കോഴിക്കോട്: പന്തീരാങ്കാവിന് സമീപം കൊടൽ നടക്കാവിൽ ദേശീയ പാതയുടെ നിർമ്മാണത്തിന്‍റെ ഭാഗമായി നിർമ്മിച്ച സർവീസ് റോഡിൽ ആഴത്തിൽ വിള്ളൽ വീണു. ശക്തമായ മഴയെ തുടർന്ന് ഇന്നലെ പുലർച്ചയോടെയാണ് നൂറ് മീറ്ററോളം റോഡിൽ ആഴത്തിൽ വിള്ളൽ വീണത്. തൊട്ടു താഴെ നിരവധി വീടുകളും ഒരു ക്ഷേത്രവും അങ്കണവാടിയും സ്ഥിതി ചെയ്യുന്നുണ്ട്.
ഇവർക്കെല്ലാം വലിയ ഭീഷണിയാണ് ഇപ്പോൾ ഉണ്ടായിരിക്കുന്നത്. മഴ ശക്തമായതോടെ ഓരോ നിമിഷവും റോഡിലെ വിള്ളലുകൾ ജനങ്ങൾക്ക് ആശങ്ക ഉണ്ടാക്കുന്ന വിധം വർധിച്ചു വരുന്നുണ്ട്. പ്രദേശവാസികൾ വിളിച്ചറിയിച്ചതോടെ കരാറുകാർ സ്ഥലത്തെത്തി വിള്ളൽ വീണ ഭാഗത്ത് കോൺക്രീറ്റ് ചെയ്‌ത്‌ അടയ്ക്കാനുള്ള ശ്രമം നടത്തുന്നുണ്ട്.
എന്നാൽ വിള്ളൽ വീണ ഭാഗം പൂർണമായി പൊളിച്ചു നീക്കി പുതുതായി കെട്ടി ഉയർത്തിയെങ്കിൽ മാത്രമേ അപകട ഭീഷണി ഒഴിവാകൂ എന്നാണ് നാട്ടുകാർ പറയുന്നത്. ദേശീയ പാതയുടെ നിർമ്മാണ സമയത്ത് തന്നെ നാട്ടുകാർ അശാസ്‌ത്രീയമായ നിർമ്മാണമാണെന്ന് ആരോപിച്ചിരുന്നു. എന്നാൽ അതൊന്നും ചെവി കൊള്ളാതെയാണ് കരാറുകാർ ഈ ഭാഗത്ത് ഏറെ ഉയരത്തിൽ കെട്ടിയുയർത്തി മണ്ണിട്ട് പ്രവർത്തി നടത്തിയത്.
കഴിഞ്ഞ വേനലിൽ തന്നെ ദേശീയ പാതയുടെ നിർമ്മാണ പ്രവർത്തിക്കിടയിൽ റോഡിൽ വലിയ വിള്ളൽ വീണിരുന്നു. ആ വിള്ളലാണ് ഇപ്പോൾ മഴപെയ്‌തതോടെ റോഡ് മുഴുവൻ ഇടിഞ്ഞുവീഴാവുന്ന നിലയിലേക്ക് വർദ്ധിച്ചത്. നാട്ടുകാരുടെ കണ്ണിൽ പൊടിയിടാൻ കരാറുകാർ കോൺക്രീറ്റ് ഇട്ട് വിള്ളൽ അടയ്ക്കാൻ ശ്രമിച്ചതോടെ പ്രദേശവാസികൾ ഒത്തുചേർന്ന് കരാറുകാരന്‍റെ പ്രവർത്തി തടഞ്ഞു.
ജനങ്ങളുടെ ആശങ്ക പരിഹരിച്ച ശേഷം മാത്രമേ ഇനി പ്രവർത്തി നടത്താൻ അനുവദിക്കൂ എന്നാണ് നാട്ടുകാർ പറയുന്നത്. ഇതിനുപുറമെ തൊട്ടടുത്തു തന്നെയുള്ള മൂലക്കുന്നത്ത് പൊറ്റമ്മൽ ശാന്തയുടെ വീടിന്‍റെ മുറ്റത്തും കിണറിലും റോഡ് നിർമ്മിക്കാൻ കൊണ്ടിട്ട മണ്ണ് ഒലിച്ചിറങ്ങി വീട്ടുകാർക്ക് പുറത്തിറങ്ങാൻ പോലും പറ്റാത്ത അവസ്ഥയായി. കൂടാതെ കിണറും ഉപയോഗ ശൂന്യമായിട്ടുണ്ട്. പ്രശ്‌നം രൂക്ഷമായതോടെ പന്തീരാങ്കാവ് പൊലീസ് സ്ഥലത്തെത്തി കരാറുകാരുമായി സംസാരിച്ചു. ജനങ്ങളുടെ ആശങ്ക ഒഴിവാക്കാൻ ആവശ്യപ്പെട്ടിട്ടുണ്ട്.
Also Read: തലസ്ഥാനത്തെ റോഡുപണി നീളുന്നു; കേസെടുത്ത് മനുഷ്യാവകാശ കമ്മീഷൻ
