കാസര്‍കോട് കനത്ത മഴ: കൂവാരയിൽ ഉരുൾപൊട്ടൽ, വ്യാപക കൃഷി നാശം - Landslide in Kasaragod Koovara

കാസർകോട് ജില്ലയിൽ കനത്ത മഴ തുടരുന്നതിനിടെ മലയോര മേഖലയായ മൂന്നാംകടവ് കൂവാരയിൽ ഉരുൾപൊട്ടി. മേഖലയില്‍ വ്യാപക കൃഷിനാശം. ആളപായങ്ങളൊന്നും റിപ്പോര്‍ട്ട് ചെയ്‌തിട്ടില്ല.

കാസർകോട് : ജില്ലയിൽ കനത്ത മഴ തുടരുന്നതിനിടെ മലയോര മേഖലയായ മൂന്നാംകടവ് കൂവാരയിൽ ഉരുൾപൊട്ടൽ. പ്രദേശത്ത് വലിയ തോതിൽ കൃഷി നാശം ഉണ്ടായി. നിരവധി വാഴകളാണ് നിലംപൊത്തിയത്. അപകടത്തില്‍ ആളപായമില്ല.

കനത്ത മഴയെ തുടര്‍ന്ന് തേജസ്വിനി പുഴ കരകവിഞ്ഞ് ഒഴുകുകയാണ്. പാറക്കോൽ പാലം വെള്ളത്തിനടിയിലായി. തീരദേശ മേഖലയിലെ ഗതാഗതം തടസപ്പെട്ടു. മധുവാഹിനിപ്പുഴയിൽ ജലനിരപ്പ് വീണ്ടും ഉയർന്നു. പട്‌ലയിൽ ആറ് കുടുംബങ്ങളെ ബന്ധുവീടുകളിലേക്ക് മാറ്റിപ്പാർപ്പിച്ചു.