കോട്ടയം: ജമ്മു കശ്‌മീരിലെ നിയമസഭാ തെരഞ്ഞെടുപ്പുമായി ബന്ധപ്പെട്ട് നാഷണൽ കോൺഫറൻസ് (എന്‍സി) പുറത്തിറക്കിയ പ്രകടന പത്രികയ്‌ക്കെതിരെ ആഞ്ഞടിച്ച് ബിജെപി സംസ്ഥാന അധ്യക്ഷൻ കെ സുരേന്ദ്രൻ. നാഷണൽ കോൺഫറൻസ് പുറത്തിറക്കിയ പ്രകടന പത്രികയെ കുറിച്ച് കേരളത്തിലെ മാധ്യമങ്ങൾ ഒന്നും തന്നെ വാർത്തയാക്കിയിട്ടില്ല എന്നത് ഒരു വസ്‌തുതയാണ്. വളരെ ഗുരുതരമായ രാജ്യ ദ്രോഹത്തിന് കുടപിടിക്കുന്ന ഒരു പ്രകടന പത്രികയാണ് ഈ തെരഞ്ഞെടുപ്പിനോട് അനുബന്ധിച്ച് നാഷണൽ കോൺഫറൻസ് പുറത്തിറക്കിയിരിക്കുന്നതന്ന് അദ്ദേഹം പറഞ്ഞു.
ഇന്ത്യ മുന്നണിയുടെ ഭാഗമായിട്ടുള്ള നാഷണൽ കോൺഫറൻസിന്‍റെ പ്രകടന പത്രികയോട് കോൺഗ്രസും ഇടതുപക്ഷ കക്ഷികളും ഇതുവരെ അവരുടെ നിലപാട് വ്യക്തമാക്കിയിട്ടില്ല എന്നത് ഖേദകരമാണ്. പാകിസ്ഥാനെ പിന്തുണയ്ക്കുന്ന നിലപാടാണ് ഇന്ത്യ സഖ്യം കശ്‌മീരിൽ ഉയർത്തിപ്പിടിക്കുന്നത്. ഇന്ത്യയുടെ പരാമാധികാരത്തെ ചോദ്യം ചെയ്യുന്ന ഇന്ത്യയുടെ പ്രഖ്യാപിത നയങ്ങളെ വെല്ലുവിളിക്കുന്ന ഒരു പ്രകടന പത്രികയാണ് എൻസി പുറത്തിറക്കിയിരിക്കുന്നത്.
ജമ്മു കശ്‌മീരിൽ ദേശീയപതാകയ്ക്ക് ബദലായി മറ്റൊരു പതാക കൊണ്ടുവരും എന്നതാണ് പ്രകടന പത്രികയിൽ പ്രധാനമായും പറയുന്നത്. 370 -ാം വകുപ്പും 35 എ വകുപ്പും റദ്ദാക്കും എന്നതാണ് പ്രകടനപത്രികയിലെ മറ്റൊരു വാഗ്‌ദാനമെന്നും കെ സുരേന്ദ്രൻ വ്യക്തമാക്കി.
ജമ്മു കശ്‌മീരിൽ സ്വയംഭരണം വേണം എന്ന ആവശ്യം പാകിസ്ഥാന്‍റെയും തീവ്രവാദികളുടേതുമാണ്. ഇപ്പോൾ ആ ആവശ്യം നാഷണൽ കോൺഫറൻസ് മുന്നോട്ട് വയ്ക്കുന്നു എന്ന് മാത്രം. ജമ്മു കശ്‌മീരിലെ ന്യൂനപക്ഷങ്ങൾക്ക് നൽകുന്ന സംവരണം എടുത്തുകളയുമെന്നും പ്രകടന പത്രികയിൽ പറയുന്നുണ്ട്.
കശ്‌മീരിലെ ശങ്കരാചാര്യ മലനിരകളുടെ പേര് ഇസ്ലാം പേരുകളാക്കി മാറ്റും. അതുപോലെ തന്നെ കശ്‌മീരിലെ ജനങ്ങളെ ഭിന്നിപ്പിക്കുന്ന നിലപാടുകൾ ആണ് പ്രകടന പത്രികയിൽ ഉൾക്കൊള്ളിച്ചിരിക്കുന്നത്. ഈ പ്രകടന പത്രികയിൽ കോൺഗ്രസിന്‍റെയും രാഹുൽ ഗാന്ധിയുടെയും നിലപാട് എന്തെന്ന് വ്യക്തമാക്കണമെന്നും ഇതിൽ അഭിപ്രായം പറയാൻ സിപിഎം തയ്യാറാവണമെന്നും കെ സുരേന്ദ്രൻ ആവശ്യപ്പെട്ടു.
Also Read: 'തീവ്രവാദത്തെയും വിഘടനവാദത്തെയും പിന്തുണയ്ക്കുന്നു'; കോൺഗ്രസിനെതിരെ ആഞ്ഞടിച്ച് പുഷ്‌കർ സിങ് ധാമി
