തിരുവനന്തപുരം : ലോകത്തിലെ പടുകൂറ്റന്‍ മദര്‍ഷിപ്പുകളുടെ പറുദീസയാകാന്‍ കാത്തിരിക്കുന്ന വിഴിഞ്ഞത്തേക്ക് കമ്മിഷനിങ്ങിന് മുന്‍പ് വീണ്ടുമൊരു മദര്‍ഷിപ്പ് കൂടി എത്തുന്നു. തുറമുഖത്ത് പരീക്ഷണാടിസ്ഥാനത്തില്‍ ചരക്കിറക്കുന്നതിന്‍റെ ഭാഗമായാണ് കപ്പലെത്തുന്നത്. ലോകത്തെ ഏറ്റവും വലിയ കപ്പല്‍ കമ്പനികളിലൊന്നായ മെഡിറ്ററേനിയന്‍ ഷിപ്പിങ് കമ്പനി (എം എസ് സി)യുടെ ഉടസ്ഥതയിലുള്ള ഡെയ്‌ല എന്ന കണ്ടെയ്‌നര്‍ കപ്പലാണ് വിഴിഞ്ഞത്ത് എത്തുന്നത്.
ഈ മാസം 30- ന് കപ്പല്‍ എത്തുമെന്നാണ് പ്രതീക്ഷിക്കുന്നത്. 13,988 കണ്ടെയിനറുകള്‍ വഹിക്കാന്‍ ശേഷിയുള്ള കപ്പലിന്, 51 മീറ്റര്‍ വീതിയും 366 മീറ്റര്‍ നീളവുമുണ്ട്. കഴിഞ്ഞ മാസം 12- ന് വിഴിഞ്ഞം തുറമുഖത്ത് കണ്ടെയിനര്‍ ഇറക്കി മടങ്ങിയ സാന്‍ ഫെര്‍ണാണ്ടോ എന്ന മദര്‍ഷിപ്പാണ് വിഴിഞ്ഞത് ഇതുവരെയെത്തിയ ഏറ്റവും വലിയ മദര്‍ഷിപ്പ്.
2500 കണ്ടെയിനറുകളുമായി വിഴിഞ്ഞത്തെത്തിയ സാന്‍ ഫെര്‍ണാണ്ടോയില്‍ നിന്നും പരീക്ഷണാടിസ്ഥാനത്തില്‍ 1960 കണ്ടെയിനറുകള്‍ വിഴിഞ്ഞത്തിറക്കി. ഈ മാസം 30- ന് വിഴിഞ്ഞത്തെത്തുമെന്ന് പ്രതീക്ഷിക്കുന്ന എം എസ് സി ഡെയ്‌ല ആഫ്രിക്കയില്‍ നിന്ന് മുംബൈ വഴിയാണ് വിഴിഞ്ഞത്തേക്ക് എത്തുന്നത്. ആദ്യഘട്ട കമ്മിഷനിങ് അടുത്ത മാസം നടക്കാനിരിക്കേയാണ് കണ്ടെയിനര്‍ ഇറക്കുന്നതിന്‍റെ ശേഷി പരീക്ഷിക്കാന്‍ കണ്ടെയിനറുമായി മറ്റൊരു മദര്‍ഷിപ്പ് വിഴിഞ്ഞത്ത് എത്തുന്നത്. സ്വിറ്റ്‌സര്‍ലന്‍ഡിലെ ജനീവ ആസ്ഥാനമാക്കിയുള്ള എം എസ് സി കപ്പല്‍ കമ്പനി ലോകത്തിലെ ഏറ്റവും വലിയ കപ്പല്‍ കമ്പനിയാണ്.
Also Read : തുറമുഖം നിശ്ചലമാക്കുന്ന സൈബർ ആക്രമണം; വിഴിഞ്ഞത്തേക്കും വരുമോ? പഠനത്തിനൊരുങ്ങി കേരള സര്‍വകലാശാല
