ഹെെദരാബാദ്: രാജ്യം നാളെ ദേശീയ കായിക ദിനം ആചരിക്കും. ഹോക്കി ഇതിഹാസം മേജർ ധ്യാൻചന്ദിന്‍റെ ജന്മദിനമാണ് കായിക ദിനമായി ആചരിക്കുന്നത്. രാജ്യത്തെ കായിക പാരമ്പര്യം ആഘോഷിക്കുന്നതിനും ഇന്ത്യൻ കായിക പ്രതിഭകളെ ആദരിക്കുന്നതിനുമായി ഓഗസ്റ്റ് 29 ന് ദേശീയ കായിക ദിനം ആഘോഷിക്കും. 1905 ഓഗസ്റ്റ് 29 ന് അഹമ്മദാബാദിലെ ഒരു രജപുത്ര കുടുംബത്തിലാണ് ധ്യാന്‍ ചന്ദ് ജനിച്ചത്. തന്‍റെ പിതാവ് സമേശ്വര്‍ സിങ്ങിനെപ്പോലെ അദ്ദേഹം ഇന്ത്യൻ സൈന്യത്തിൽ ചേരുകയും അവിടത്തെ കായിക വിനോദത്തോട് ഇഷ്ടപ്പെടുകയും ചെയ്‌തു. താരത്തിന്‍റെ യഥാർത്ഥ പേര് ധ്യാന്‍ സിങ് എന്നായിരുന്നു. രാത്രിയിൽ ചന്ദ്രപ്രകാശത്തിൽ മാത്രം പരിശീലിക്കാറുണ്ടായിരുന്നതിനാൽ സഹപ്രവർത്തകർ അദ്ദേഹത്തിന് ധ്യാന്‍ ചന്ദ് എന്ന് പേരിട്ടു.
22 വർഷത്തെ കരിയറിൽ താരം 400 ഗോളുകൾ നേടുകയും മൂന്ന് ഒളിമ്പിക് മെഡലുകൾ സ്വന്തമാക്കുകയും ചെയ്‌തു. ഡൽഹിയിലെ നാഷണൽ ഹോക്കി സ്റ്റേഡിയം 2002-ൽ മേജർ ധ്യാൻചന്ദ് ഹോക്കി സ്റ്റേഡിയം എന്ന് പുനർനാമകരണം ചെയ്‌തു. ഇന്ത്യൻ ഹോക്കിക്ക് അദ്ദേഹം നൽകിയ സംഭാവനകൾക്ക് പത്മഭൂഷൺ നൽകി അദ്ദേഹത്തെ ആദരിച്ചു. പട്യാലയിലെ നാഷണൽ ഇൻസ്റ്റിറ്റ്യൂട്ട് ഓഫ് സ്‌പോർട്‌സിൽ മുഖ്യ പരിശീലകനായിരുന്നു. ഇന്ത്യൻ ഹോക്കി ഇതിഹാസത്തിന്‍റെ പേരിൽ മേജർ ധ്യാൻ ഖേൽ രത്‌ന അവാർഡ് എല്ലാ വർഷവും നൽകിവരുന്നു.
2024 ലെ ദേശീയ കായിക ദിനത്തിന്‍റെ തീമില്‍ വ്യക്തികളെ ഒന്നിപ്പിക്കുന്നതിനും സാമൂഹിക ബന്ധങ്ങൾ ശക്തിപ്പെടുത്തുന്നതിനുമുള്ള ഒരു ഉപകരണമെന്ന നിലയിൽ കായികത്തിന്‍റെ പ്രാധാന്യം തീം എടുത്തുകാണിക്കുന്നു. കായിക ദിനത്തോടനുബന്ധിച്ച് ഒരു മണിക്കൂറെങ്കിലും ഔട്ട്‌ഡോർ ഗെയിമുകളിൽ പങ്കെടുക്കാൻ കേന്ദ്ര യുവജനകാര്യ, കായിക-തൊഴിൽ മന്ത്രി മന്‍സുഖ് മാണ്ഡവ്യ ആവശ്യപ്പെട്ടു.
2019 ലെ ദേശീയ കായിക ദിനത്തിൽ പ്രധാനമന്ത്രി നരേന്ദ്ര മോദി ഇന്ദിരാഗാന്ധി സ്റ്റേഡിയത്തിൽ ഫിറ്റ് ഇന്ത്യ പ്രസ്ഥാനത്തിന് തുടക്കം കുറിച്ചു. ആരോഗ്യകരമായ ജീവിതശൈലി സ്വീകരിക്കാൻ ആളുകളെ പ്രചോദിപ്പിക്കുകയാണ് പ്രസ്ഥാനം ലക്ഷ്യമിടുന്നത്. ശാരീരിക പ്രവർത്തനങ്ങളും കായിക വിനോദങ്ങളും അവരുടെ ദൈനംദിന ജീവിതത്തിൽ ഉൾപ്പെടുത്താൻ പ്രസ്ഥാനം വ്യക്തികളെ പ്രോത്സാഹിപ്പിക്കും.വിവിധ സ്ഥാപനങ്ങൾ പ്രത്യേക ഫിറ്റ്നസ് പ്രോഗ്രാമുകളും കായിക മത്സരങ്ങളും സംഘടിപ്പിച്ച് ദിനം ആഘോഷിക്കുന്നു.
