പത്തനംതിട്ട: ലോക്‌സഭ തെരഞ്ഞെടുപ്പിൽ അനിൽ ആന്‍റണി തോൽക്കുമെന്ന എ കെ ആന്‍റണിയുടെ പരാമർശത്തിൽ രൂക്ഷമായി പ്രതികരിച്ച് എ കെ ആന്‍റണിയുടെ മകനും എൻഡിഎ സ്ഥാനാർത്ഥിയുമായ അനിൽ ആന്‍റണി. ആരൊക്കെ പറഞ്ഞാലും പത്തനംതിട്ടയില്‍ താന്‍ തന്നെ ജയിക്കുമെന്നും ആന്‍റോ ആന്‍റണി വന്‍ തോല്‍വി ഏറ്റുവാങ്ങുമെന്നും എ കെ ആന്‍റണിയോട് സഹതാപമാണെന്നും അനിൽ ആന്‍റണി പറഞ്ഞു.
മോദി വീണ്ടും അധികാരത്തിലെത്തുമെന്നും അപ്പോഴും ചന്ദ്രനെ നോക്കി കുരയ്ക്കുന്ന പട്ടികളെ പോലെ കാലഹരണപ്പെട്ട കോണ്‍ഗ്രസുകാര്‍ കുരച്ചുകൊണ്ടേയിരിക്കുമെന്നും അനില്‍ ആന്‍റണി പ്രതികരിച്ചു. പത്തനംതിട്ടയില്‍ അനില്‍ ആന്‍റണി തോല്‍ക്കുമെന്ന് ആന്‍റണി പറഞ്ഞതിന് പിന്നാലെയായിരുന്നു ബിജെപി സ്ഥാനാര്‍ഥി അനിൽ ആന്‍റണിയുടെ പ്രതികരണം.
കാലഹരണപ്പെട്ട കോൺഗ്രസ് നേതാക്കൾ ചന്ദ്രനെ നോക്കി കുരയ്ക്കുന്ന പട്ടികളെപ്പോലെയാണ്. രാജ്യവിരുദ്ധ നിലപാട് എടുക്കുന്ന ആന്‍റോ ആന്‍റണിക്കായി പ്രചാരണത്തിന് വരുന്നവരോട് സഹതാപം മാത്രമേയുള്ളു. സൈന്യത്തെ അപമാനിച്ച എംപിക്ക് വേണ്ടി സംസാരിക്കുന്നതിൽ സഹതാപം. പ്രതിരോധ മന്ത്രിയായിരുന്ന ഒരാളാണ് ഇങ്ങനെ സംസാരിക്കുന്നതെന്നും ഗാന്ധി കുടുംബത്തിന് വേണ്ടി അദ്ദേഹം നിലകൊള്ളുന്നതിലും സഹതാപം മാത്രമെന്നും അനിൽ ആന്‍റണി പറഞ്ഞു.
