'ആറ്' അടിച്ച് ആഴ്‌സണല്‍, പ്രീമിയര്‍ ലീഗില്‍ ഷെഫീല്‍ഡ് യുണൈറ്റഡിന് വമ്പൻ തോല്‍വി

പ്രീമിയര്‍ ലീഗ്: ഷെഫീല്‍ഡ് യുണൈറ്റഡിനെതിരായ മത്സരത്തില്‍ എതിരില്ലാത്ത ആറ് ഗോളിന്‍റെ ജയം സ്വന്തമാക്കി ആഴ്‌സണല്‍.

ലണ്ടൻ: പ്രീമിയര്‍ ലീഗില്‍ (Premier League) കിരീടത്തിനായി ഇഞ്ചോടിഞ്ച് പോരാട്ടം. പോയിന്‍റ് പട്ടികയില്‍ ആദ്യ മൂന്ന് സ്ഥാനക്കാര്‍ തമ്മില്‍ ഓരോ പോയിന്‍റ് വ്യത്യാസമാണ് നിലവില്‍. സീസണിലെ 27-ാം മത്സരത്തില്‍ ജയം സ്വന്തമാക്കിയതോടെയാണ് ആഴ്‌സണല്‍ (Arsenal) പോയിന്‍റ് പട്ടികയിലെ ഒന്നും രണ്ടും സ്ഥാനക്കാരായ ലിവര്‍പൂള്‍ (Liverpool), മാഞ്ചസ്റ്റര്‍ സിറ്റി (Manchester City) എന്നിവരുമായുള്ള ലീഡ് കുറച്ചത്.

കഴിഞ്ഞ മത്സരത്തില്‍ ഷെഫീല്‍ഡ് യുണൈറ്റഡിനെയാണ് ആഴ്‌സണല്‍ തകര്‍ത്തത്. ഷെഫീല്‍ഡിന്‍റെ ഹോം ഗ്രൗണ്ടില്‍ നടന്ന മത്സരത്തില്‍ എതിരില്ലാത്ത ആറ് ഗോളിനായിരുന്നു പീരങ്കിപ്പടയുടെ ജയം. സീസണില്‍, ആഴ്‌സണലിന്‍റെ 19-ാം ജയമാണിത് (Sheffield United vs Arsenal Result).

ലീഗില്‍ മൂന്നാം സ്ഥാനക്കാരായ ആഴ്‌സണലിന് 61 പോയിന്‍റാണ്. 62 പോയിന്‍റോടെയാണ് മാഞ്ചസ്റ്റര്‍ സിറ്റി രണ്ടാം സ്ഥാനത്ത് നിലയുറപ്പിച്ചിരിക്കുന്നത്. പോയിന്‍റ് ടേബിളിലെ ഒന്നാം സ്ഥാനക്കാരായ ലിവര്‍പൂളിന് 27 മത്സരങ്ങളില്‍ നിന്നും 63 പോയിന്‍റാണുള്ളത് (Premier League Standings After Matchday 27).

ഷെഫീല്‍ഡ് യുണൈറ്റഡിന്‍റെ ഹോം ഗ്രൗണ്ടായ ബ്രമാള്‍ ലെയ്‌നില്‍ (Bramall Lane) നടന്ന മത്സരത്തില്‍ ആതിഥേയരെ നിഷ്‌ഭ്രമമാക്കുന്ന പ്രകടനമായിരുന്നു ഇംഗ്ലീഷ് വമ്പന്മാരായ ആഴ്‌സണല്‍ കാഴ്‌ചവെച്ചത്. മത്സരത്തിന്‍റെ അഞ്ചാം മിനിറ്റിലാണ് പീരങ്കിപ്പട ഗോള്‍ വേട്ട തുടങ്ങിയത്. മാര്‍ട്ടിൻ ഒഡേഗാര്‍ഡായിരുന്നു (Martin Odegard) ഗണ്ണേഴ്‌സിനായി ഗോളടിമേളം തുടങ്ങിവച്ചത്.

മത്സരത്തിന്‍റെ 13-ാം മിനിറ്റില്‍ ജെയ്‌ഡൻ ബോഗ്ലെയുടെ (Jayden Bogle) സെല്‍ഫ് ഗോളിലൂടെ ആഴ്‌സണല്‍ ലീഡ് രണ്ടായി ഉയര്‍ന്നു. പിന്നാലെ, ഗ്രബിയേല്‍ മാര്‍ട്ടിനെല്ലിയും (Gabriel Martinelli) സന്ദര്‍ശകര്‍ക്കായി ലക്ഷ്യം കണ്ടു. 15-ാം മിനിറ്റിലായിരുന്നു മാര്‍ട്ടിനെല്ലി ആഴ്‌സണലിനായി ഗോള്‍ നേടിയത്.

കായ് ഹാവെര്‍ട്‌സാണ് (Kai Havertz) അവരുടെ ലീഡ് നാലാക്കി ഉയര്‍ത്തിയത്. മത്സരത്തിന്‍റെ 25-ാം മിനിറ്റിലായിരുന്നു ഗോളിന്‍റെ പിറവി. ഒന്നാം പകുതി അവസാനിക്കുന്നതിന് മുന്‍പ് തന്നെ അഞ്ചാം ഗോളും ഷെഫീല്‍ഡിന്‍റെ വലയില്‍ എത്തിക്കാൻ ഗണ്ണേഴ്സിന് സാധിച്ചു.

39-ാം മിനിറ്റില്‍ ഡെക്ലാൻ റൈസാണ് (Declan Rice) ആഴ്‌സണലിനായി അഞ്ചാമത്തെ ഗോള്‍ നേടിയത്. 5-0 എന്ന നിലയില്‍ ആയിരുന്നു അവര്‍ മത്സരത്തിന്‍റെ ആദ്യ പകുതി അവസാനിപ്പിച്ചത്. രണ്ടാം പകുതിയില്‍ മത്സരത്തിന്‍റെ 58-ാം മിനിറ്റില്‍ ബെൻ വൈറ്റാണ് (Ben White) ആഴ്‌സണലിന്‍റെ ഗോള്‍ പട്ടിക പൂര്‍ത്തിയാക്കിയത്.