ന്യൂഡല്‍ഹി: മുൻ മേധാവി ബ്രിജ് ഭൂഷൺ ശരൺ സിങ്ങിന്‍റെ വസതിയിൽ നിന്നാണ് തങ്ങളുടെ പ്രവർത്തനങ്ങൾ നടക്കുന്നതെന്ന് സമ്മതിച്ച് റെസ്ലിങ്‌ ഫെഡറേഷൻ ഓഫ് ഇന്ത്യ (WFI). ഇത് ഒരു താത്കാലിക ക്രമീകരണമാണെന്നും അടുത്ത മാസം ആദ്യം കൊണാട്ട് പ്ലേസിലുള്ള പുതിയ ഓഫീസിലേക്ക് മാറുമെന്നും റെസ്ലിങ്‌ ഫെഡറേഷൻ ഓഫ് ഇന്ത്യ അറിയിച്ചതായി വാര്‍ത്ത ഏജന്‍സിയായ പിടിഐയാണ് റിപ്പോര്‍ട്ട് ചെയ്‌തിരിക്കുന്നത്. കായിക താരങ്ങളുടെ ലൈംഗിക പീഡന പരാതിയെ തുടര്‍ന്ന് റെസ്ലിങ്‌ ഫെഡറേഷന്‍റെ അധ്യക്ഷ സ്ഥാനം ഒഴിയേണ്ടി വരികയും നിയമനടപടികള്‍ നേരിടുകയും ചെയ്യുന്നയാളാണ് ബിജെപി നേതാവ് കൂടിയായ ബ്രിജ് ഭൂഷൺ ശരൺ സിങ്.
2023 ഡിസംബറിൽ കായിക മന്ത്രാലയം താൽക്കാലികമായി ഡബ്ല്യൂഎഫ്ഐ സസ്പെന്‍ഡ് ചെയ്‌തിരുന്നു. അതേസമയം, ബ്രിജ്ഭൂഷണ്‍ ശരണ്‍ സിങ്ങിന്‍റെ അശോക റോഡിലെ വസതിയുടെ മേല്‍വിലാസത്തിലാണ് ഫെഡറേഷന്‍ ഇപ്പോഴുമുള്ളത്.
തങ്ങൾ ഹരി നഗറിലെ ഒരു ചെറിയ ഓഫീസിൽ നിന്നാണ് പ്രവർത്തിച്ചതെന്നും മെച്ചപ്പെട്ട സ്ഥലം തേടുകയായിരുന്നു എന്നും ഡബ്ല്യൂഎഫ്ഐ വൃത്തം പറഞ്ഞു. സർക്കാരിന്‍റെ സസ്പെൻഷൻ മൂലമുള്ള അനിശ്ചിതത്വം മൂലമാണ് പൂര്‍ണമായും ഓഫീസിലേക്ക് മാറുന്നത് വൈകിയതെന്ന് വൃത്തം വിശദീകരിച്ചു. വസന്ത പഞ്ചമി ദിനത്തിലാണ് കോണാട്ട് പ്ലേസിലെ പുതിയ ഓഫീസിലേക്ക് മാറുന്നത്.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
ഡിസംബർ 21 ന് പുതിയ ഭാരവാഹികളെ തെരഞ്ഞെടുത്ത് നാഷണൽസിനെ പ്രഖ്യാപിച്ചപ്പോഴാണ് മന്ത്രാലയം ഡബ്ല്യൂഎഫ്ഐയെ സസ്പെൻഡ് ചെയ്‌തത്. നിയമം അനുസരിച്ച്, ഒരു യോഗം വിളിച്ച് തീരുമാനം പ്രഖ്യാപിക്കാൻ 15 ദിവസത്തെ നോട്ടീസ് ആവശ്യമായിരുന്നു.
എന്നാൽ ആ വർഷത്തിൽ 10 ദിവസം മാത്രം ബാക്കിയുണ്ടായിരുന്നതിനാല്‍ 15 ദിവസത്തെ നോട്ടീസ് നിയന്ത്രണം പാലിക്കുന്നത് അസാധ്യമായിരുന്നു. 15 ദിവസത്തെ കാത്തിരിപ്പ് ഗുസ്‌തി താരങ്ങള്‍ക്ക് ഒരു വർഷം നഷ്‌ടപ്പെടാൻ ഇടയാക്കുമായിരുന്നു. അതിനാൽ ഡബ്ല്യൂഎഫ്ഐ ഉടൻ തന്നെ യുപിയിലെ ഗോണ്ടയിൽ ചാമ്പ്യൻഷിപ്പ് പ്രഖ്യാപിച്ചു എന്നും വൃത്തം വിശദീകരിച്ചു.
ഡബ്ല്യൂഎഫ്ഐ സസ്‌പെൻഷന് ശക്തമായ അടിത്തറയില്ല. തങ്ങളെ ശരിയായി പ്രവർത്തിക്കാൻ അനുവദിക്കുന്നില്ലെന്നും വൃത്തങ്ങള്‍ ആരോപിക്കുന്നു. കരിയർ അവസാനിപ്പിച്ച ഗുസ്‌തിക്കാരാണ് ഹർജികൾ സമർപ്പിക്കുന്നത്. അപ്പോൾ അവർക്ക് ഭീഷണിയില്ല. പക്ഷേ അവർ കായിക രംഗത്തിനും വരാനിരിക്കുന്ന ഗുസ്‌തിക്കാർക്കും ദോഷം ചെയ്യുകയാണ്. അന്താരാഷ്ട്ര മത്സരങ്ങൾക്ക് ടീമുകളെ അയയ്ക്കാൻ പോലും തങ്ങൾ പാടുപെടുന്നു എന്ന് മറ്റൊരു ഡബ്ല്യൂഎഫ്ഐ ഉദ്യോഗസ്ഥൻ പറഞ്ഞു.
ദേശീയ ഫെഡറേഷന്‍റെ കാര്യങ്ങളിൽ രാഷ്ട്രീയ ഇടപെടൽ ഉടൻ അവസാനിച്ചില്ലെങ്കിൽ ഇന്ത്യയെ സസ്പെൻഡ് ചെയ്യുമെന്ന് ലോക ഗുസ്‌തി ഭരണസമിതിയായ യുഡബ്ല്യൂഡബ്ല്യൂ അറിയിച്ചിട്ടുണ്ട്. അതേസമയം, ഡബ്ല്യൂഎഫ്ഐ സസ്പെൻഷൻ മന്ത്രാലയം പുനഃപരിശോധിക്കുമെന്ന് കായിക മന്ത്രി മൻസുഖ് മാണ്ഡവ്യ അറിയിച്ചിരുന്നു.
Also Read: എഎപിക്ക് പരാജയ ഭീതി: ആം ആദ്‌മി നാടകം കളിക്കുകയാണെന്ന് ബിജെപിയുടെ പരിഹാസം - THREAT TOWARDS KEJRIWAL
