തിരുവനന്തപുരം : വേനല്‍ അവധി അടിച്ചു പൊളിക്കാന്‍ നിങ്ങള്‍ വിനോദയാത്ര പുറപ്പെടുകയാണോ? മടങ്ങിയെത്തുമ്പോള്‍ നിങ്ങളുടെ വീട്ടിലുള്ള വിലപിടിപ്പുള്ള സാധനങ്ങള്‍ സുരക്ഷിതമാണെന്ന് ഉറപ്പിക്കേണ്ടേ. ഇക്കാര്യത്തില്‍ ആശങ്ക വേണ്ട. ധൈര്യമായി യാത്ര ചെയ്യാം എന്ന ഉറപ്പ് നല്‍കി കേരള പൊലീസ്.
കേരള പൊലീസിന്‍റെ പോല്‍ ആപ്പിലൂടെ (Pol App) വിവരം പൊലീസിനെ അറിയിച്ചാല്‍ നിങ്ങളുടെ വീടിന് പ്രത്യേക പൊലീസ് നിരീക്ഷണമുണ്ടാകും എന്ന ഉറപ്പാണ് കേരള പൊലീസ് പൊതുജനങ്ങള്‍ക്ക് നല്‍കുന്നത്. ഏപ്രില്‍ 1 മുതല്‍ മെയ് 6 വരെ സംസ്ഥാനത്ത് ഈ സൗകര്യം വിനിയോഗിച്ചത് 1231 പേരാണ്.
പൊലീസിന്‍റെ ഔദ്യോഗിക മൊബൈല്‍ ആപ്പായ പോല്‍-ആപ്പ് ഡൗണ്‍ലോഡ് ചെയ്‌ത ശേഷം അതിലെ ലോക്ക്ഡ് ഹൗസ് ഇന്‍ഫര്‍മേഷന്‍ എന്ന വിഭാഗത്തിലാണ് ഇതിനായി അപേക്ഷിക്കേണ്ടത്. യാത്ര പുറപ്പെടുന്നതിന് 48 മണിക്കൂര്‍ നേരത്തെയെങ്കിലും ഇത്തരത്തില്‍ വിവരം നല്‍കണം.
യാത്ര പുറപ്പെടുന്നതിന്‍റെ 7 ദിവസം മുമ്പ് തന്നെ പൊലീസിനെ വിവരം അറിയിക്കാവുന്നതാണ്. യാത്ര പോകുന്ന ദിവസങ്ങള്‍, വീട് സ്ഥിതി ചെയ്യുന്ന സ്ഥലം, വിലാസം, ബന്ധുവിന്‍റെയോ അയല്‍വാസിയുടെയോ പേരും ഫോണ്‍ നമ്പറും എന്നിവ ആപ്പില്‍ നല്‍കേണ്ടതുണ്ട്. പരമാവധി 14 ദിവസം വരെ വീടും പരിസരവും പൊലീസ് നിരീക്ഷണത്തിലായിരിക്കും. ഗൂഗിള്‍ പ്ലേ സ്റ്റോര്‍, ആപ്പ് സ്റ്റോര്‍ എന്നിവയില്‍ നിന്നും പോല്‍-ആപ്പ് ഡൗണ്‍ലോഡ് ചെയ്യാം.
