തിരുവനന്തപുരം: എസി പ്രീമിയം സൂപ്പർഫാസ്റ്റ് ബസ് സർവീസ് ഓണസമ്മാനമായി മലയാളികൾക്ക് സമർപ്പിക്കുമെന്ന് ഗതാഗത മന്ത്രി കെ ബി ഗണേഷ് കുമാർ. ആദ്യ ഘട്ടത്തിൽ 40 ബസുകൾ വാങ്ങുമെന്നും മന്ത്രി ട്രയൽ റൺ നടത്താൻ എത്തിച്ച എസി പ്രീമിയം സൂപ്പർഫാസ്റ്റ് ബസ് ഓടിച്ച ശേഷം മാധ്യമങ്ങളോട് പ്രതികരിച്ചു. 200 ബസുകൾ വാങ്ങാനാണ് ആലോചിക്കുന്നത്.
ട്രയൽ റണ്ണിന് ശേഷം പാലക്കാട്‌, കോഴിക്കോട്, എറണാകുളം റൂട്ടുകളിലായിരിക്കും പുതിയ ബസുകൾ സർവീസിനായി ഉപയോഗപ്പെടുത്തുക. ട്രയൽ റണ്ണിന് എത്തിച്ച ബസിൽ നിന്ന് കളർ സ്‌കീമിൽ മാറ്റമുണ്ടാകും. കോടതി ഉത്തരവിന്‍റെ അടിസ്ഥാനത്തിൽ കെഎസ്ആർടിസി കുറേ ദീർഘദൂര റൂട്ടുകൾ ഏറ്റെടുത്തിട്ടുണ്ട്. ഇവിടങ്ങളിൽ പഴയ ബസുകളാണ് നിലവിൽ ഓടിക്കുന്നത്.
ഈ റൂട്ടുകളിൽ ലിമിറ്റഡ് സ്‌റ്റോപ്പ്‌ ഫാസ്‌റ്റ് സർവീസ് ആരംഭിക്കും. 18 വർഷം പഴക്കമുള്ള ബസുകൾ സ്ക്രാപ്പ് ചെയ്യേണ്ടി വരും. പകരം സംവിധാനം ഏർപ്പെടുത്തും. ഗ്രാമപ്രദേശങ്ങളിലേക്കായി നീളം കുറഞ്ഞ ചെറിയ ബസുകൾ വാങ്ങും. കെഎസ്ആർടിസിയുടെ കെട്ടിടങ്ങളും കടകളും വാടകയ്ക്ക് കൊടുക്കാനുണ്ട്. ഇതുവഴി ഡെപ്പോസിറ്റായി ലഭിക്കുന്ന പണം ബസുകൾ വാങ്ങാൻ ഉപയോഗിക്കും.
സൂപ്പർ ഫാസ്‌റ്റ് പ്രീമിയം സൂപ്പർഫാസ്‌റ്റിന് മുകളിലും എക്‌സ്‌പ്രസിന് താഴെയുമുള്ള എസി ബസാണ്. ദീർഘദൂരം പോകുമ്പോൾ ആളുകൾ ബസ് സ്‌റ്റേഷനിൽ കയറി മുഷിയുകയാണ്. അതുകൊണ്ട് സ്‌റ്റോപ്പുകൾ പരിമിതപ്പെടുത്തും. നിലവിൽ തിരുവനന്തപുരത്ത് നിന്നും എറണാകുളത്തേക്കാണ് ട്രയൽ ഓടിക്കുന്നത്.
20 രൂപ അധികം നൽകിയാൽ ബസ് സ്‌റ്റേഷൻ അല്ലാത്ത സ്ഥലത്തും ഗൂഗിൾ ലൊക്കേഷൻ അയച്ചുകൊടുത്താൽ ബസ് നിർത്തുമെന്നും മന്ത്രി പറഞ്ഞു. തിരുവനന്തപുരം മുതൽ എറണാകുളം വരെയാണ് ട്രയൽ സർവീസ് നടത്തുന്നത്. ആദ്യ യാത്രയിൽ മന്ത്രി തന്നെ വളയം പിടിച്ചു.
എ സി പ്രീമിയം സൂപ്പർഫാസ്റ്റ് ബസിന്‍റെ സവിശേഷതകൾ ഇങ്ങനെ:
ടാറ്റയുടെ 3300 സിസി ഡീസൽ എഞ്ചിനാണ് ബസിന് കരുത്ത് പകരുന്നത്. 40 സീറ്റുകളാണ് ബസിൽ ഉള്ളത്. പുഷ്ബാക്ക് സീറ്റുകളാണിവ. എല്ലാ സീറ്റുകളിലും സീറ്റ് ബെൽറ്റും മൊബൈൽ ചാർജിങ് പോർട്ടുകളുമുണ്ട്. നിശ്ചിത അളവിൽ വൈഫൈ സൗകര്യം ലഭ്യമാക്കും.
യാത്രക്കാർക്ക് വെള്ളവും ലഘുഭക്ഷണവും വാങ്ങി ഉപയോഗിക്കുന്നതിനുള്ള സൗകര്യവും ഒരുക്കും. എന്തെങ്കിലും കാരണവശാൽ എ സി പ്രവർത്തനരഹിതമായാൽ വശങ്ങളിലെ ഗ്ലാസുകൾ നീക്കാനാകും. ടാറ്റ മോട്ടോഴ്‌സ് പുറത്തിറക്കിയിട്ടുള്ള മാര്‍ക്കോപോളോ ബസുകളാണ് പരീക്ഷണയോട്ടത്തിനായി നിലവിൽ എത്തിച്ചിരിക്കുന്നത്.
Also Read: 'തട്ടാതെയും മുട്ടാതെയും നോക്കം' കെഎസ്ആർടിസി എസി പ്രീമിയം ബസ് ഉദ്ഘാടനം ചെയ്‌ത്‌ ഗണേഷ് കുമാർ
