തൃശൂർ: രാജ്യത്തിൻ്റെ അഭിമാനം കാത്ത കാര്‍ഗിലിലെ ഐതിഹാസിക യുദ്ധവിജയത്തിന്‍റെ ഇരുപത്തിയഞ്ചാം വാര്‍ഷികാഘോഷങ്ങളിലേക്ക് രാജ്യം കടക്കുമ്പോൾ മറക്കാനാവാത്ത ഒരു പേരാണ് തൃശൂർ ചാവക്കാട് സ്വദേശിയായ ബ്രിഗേഡിയർ എൻഎ സുബ്രഹ്മണ്യൻ്റേത്. കാർഗിൽ യുദ്ധവിജയത്തിൻ്റെ സുപ്രധാന നീക്കമായ ബാറ്റിൽ ഫോർ ഗൺ ഹിൽനുവേണ്ട ഫയർ പ്ലാൻ തയാറാക്കിയത് സുബ്രഹ്മണ്യനായിരുന്നു.
1999 മേയ് മുതല്‍ രണ്ടരമാസം നീണ്ടുനിന്ന കാർഗിൽ യുദ്ധത്തില്‍ 527 ജവാന്‍മാരാണ് രാജ്യത്തിനായി ജീവത്യാഗം ചെയ്‌തത്. പാക്കിസ്ഥാനുമായുണ്ടായ യുദ്ധത്തിന്‍റെ അവസാനം സമ്പൂര്‍ണ വിജയം ഇന്ത്യയ്ക്കായിരുന്നു. ഈ ഓർമ്മകളിലാണ് രാജ്യം എല്ലാ വർഷവും കാർഗിൽ വിജയ് ദിവസ് ആചരിക്കുന്നത്. കശ്‌മീരും ലഡാക്കും തമ്മിലുള്ള ബന്ധം വിച്ഛേദിക്കുക.
ലഡാക്കിനെയും സിയാച്ചിനെയും വെട്ടിമുറിക്കുകയെന്നതായിരുന്നു കാർഗിലിലെ പാക് ലക്ഷ്യം. നുഴഞ്ഞുകയറ്റക്കാരുടെ വേഷത്തിൽ ഇന്ത്യന്‍ സേനയുടെ പോസ്റ്റുകളിലേക്ക് എത്തിയ പാക് സൈന്യത്തിൻ്റെ നീക്കം ദ്രാസ് പ്രദേശത്ത് യാക്കിനെ മേയ്ക്കുന്ന ഇടയന്‍മാർ തിരിച്ചറിഞ്ഞതോടെയാണ് ഇന്ത്യൻ സൈന്യത്തിന് വേഗത്തിൽ ഇടപെടൽ നടത്താനായത്.
16,000 അടി ഉയരത്തിലെ മലമുകളിൽ തമ്പടിച്ച പാക് സൈന്യത്തിനെ തുരത്താനായിരുന്നു പിന്നീട് ലോകം അംഗീകരിച്ച ഇന്ത്യൻ സൈന്യത്തിൻ്റെ ഫയർ പ്ലാൻ. കാർഗിൽ വിജയത്തിൻ്റെ 25 വർഷങ്ങൾ പിന്നിടുമ്പോൾ യുദ്ധത്തിൻ്റെ ഓർമ്മകൾ ചാവക്കാട്ടെ വീട്ടിലിരുന്നുകൊണ്ട് ബ്രിഗേഡിയർ സുബ്രഹ്മണ്യൻ പങ്കുവയ്ക്കുന്നത് അന്നത്തെ അതേ സ്‌പിരിറ്റ് ഉൾക്കൊണ്ടുകൊണ്ടാണ്.
യുദ്ധത്തിലെ സ്‌തുത്യർഹമായ സേവനത്തിന് സുബ്രഹ്മണ്യന് രാഷ്ട്രപതിയുടെ വീർ സേവാ മെഡലും, സുബ്രഹ്മണ്യൻ്റെ റജിമെൻ്റെിന് 'ബാറ്റിൽ ഹോണർ കാർഗിൽ’ പുരസ്‌കാരവും ലഭിച്ചിട്ടുണ്ട്. സൈനിക സേവനത്തിനായി കൂടുതൽ യുവാക്കൾ സ്വയം തയാറാകണമെന്ന അഭിപ്രായമാണ് ബ്രിഗേഡിയർ സുബ്രഹ്മണ്യൻ സമൂഹത്തോട് പങ്കുവയ്ക്കുന്നത്.
