തിരുവനന്തപുരം : ദുരന്ത നിവാരണ നിയമത്തിന്‍റെ മറവില്‍ നടക്കുന്ന കോടി കണക്കിന് രൂപയുടെ ധാതുമണല്‍ ഖനനത്തിലെ അഴിമതി അന്വേഷിക്കണമെന്ന് ആവശ്യപ്പെട്ട് മാത്യു കുഴല്‍നാടന്‍ എം.എല്‍.എ നൽകിയ ഹർജിയിൽ വാദം പൂർത്തിയായി. കേസില്‍ വിധി പറയുക ഏപ്രിൽ നാലിനാണ്. തിരുവനന്തപുരം പ്രത്യേക വിജിലന്‍സ് കോടതിയാണ് ഹർജി പരിഗണിക്കുന്നത്.
ഹർജിയിന്‍മേല്‍ കോടതി നേരിട്ട് അന്വേഷിക്കേണ്ട, വിജിലൻസ് അന്വേഷണം മാത്രം മതി എന്ന് കാട്ടി മാത്യു കുഴൽനാടൻ കോടതിയിൽ മെമ്മോ ഫയൽ ചെയ്‌തിട്ടുണ്ട്. മാത്യു കുഴൽനാടന് വേണ്ടി ഹാജരായ അഭിഭാഷകനോട് എന്ത് നിലപാട് സ്വീകരിക്കണം എന്ന് കോടതി ചോദിച്ചു. ഈ സമയത്താണ് ഇത്തരമൊരു ആവശ്യം കുഴൽനാടന്‍റെ അഭിഭാഷകൻ ഉന്നയിച്ചത്.
മുഖ്യമന്ത്രി പിണറായി വിജയന്‍, മകള്‍ വീണ തൈക്കണ്ടിയില്‍, എന്നിവർ ഉൾപ്പടെ ഏഴ് പേരാണ് കേസിലെ എതിർകക്ഷികള്‍. പിണറായിക്കും മകള്‍ക്കും പുറമെ സി.എം.ആര്‍.എല്‍ ഉടമ എസ്. എന്‍. ശശിധരന്‍ കര്‍ത്ത, സി.എം.ആര്‍.എല്‍, കെ. എം.എം.എല്‍, ഇന്‍ഡ്യന്‍ റെയര്‍ എര്‍ത്ത്‌സ്, എക്‌സാലോജിക് എന്നിവരുമാണ് എതിർകക്ഷികള്‍.
ആറാട്ടുപുഴയിലും, തൃക്കുന്നപ്പുഴയിലും ധാതുമണല്‍ ഖനനത്തിനായി കര്‍ത്ത സ്ഥലം വാങ്ങിയെങ്കിലും 2004 ലെ സംസ്ഥാന ഉത്തരവും, കേന്ദ്ര നിയമങ്ങളും എതിരായതിനാല്‍ ഖനനാനുമതി ലഭ്യമായിരുന്നില്ല. കേരള ഭൂവിനിമയ ചട്ട പ്രകാരം പ്രസ്‌തുത ഭൂമിക്ക് ഇളവ് ലഭ്യമാക്കാനുളള കര്‍ത്തയുടെ ശ്രമങ്ങളും പരാജയപ്പെട്ട സാഹചര്യത്തിലാണ് വീണ വിജയൻ സി.എം.ആര്‍.എല്ലുമായി കരാറില്‍ ഏര്‍പ്പെടുന്നത്. ഇതിനുശേഷം മുഖ്യമന്ത്രി പിണറായി വിജയൻ നേരിട്ട് ഇടപെട്ട് റവന്യൂ വകുപ്പിനോട് കര്‍ത്തയുടെ അപേക്ഷയില്‍ പുനപ്പരിശോധന നടത്താന്‍ നിര്‍ദ്ദേശിച്ചതായി ഹര്ജിക്കാരന് ആരോപിക്കുന്നുണ്ട്.
ഇതിനിടെ 2018ലെ വെളളപ്പൊക്കത്തിന്‍റെ മറവില്‍ കുട്ടനാടിലെ ജനങ്ങളെ സംരക്ഷിക്കാന്‍ എന്ന പേരില്‍ തോട്ടപ്പളളി സ്‌പില്‍ വേയുടെ അഴിമുഖത്ത് നിന്ന് ഉദ്ദേശം 2000 കോടി രൂപ വിലയുളള ദശലക്ഷക്കണക്കിന് ഇല്‍മനൈറ്റും, 85,000 ടണ്‍ റൂട്ടൈലും ഖനനം ചെയ്‌തിട്ടുണ്ട്. സര്‍ക്കാര്‍ അധീനതയിലുളള കെ. എം.എം.എല്ലിനാണ് ഖനനാനുമതി എങ്കിലും കെ. എം.എം. എല്ലില്‍ നിന്ന് ക്യൂബിക്കിന് വെറും 464 രൂപ നിരക്കില്‍ സി.എം.ആര്‍. എല്‍ ഇവ സംഭരിക്കുന്നെന്നാണ് ഹര്‍ജിയിൽ ഉന്നയിക്കുന്ന ആരോപണം.
കോടിക്കണക്കിന് രൂപയുടെ ധാതുമണല്‍ ഇതുവഴി തുച്ഛമായ വിലയ്ക്ക്‌ കര്‍ത്തയ്ക്ക്‌ നല്‍കുന്നതില്‍ മുഖ്യമന്ത്രിയുടെ അവിഹിത ഇടപെടല്‍ വ്യക്തമാണെന്ന് ഹര്ജിക്കാരന് ആരോപിക്കുന്നു. കേരളത്തിലെ 54 ഡാമുകളില്‍ 35 ഡാമുകളുടെ ഷട്ടര്‍ ഒരേ സമയം തുറന്ന് വെളളപ്പൊക്കം ഉണ്ടാക്കി 463 മനുഷ്യ ജീവനും 20,000 കോടി രൂപയുടെ നാശനഷ്‌ടവും ഉണ്ടാക്കിയതിന് പിന്നില്‍ ഉളള ഉദ്ദേശവും സംശയാസ്‌പദമാണെന്നും ഹർജിയിൽ പറയുന്നു.
Also read : മാസപ്പടി കേസ്; മുഖ്യമന്ത്രിക്കും മകള്‍ക്കും എതിരായ ഹര്‍ജി ഇന്ന് കോടതിയില്‍
ഹൈക്കോടതി നിയോഗിച്ച അമിക്കസ് ക്യൂറി തന്നെ 2018 ലെ പ്രളയം മനുഷ്യ നിര്‍മ്മിതമാണെന്ന് ആരോപിച്ചിരുന്ന കാര്യവും ഹര്‍ജിയില്‍ പരാമര്‍ശിക്കുന്നുണ്ട്. വെളളപ്പൊക്കത്തിന്‍റെ മറവില്‍ നടന്ന ധാതുമണല്‍ കൊളളയിലെ അഴിമതിയില്‍ മുഖ്യമന്ത്രി അടക്കമുളളവരുടെ പങ്ക് അന്വേഷിക്കണമെന്നാണ് ഹര്‍ജിയിലെ ആവശ്യം. ഹര്ജിക്കാരന് വേണ്ടി അഭിഭാഷകനായ ദിലീപ് സത്യന്‍ കോടതിയിൽ ഹാജരായി.
