എറണാകുളം : എസ്എൻഡിപി യോഗം മൈക്രോ ഫിനാൻസ് തട്ടിപ്പ് കേസിൽ അന്വേഷണം ഒരു മാസത്തിനുള്ളിൽ പൂർത്തിയാക്കണമെന്ന് ഹൈക്കോടതി ഉത്തരവ്. വിജിലൻസ് എസ്‌പിക്കാണ് സിംഗിൾ ബെഞ്ച് നിർദേശം നൽകിയത്. വെള്ളാപ്പള്ളി നടേശൻ ഉൾപ്പെടെയുള്ളവരാണ് കേസിലെ പ്രതികൾ.
2003 മുതൽ 2014 വരെയുള്ള കാലയളവിൽ എസ്എൻഡിപി സംഘങ്ങളുടെ പേരിൽ അനുവദിച്ച മൈക്രോ ഫിനാൻസ് വായ്‌പയിൽ തിരിമറി നടത്തിയെന്നാണ് കേസ്. സാക്ഷ്യപത്രങ്ങളിൽ കൃത്രിമത്വം കാട്ടിയും വായ്‌പയിൽ ക്രമക്കേട് നടത്തിയുമാണ് തട്ടിപ്പ് ചെയ്‌തിട്ടുള്ളതെന്ന് വിജിലൻസ് കണ്ടെത്തിയിട്ടുണ്ട്.
നിലവിൽ വിവിധ ജില്ലകളിലെ കേസുകളിൽ പതിനേഴ് അന്തിമ റിപ്പോർട്ടുകൾ തയ്യാറാക്കിയിട്ടുണ്ടെന്നും ഉടനടി ബന്ധപ്പെട്ട കോടതികളിൽ സമർപ്പിക്കുമെന്നും അന്വേഷണ ഉദ്യോഗസ്ഥൻ ഹൈക്കോടതിയെ അറിയിച്ചു. വെള്ളാപ്പള്ളിയെക്കൂടാതെ എസ്എൻഡിപി യോഗം ഭാരവാഹികളായ എംഎൻ സോമൻ കെകെ മഹേശൻ എന്നിവരാണ് കേസിലെ മറ്റു പ്രതികൾ.
