കോഴിക്കോട് : ചാത്തമംഗലത്തെ എൻഐടിയിൽ ജോലിചെയ്യുന്ന സെക്യൂരിറ്റി ജീവനക്കാരെയും സ്വീപ്പർമാരെയും പുറത്താക്കാൻ ശ്രമം. ഇതിനെതിരെ സെക്യൂരിറ്റി ജീവനക്കാരുടെ സംയുക്ത തൊഴിലാളി കോർഡിനേഷൻ കമ്മറ്റിയുടെ ആഭിമുഖ്യത്തിൽ പ്രതിഷേധ സമരം നടത്തി. പുതിയ സെക്യൂരിറ്റി കമ്പനി വന്നതോടെ നിലവിലുള്ള 116 സെക്യുരിറ്റി ജീവനക്കാരോടും 12 സ്വീപർ തസ്‌തികയിൽ ഉള്ളവരോടും ഇന്‍റർവ്യൂവിൽ പങ്കെടുക്കാൻ ആവശ്യപ്പെട്ടിരുന്നു. കൂടാതെ 55 വയസ് പ്രായം കഴിഞ്ഞവർക്ക് ജോലി നൽകില്ലെന്നും പുതിയ കരാർ കമ്പനി അറിയിച്ചിരുന്നു.
ഏറെക്കാലമായി 60 വയസ് പ്രായം വരെ ജോലി നൽകിയിരുന്ന എൻഐടിയിൽ പുതുതായി കരാർ എടുത്ത കമ്പനി ഇത്തരത്തിൽ വ്യവസ്ഥകൾ കൊണ്ടുവന്നതാണ് പ്രതിഷേധത്തിന് കാരണമായത്. എൻഐടി ഗ്രൗണ്ടിന് സമീപത്തെ സ്പോർട്‌സ് കോംപ്ലക്‌സിൽ രാവിലെ പുതുതായി കരാറെടുത്ത കമ്പനി പ്രതിനിധികളുമായി സെക്യൂരിറ്റി ജീവനക്കാരുടെ സംയുക്ത സംഘടന ചർച്ച നടത്തി.
എന്നാൽ ചർച്ചയിൽ തീരുമാനമാകാതെ പിരിഞ്ഞതോടെയാണ് സെക്യൂരിറ്റി ജീവനക്കാർ പ്രതിഷേധവുമായി രംഗത്തിറങ്ങിയത്. എൻഐടി പ്രധാന കവാടത്തിലേക്ക് പ്രതിഷേധ മാർച്ച് നടത്തിയാണ് ആദ്യഘട്ട സൂചന സമരം നടത്തിയത്. കാലാകാലങ്ങളായി എൻഐടിയിൽ നടന്നുവരുന്നതിൽ നിന്ന് കരാർ കമ്പനി വ്യതിചലിക്കുകയാണെങ്കിൽ ശക്തമായ പ്രക്ഷോഭ സമരങ്ങളുമായി മുന്നോട്ടുപോകുമെന്ന് എൻഐടി സംയുക്ത തൊഴിലാളി കോർഡിനേഷൻ നേതാക്കൾ മുന്നറിയിപ്പ് നൽകി.
ALSO READ : സംസ്ഥാനപാതയിൽ അവകാശമുന്നയിച്ച് എൻഐടി മാനേജ്‌മെന്‍റ് ; പ്രക്ഷോഭത്തിന് ഒരുങ്ങി സർവകക്ഷി
