തിരുവനന്തപുരം : കരമന അഖിൽ വധക്കേസിൽ പ്രതികളുമായി പൊലീസ് ഇന്ന് തെളിവെടുപ്പ് നടത്തും. റിമാൻഡിലായിരുന്ന പ്രതികളെ ഇന്നലെ (മെയ് 20) പൊലീസ് കസ്‌റ്റഡിയിൽ വാങ്ങിയിരുന്നു. പ്രതികളെ മൂന്ന് ദിവസത്തെ കസ്‌റ്റഡിയിലാണ് പൊലീസ് വാങ്ങിയത്. ഒന്നാം പ്രതി വിനീഷ് രാജ്, രണ്ടാം പ്രതി അഖിൽ അപ്പു, മൂന്നാം പ്രതി സുമേഷ്, നാലാം പ്രതി അനീഷ്, അഞ്ചാം പ്രതി കിരൺ കൃഷ്‌ണൻ, ആറാം പ്രതി അരുൺ ബാബു പ്രതികൾക്ക് രക്ഷപ്പെടാൻ അവസരം ഒരുക്കിയ ഹരിലാൽ, അഭിലാഷ് എന്നിവരെയാണ് ഇന്നലെ പൊലീസ് കസ്‌റ്റഡിയിലെടുത്ത് ചോദ്യം ചെയ്‌തത്. ഇവരെ ഇന്ന് സംഭവസ്ഥലത്ത് എത്തിച്ച് തെളിവെടുപ്പ് നടത്തുമെന്നാണ് വിവരം.
ഏപ്രിൽ 26 ന് പാപ്പനംകോട് ബാറിൽ കൊല്ലപ്പെട്ട അഖിലും പ്രതികളും തമ്മിൽ തർക്കം ഉണ്ടായെന്നും ഇതേ തുടർന്നുള്ള വൈരാഗ്യമാണ് കൊലപാതകത്തിന് കാരണമെന്നും പ്രതികൾ പൊലീസിനോട് സമ്മതിച്ചിട്ടുണ്ട്. മെയ് 10 ന് വൈകിട്ടോടെയാണ് കരുമം ഇടഗ്രാമത്തിൽ വെച്ച് പ്രതികൾ അഖിലിനെ കമ്പിവടി കൊണ്ട് മാരകമായി അടിച്ചും സിമന്‍റ് കട്ട പലതവണ ശരീരത്തിലേക്ക് ഇട്ടും ക്രൂരമായി കൊലപ്പെടുത്തിയത്. 2019 ലെ അനന്തു വധക്കേസിലും ഉൾപ്പെട്ടവരാണ് പ്രതികൾ.
യുവാവിനെ തട്ടിക്കൊണ്ടുപോയി കൊലപ്പെടുത്താൻ ശ്രമം; ഗുണ്ടാസംഘം അറസ്‌റ്റിൽ : കായംകുളത്ത് യുവാവിനെ തട്ടിക്കൊണ്ടുപോയി വെട്ടിക്കൊല്ലാൻ ശ്രമം. അരുണ്‍ പ്രസാദ് എന്ന യുവാവിനെയാണ് നാലുപേര്‍ അടങ്ങുന്ന ഗുണ്ടാസംഘം കൊലപ്പെടുത്താൻ ശ്രമിച്ചത്. സംഭവത്തിൽ മൂന്ന് പേര്‍ പൊലീസ് പിടിയിലായി.
കൃഷ്‌ണപുരം സ്വദേശികളായ അമല്‍ ചന്തു, അഭിമന്യു, അനൂപ് ശങ്കര്‍ എന്നിവരാണ് പിടിയിലായത്. റെയിൽവേ ക്രോസിലിട്ടാണ് അരുണ്‍ പ്രസാദിനെ വെട്ടിക്കൊല്ലാൻ ശ്രമം നടന്നത്. വെള്ളിയാഴ്‌ച നടന്ന ചില സംഭവങ്ങളാണ് ഗുണ്ടാസംഘത്തിന്‍റെ ആക്രമണത്തിൽ കലാശിച്ചത്.
വെള്ളിയാഴ്‌ച രാത്രി 11 മണിക്ക് ഒരു സംഘം പൊലീസുകാർ കായംകുളത്തെ ഹോട്ടലില്‍ ചായ കുടിക്കാനെത്തി. സിവില്‍ വേഷത്തിലായിരുന്നു അവരെത്തിയത്. ഇതിനിടെ ഹോട്ടലിന് പുറത്ത് ഒരാൾ സിഗരറ്റ് വലിക്കുകയും പൊലീസുകാര്‍ അത് ചോദ്യം ചെയ്യുകയും ചെയ്‌തു. എന്നാൽ പൊലീസുകാരാണെന്ന് മനസിലാക്കാതെ യുവാവും സുഹൃത്തുക്കളും വാക്കുതര്‍ക്കത്തില്‍ ഏര്‍പ്പെടുകയും അടിപിടിയില്‍ കലാശിക്കുകയുമായിരുന്നു.
ALSO READ : അയല്‍വാസിയെ കടയില്‍ കയറി കൊന്ന സംഭവം; കൃത്യത്തിന് ഉപയോഗിച്ച കത്തി കണ്ടെടുത്തു
തുടർന്ന് ഇതില്‍ ഒരാളെ പൊലീസുകാര്‍ സ്‌റ്റേഷനിലേക്ക് കൊണ്ടുപോയി. എന്നാല്‍ സംഘര്‍ഷത്തിനിടെ ഗുണ്ടാനേതാവിന്‍റെ ഫോണ്‍ നഷ്‌ടപ്പെട്ടിരുന്നു. അരുണ്‍ പ്രസാദായിരുന്നു ഈ ഫോണ്‍ പൊലീസില്‍ ഏല്‍പ്പിച്ചത്. ഈ വൈരാഗ്യത്തിലാണ് ഗുണ്ടാസംഘം യുവാവിനെ തട്ടിക്കൊണ്ടുപോയി മർദിച്ചത്.
യുവാവിനെ മര്‍ദിക്കുന്നതിന്‍റെ ദൃശ്യങ്ങൾ അക്രമികൾ തന്നെ മൊബൈലില്‍ പകര്‍ത്തിയിരുന്നു. ഈ ദൃശ്യങ്ങളും പുറത്തുവന്നിട്ടുണ്ട്. സംഭവത്തിൽ അന്വേഷണം പുരോഗമിക്കുകയാണ്.
