എറണാകുളം : ഇത്തവണത്തെ സംസ്ഥാന സ്‌കൂൾ കായികമേള ഒളിമ്പിക്‌സ് മാതൃകയിൽ. കായികമേള എറണാകുളം ജില്ലയിലും സംസ്ഥാന സ്‌കൂൾ കലോത്സവം തിരുവനന്തപുരം ജില്ലയിലും സംഘടിപ്പിക്കുമെന്ന് വിദ്യഭ്യാസ മന്ത്രി വി.ശിവൻകുട്ടി അറിയിച്ചു. കേരളം എപ്പോഴും രാജ്യത്തെ മറ്റ് സംസ്ഥാനങ്ങൾക്ക് മാതൃകയാണെന്നും മന്ത്രി പറഞ്ഞു.
കേരള സ്‌കൂൾ ഒളിമ്പിക്‌സ് കൊച്ചി ട്വന്‍റി ഫോർ എന്ന പേരിൽ നവംബർ 4 മുതൽ 11 വരെയാണ് സംഘടിപ്പിക്കുന്നത്. സംസ്ഥാന സ്‌കൂൾ കായികോത്സവം ഓരോ നാല് വർഷം കൂടുമ്പോഴും ഒളിമ്പിക്‌സ് മാതൃകയിൽ നടത്തുന്നതാണ്. രാജ്യത്ത് ആദ്യമായാണ് സ്‌കൂൾ കായികോത്സവം ഒളിമ്പിക്‌സ് മാതൃകയിൽ സംഘടിപ്പിക്കുന്നത്. സവിശേഷ പരിഗണന അർഹിക്കുന്ന കുട്ടികൾക്കുവേണ്ടി രാജ്യത്ത് ആദ്യമായി ഇൻക്ലൂസീവ് സ്‌പോർട്‌സ് കായികോത്സവത്തിന്‍റെ ഭാഗമായി ഈ വർഷം അതിന് ആരംഭം കുറിക്കുമെന്നും വിദ്യാഭ്യാസ മന്ത്രി അറിയിച്ചു.
സ്‌കൂൾ ഒളിമ്പിക്‌സിൽ അണ്ടർ, ഫോർട്ടീൻ, സെവന്‍റീൻ, നൈന്‍റീൻ എന്നീ കാറ്റഗറികളിൽ 41 കായിക ഇനങ്ങളിൽ ആൺകുട്ടികളും പെൺകുട്ടികളുമായി 24,000 കായിക പ്രതിഭകൾ മത്സരിക്കുന്നു. ഏഴ് ദിവസം പകലും രാത്രിയുമായി നടക്കുന്ന കേരള സ്‌കൂൾ ഒളിമ്പിക്‌സിൽ പതിനായിരത്തോളം മത്സരങ്ങളാണ് നടക്കുന്നത്. ഇത് ലോകത്തിലെ ഏറ്റവും വലിയ കൗമാര കായിക മേള ആയിരിക്കും. ആധുനിക യുഗത്തിൽ ജാതി, മത, വർണങ്ങൾക്കതീതമായി മാനവ മൂല്യങ്ങൾ ഉയർത്തിപ്പിടിച്ച് മനുഷ്യരെ കൂട്ടിയോജിപ്പിക്കുന്ന മഹത്തായ സന്ദേശം ഉൾക്കൊള്ളുന്ന ലോകത്തിലെ ഏറ്റവും വലിയ കായിക ഉത്സവമാണ് ഒളിമ്പിക്‌സ്.
ഒളിമ്പിക്‌സിനെ വരവേൽക്കുന്നതിനും ഒളിമ്പിക്‌സിന്‍റെ പ്രാധാന്യം വിദ്യാർഥികളെ അറിയിക്കുന്നതിനുമായി ജൂലൈ 27ന് രാവിലെ 09.30ന് എല്ലാ സ്‌കൂളുകളിലും സ്‌പെഷ്യൽ അസംബ്ലി സംഘടിപ്പിക്കും. കൂടാതെ എല്ലാ വിദ്യാലയങ്ങളിലും സ്‌കൂൾ ഒളിമ്പിക്‌സ് പ്രഖ്യാപന ദീപശിഖ തെളിയിക്കും.
63ാമത് കേരള സ്‌കൂൾ കലോത്സവം: കലാകേരളത്തിന്‍റെ ഏറ്റവും വലിയ പ്രദർശന മാമാങ്കമായ 63ാമത് കേരള സ്‌കൂൾ കലോത്സവം 2024 ഡിസംബർ 03 മുതൽ 07 വരെ തിരുവനന്തപുരത്ത് വച്ച് നടത്താൻ തീരുമാനിച്ചു. 24 വേദികളിലായിട്ടാണ് മത്സരങ്ങൾ നടക്കുന്നത്. സംസ്‌കൃതോത്സവവും, അറബിക് സാഹിത്യോത്സവവും ഇതോടനുബന്ധിച്ച് നടക്കും. 2015ലാണ് അവസാനമായി തിരുവനന്തപുരത്ത് വച്ച് സംസ്ഥാന കലോത്സവം നടന്നത്.
കേരളത്തിനകത്തും പുറത്തുനിന്നുമുള്ള 350തോളം പ്രഗത്ഭരായ വ്യക്തികളെയാണ് വിധി നിർണയത്തിന് കണ്ടെത്തുന്നത്. വിധി കർത്താക്കളുടെ വിധിനിർണയത്തിനെതിരെ തർക്കം ഉന്നയിക്കുന്ന ഘട്ടത്തിൽ അത്തരം ഇനങ്ങളിൽ അന്തിമ തീരുമാനം എടുക്കുന്നതിന് വേണ്ടി സംസ്ഥാനതല അപ്പീൽ കമ്മിറ്റി രൂപീകരിക്കുന്നതാണ്.
കലോത്സവത്തിന്‍റെ സുഗമമായ നടത്തിപ്പിനായി അംഗീകൃത അധ്യാപക സംഘടനകളുടെ നേതൃത്വത്തിൽ വിവിധ സബ് കമ്മിറ്റികൾ രൂപീകരിച്ച് പ്രവർത്തനങ്ങൾ ഏകോപിപ്പിക്കുന്നുണ്ട്. സംസ്ഥാന കലോത്സവത്തിന് മുന്നോടിയായി സ്‌കൂൾതല മത്സരങ്ങൾ സെപ്‌റ്റംബർ മാസത്തിലും സബ് ജില്ലാതല മത്സരങ്ങൾ ഒക്‌ടോബർ രണ്ടാം വാരത്തിനുളളിലും ജില്ലാതല മത്സരങ്ങൾ നവംബർ ആദ്യവാരവും പൂർത്തിയാക്കും.
ഹയർ സെക്കൻഡറി പാഠ്യപദ്ധതി പരിഷ്‌കരണം: സംസ്ഥാനത്തെ പ്രീപ്രൈമറി മുതൽ ഹയർ സെക്കൻഡറി വരെയുള്ള പാഠ്യപദ്ധതി പരിഷ്‌കരണ നടപടികൾ പുരോഗമിക്കുകയാണ്. ഹയർ സെക്കൻഡറി 11, 12 ക്ലാസുകളിലെ പാഠപുസ്‌തക പരിഷ്‌കരണ പ്രവർത്തനങ്ങൾ 2024 ജൂലൈ 30ന് സംസ്ഥാനതല ആശയരൂപീകരണ ശില്‌പശാലയോടുകൂടി ആരംഭിക്കുകയാണ്.
ഈ ശില്‌പശാലയിൽ കരിക്കുലം കമ്മിറ്റി അംഗങ്ങൾ, അധ്യാപകർ, വിദ്യാർഥികൾ, ഈ മേഖലയിലെ വിദഗ്‌ധർ എന്നിവർ പങ്കെടുക്കും. സംസ്ഥാനത്തെ 11, 12 ക്ലാസുകളിൽ എസ്‌സിഇആർടി തയ്യാറാക്കുന്ന 38 പുസ്‌തകങ്ങളും എൻസിഇആർടി തയ്യാറാക്കുന്ന 44 പുസ്‌തകങ്ങളുമാണ് നിലവിൽ ഉപയോഗിക്കുന്നത്. ഇതിൽ 2013ൽ എസ്‌സിഇആർടി തയ്യാറാക്കിയ പുസ്‌തകങ്ങളും 2005ൽ എൻസിഇആർടി തയ്യാറാക്കിയ പുസ്‌തകങ്ങളും വർഷങ്ങളായി സംസ്ഥാനത്തെ കുട്ടികൾ പഠിക്കുകയാണ്.
ആദ്യഘട്ടം പരിഷ്‌കരണ പ്രവർത്തനങ്ങളുടെ ഭാഗമായി എസ്‌സിഇആർടി കേരളം തയ്യാറാക്കിയ ഭാഷാവിഷയങ്ങൾ, കമ്പ്യൂട്ടർ സയൻസ്, ജിയോളജി, ജേർണലിസം, ഫിലോസഫി, ആന്ത്രോപോളജി തുടങ്ങിയ വിഷയങ്ങളാണ് പരിഷ്‌കരിക്കുന്നത്. 2026ഓടെ പരിഷ്‌കരണ പ്രവർത്തനങ്ങൾ പൂർത്തീകരിക്കും.
സ്‌കൂൾ ബാഗിന്‍റെ ഭാരം സംബന്ധിച്ചുള്ള സർക്കാർ തീരുമാനം ഉടന്‍:
സംസ്ഥാനത്തെ ഒന്നാം ക്ലാസ് മുതൽ പന്ത്രണ്ടാം ക്ലാസ് വരെയുള്ള കുട്ടികളുടെ സ്‌കൂൾ ബാഗുകളുടെ ഭാരം സംബന്ധിച്ച് നിരവധിയായ പരാതികളും നിർദ്ദേശങ്ങളും രക്ഷിതാക്കളുടെ ഭാഗത്തുനിന്നും മറ്റ് പൊതു വിദ്യാഭ്യാസത്തെ സ്‌നേഹിക്കുന്നവരുടെ ഭാഗത്തുനിന്നും ഉയർന്നുവരുന്നുണ്ട്. പാഠപുസ്‌തകങ്ങളുടെ ഭാരം കുറക്കുന്നതിന് വേണ്ടി നിലവിൽ എല്ലാ പാഠപുസ്‌തകങ്ങളും രണ്ട് ഭാഗങ്ങളായിട്ടാണ് കുട്ടികൾക്ക് അച്ചടിച്ച് വിതരണം ചെയ്യുന്നത്. ഒരു ഭാഗത്തിന് 100നും 120നും ഇടയിലുള്ള പേജുകൾ മാത്രമാണ് ഇപ്പോൾ ഉള്ളത്. എന്നാലും ആകെ സ്‌കൂൾ ബാഗുകളുടെ ഭാരം കൂടുതലാണെന്ന് ആക്ഷേപം നിലനിൽക്കുന്നുണ്ട്.
ഒന്നാം ക്ലാസിലെ കുട്ടികളുടെ സ്‌കൂൾ ബാഗുകളുടെ ഭാരം 1.06 മുതൽ 2.02 ഇടയിലും പത്താം ക്ലാസിലെ കുട്ടികളുടെ സ്‌കൂൾ ബാഗുകളുടെ ഭാരം 2.30 കിലോയ്ക്കും 4.30 കിലോയ്ക്കും ഇടയിലാക്കുന്ന വിധത്തിൽ ക്രമീകരണങ്ങൾ നടത്തുവാൻ നിർദ്ദേശം നൽകുന്നതാണ്. കൂടാതെ മാസത്തിൽ 4 ദിവസമെങ്കിലും ബാഗ് ഇല്ലാത്ത ദിനങ്ങൾ എന്ന കാര്യം നടപ്പിലാക്കുന്നതും പരിഗണനയിലാണെന്നും വിദ്യാഭ്യാസമന്ത്രി അറിയിച്ചു.
