പന്തിന്‍റെ തിരിച്ചുവരവില്‍ വമ്പന്‍ ട്വിസ്റ്റ് ; ഡല്‍ഹിക്ക് ആശങ്ക

മത്സര ക്രിക്കറ്റിലേക്കുള്ള ഇന്ത്യയുടെ യുവതാരം റിഷഭ്‌ പന്തിന്‍റെ തിരിച്ചുവരവ് വീണ്ടും ചോദ്യ ചിഹ്നമാവുന്നു. ദേശീയ ക്രിക്കറ്റ് അക്കാദമിയില്‍ താരത്തിന് ക്ലിയറന്‍സ് ലഭിച്ചില്ലെന്ന് റിപ്പോര്‍ട്ട്.

ന്യൂഡല്‍ഹി : ഐപിഎല്ലിന്‍റെ പുതിയ സീസണിലൂടെ റിഷഭ്‌ പന്ത് (Rishabh Pant) കളിക്കളത്തിലേക്ക് തിരികെ എത്തുന്നതിനായി ആകാംക്ഷയോടെ കാത്തിരിക്കുകയാണ് ആരാധകര്‍. ഐപിഎല്‍ 2024 (IPL 2024)- സീസണില്‍ പന്ത് കളിക്കുമെന്ന് ഡല്‍ഹി ക്യാപിറ്റല്‍സ് (Delhi Capitals) പരിശീലകന്‍ റിക്കി പോണ്ടിങ്ങും (Ricky Ponting) ടീം ഡയറക്‌ടര്‍ സൗരവ് ഗാംഗുലിയും (Sourav Ganguly) നേരത്തെ പ്രതികരിച്ചിരുന്നു. എന്നാല്‍ 26-കാരന്‍റെ തിരിച്ചുവരവില്‍ ഒരല്‍പം ആശങ്ക നല്‍കുന്ന റിപ്പോര്‍ട്ടാണ് ഇപ്പോള്‍ പുറത്തുവന്നിരിക്കുന്നത്.

ദേശീയ ക്രിക്കറ്റ് അക്കാദമിയില്‍ നിന്നും പന്തിന് ഇതേവരെ ഫിറ്റ്‌നസ് ക്ലിയറന്‍സ് ലഭിച്ചിട്ടില്ല. പന്ത് മാച്ച് ഫിറ്റായിട്ടില്ലെന്നാണ് മെഡിക്കല്‍ സംഘത്തിന്‍റെ വിലയിരുത്തലെന്നുമാണ് റിപ്പോര്‍ട്ടില്‍ പറയുന്നത്. പുതിയ സീസണിനുള്ള ഡല്‍ഹി ക്യാപിറ്റല്‍സ്‌ സ്‌ക്വാഡില്‍ താരത്തിന് ഇടം ലഭിച്ചിട്ടുമില്ല. ക്ലിയറന്‍സ് ലഭിക്കാതെ കളിക്കാന്‍ കഴിയില്ലെങ്കിലും അധിക താരമായി പന്തിനെ സ്‌ക്വാഡില്‍ ചേര്‍ക്കാന്‍ ഡല്‍ഹിക്ക് അവസരമുണ്ട്. എന്നാല്‍ ഇതിനായി ബിസിസിഐ അനുമതി ലഭിക്കേണ്ടതുണ്ട്.

2022 ഡിസംബര്‍ അവസാനത്തില്‍ ഉണ്ടായ കാര്‍ അപകടത്തെ തുടര്‍ന്ന് റിഷഭ്‌ പന്ത് ക്രിക്കറ്റില്‍ നിന്നും പൂര്‍ണമായി വിട്ടുനില്‍ക്കുകയായിരുന്നു. ഐപിഎല്‍ 2024-ല്‍ പന്ത് കളിക്കുമെന്നും എന്നാല്‍ വിക്കറ്റ് കീപ്പറാവില്ലെന്നുമായിരുന്നു ഗാംഗുലി നേരത്തെ പ്രതികരിച്ചത്. മാര്‍ച്ച് അഞ്ചിന് താരത്തിന് ഫിറ്റ്‌നസ് ക്ലിയറന്‍സ് ലഭിക്കുമെന്ന് പ്രതീക്ഷിക്കുന്നതായും അദ്ദേഹം പറഞ്ഞിരുന്നു.

എന്നാല്‍ തീയതി കഴിഞ്ഞ് ദിനങ്ങള്‍ പിന്നിട്ടിട്ടും പന്തിന് ഫിറ്റ്‌നസ് സര്‍ട്ടിഫിക്കറ്റ് ലഭിക്കാത്ത സാഹചര്യമാണ് നിലവിലുള്ളത്. ഐപിഎല്ലിന് രണ്ട് ആഴ്‌ചകള്‍ മാത്രം ബാക്കി നില്‍ക്കെ പന്ത് കളിക്കുന്നത് വീണ്ടും ചോദ്യ ചിഹ്നമായി മാറുകയാണ്. മാര്‍ച്ച് 22-നാണ് ഐപിഎല്ലിന്‍റെ പുതിയ പതിപ്പിന് അരങ്ങുണരുന്നത്.

ഐപിഎല്ലിന്‍റെ പുതിയ സീസണില്‍ കളിക്കാന്‍ കഴിയുമെന്ന് താരത്തിന് വലിയ ആത്മവിശ്വാസമുണ്ടെന്നായിരുന്നു നേരത്തെ റിക്കി പോണ്ടിങ് പ്രതികരിച്ചത്. തിരിച്ചുവരവില്‍ വിക്കറ്റ് കീപ്പര്‍ ബാറ്ററായി കളിക്കാന്‍ പന്തിന് കഴിയുമോയെന്ന് തനിക്ക് ഉറപ്പില്ലെന്നുമായിരുന്നു പോണ്ടിങ് പറഞ്ഞത്. പോണ്ടിങ്ങിന്‍റെ വാക്കുകള്‍ ഇങ്ങനെ.....

"ഐപിഎല്ലിലെ മുഴുവന്‍ മത്സരങ്ങളും കളിക്കാന്‍ കഴിയുമെന്ന തികഞ്ഞ ആത്മവിശ്വാസത്തിലാണ് റിഷഭ്‌ പന്തുള്ളത്. അവന്‍റെ വിവരങ്ങളെല്ലാം തന്നെ നിങ്ങള്‍ സോഷ്യല്‍ മീഡിയയിലൂടെ അറിഞ്ഞിരിക്കും.

നന്നായി തന്നെ അവന്‍ പ്രവര്‍ത്തിക്കുന്നുണ്ട്. ഈ വർഷം അവന് വിക്കറ്റ് കീപ്പറായി കളിക്കാന്‍ കഴിയുമോയെന്ന് എനിക്ക് ഉറപ്പില്ല. തിരികെ എത്തുന്നതിനെക്കുറിച്ച് അവനോട് ചോദിച്ചാല്‍ 'എല്ലാ മത്സരങ്ങളും കളിക്കുമെന്നും വിക്കറ്റ് കീപ്പിങ്ങിന് തയ്യാറാണെന്നും നാലാം നമ്പറില്‍ ബാറ്റിങ്ങിന് ഇറങ്ങുന്നുണ്ടെന്നും ആയിരിക്കും' അവന്‍ പറയുക. അത്തരത്തിലുള്ളൊരു വ്യക്തിയാണവന്‍. തീർച്ചയായും അവൻ ഞങ്ങളുടെ ക്യാപ്റ്റനാണ്. ഞങ്ങൾക്ക് അവനെ കഴിഞ്ഞ വർഷം അവിശ്വസനീയമാംവിധം മിസ് ചെയ്തു" - റിക്കി പോണ്ടിങ് പറഞ്ഞു.