് ഐ പ്രവർത്തകർ വണ്ടിക്ക് അടിച്ചു എന്നത് ശുദ്ധ കളവെന്ന് മാധ്യമങ്ങൾ തന്നെ വ്യക്തമാക്കിയെന്നും പ്രതിഷേധക്കാർ വാഹനത്തിന് അടുത്ത് പോലും എത്തിയിരുന്നില്ലെന്ന് ദൃശ്യങ്ങളിൽ നിന്നടക്കം വളരെ വ്യക്തമാണെന്നും എം വി ഗോവിന്ദൻ പറഞ്ഞു.
മറ്റ് ചില ഉദ്ദേശങ്ങളുമായി കെട്ടുന്ന വിഡ്ഢി വേഷം കേരളത്തിൽ ഏശില്ല. തെറ്റായ ഒരു പ്രവണതയും അംഗീകരിക്കില്ലെന്നും അദ്ദേഹം പറഞ്ഞു. എക്‌സ് പോയാല്‍ വൈ വരും. ഗവർണറെ തിരികെ വിളിക്കണമെന്ന് ആവശ്യപ്പെടുന്നില്ല. തിരിച്ച് വിളിക്കുന്ന കാര്യത്തിൽ രാഷ്ട്രീയ തീരുമാനം വരണം. ഇതുപോലുളള ആർഎസ്എസുകാരനാകും ചിലപ്പോൾ ഇനിയും വരുന്നതെന്നും എം വി ഗോവിന്ദൻ പറഞ്ഞു പരിഹസിച്ചു.
സിആർപിഎഫ് വന്നത് കൊണ്ട് ആരും ഗവർണർക്കെതിരായ പ്രതിഷേധം അവസാനിക്കില്ല. പ്രഖ്യാപിച്ച പ്രതിഷേധങ്ങളെല്ലാം ആര് വന്നാലും നടക്കും. കേന്ദ്ര സുരക്ഷ ഏർപ്പെടുത്തുന്നതിൽ മാത്രമല്ല ഒന്നിലും നടപടിക്രമം പാലിച്ചിട്ടില്ലെന്നും, നിയമപ്രകാരമെങ്കിൽ ഗവർണർ ഇങ്ങനെ പെരുമാറുമോയെന്നും എം വി ഗോവിന്ദൻ ചോദിച്ചു.
