ഹൈദരാബാദ്: ഇംഗ്ലണ്ടിനെതിരായ ടെസ്‌റ്റ് പരമ്പരയിലെ ആദ്യ മത്സരത്തില്‍ പരാജയപ്പെട്ടതിന് പിന്നാലെ ഇന്ത്യന്‍ നായകന്‍ രോഹിത് ശര്‍മയെ കടന്നാക്രമിച്ച് മുന്‍ ഇംഗ്ലീഷ് താരം മൈക്കല്‍ വോൺ (Michael Vaughan About Rohit Sharma Captaincy). ഹൈദരാബാദ് രാജീവ് ഗാന്ധി അന്താരാഷ്‌ട്ര സ്‌റ്റേഡിയത്തില്‍ നടന്ന മത്സരത്തില്‍ രോഹിതിന്‍റെ ക്യാപ്‌റ്റന്‍സി ശരാശരി മാത്രമായിരുന്നെന്ന് വോണ്‍ പറഞ്ഞു. ഇംഗ്ലണ്ടിന്‍റെ തന്ത്രങ്ങള്‍ക്ക് മറുപടി പറയാന്‍ രോഹിതിന് സാധിച്ചില്ലെന്നും അദ്ദേഹം കൂട്ടിച്ചേര്‍ത്തു.
'ഇവിടെ രോഹിത് ശര്‍മയുടെ ക്യാപ്‌റ്റന്‍സി വെറും ശരാശരി മാത്രമായിരുന്നു എന്നാണ് ഞാന്‍ കരുതുന്നത്. ഇംഗ്ലീഷ് തന്ത്രങ്ങള്‍ക്കെതിരെ പ്രതികരിക്കാന്‍ രോഹിതിന് സാധിക്കുമെന്ന് ഞാന്‍ വിചാരിച്ചു. ഹൈദരാബാദ് ടെസ്‌റ്റില്‍ ഫീല്‍ഡ് കൈകാര്യം ചെയ്യുന്നതിലോ ബൗളിങ് മാറ്റങ്ങള്‍ കൊണ്ട് വരുന്നതിലോ രോഹിത് അത്ര സജീവമായിരുന്നു എന്ന് എനിക്ക് തോന്നുന്നില്ല.' -മൈക്കല്‍ വോണ്‍ അഭിപ്രായപ്പെട്ടു.
ഒലീ പോപ്പിന്‍റെ സ്വീപ്പ് ഷോട്ടുകള്‍ക്കും റിവേഴ്‌സ് സ്വീപ്പിനും ഉത്തരം പറയാന്‍ രോഹിതിന് സാധിച്ചില്ല. ഇംഗ്ലണ്ടിന് അവിടെ കാര്യങ്ങളെല്ലാം എളുപ്പമായിരുന്നു. ബാസ്ബോള്‍ ശൈലി അനുസരിച്ച് അവര്‍ക്ക് എപ്പോള്‍ വേണമെങ്കിലും ബൗണ്ടറി കണ്ടെത്താന്‍ സാധിക്കും. അറ്റാക്കിങ് ശൈലിയില്‍ ഫീല്‍ഡ് ഒരുക്കിയിരുന്നെങ്കില്‍ ഒരു പരിധി വരെ മത്സരം കൈപ്പിടിയിലാക്കാന്‍ ഇന്ത്യയ്‌ക്കാകുമായിരുന്നു. എന്നാല്‍, തന്‍റെ ബൗളര്‍മാരുടെ മികച്ച ഒരു പന്തിന് വേണ്ടിയായിരുന്നു രോഹിത് അവിടെ കാത്തിരുന്നതെന്നും മൈക്കല്‍ വോണ്‍ ചൂണ്ടിക്കാട്ടി.
ഹൈദരാബാദ് ക്രിക്കറ്റ് ടെസ്‌റ്റില്‍ 28 റണ്‍സിനാണ് ടീം ഇന്ത്യ പരാജയപ്പെട്ടത്. മത്സരത്തിന്‍റെ നാലാം ദിനത്തിലായിരുന്നു ഇന്ത്യയുടെ തോല്‍വി. ഇംഗ്ലണ്ട് ഉയര്‍ത്തിയ 231 റണ്‍സ് വിജയലക്ഷ്യത്തിലേക്ക് ബാറ്റ് വീശിയ ഇന്ത്യയ്‌ക്ക് രണ്ടാം ഇന്നിങ്‌സില്‍ 202 റണ്‍സാണ് നേടാനായത് (India vs England 1st Test Result).
ഒന്നാം ഇന്നിങ്‌സില്‍ 190 റണ്‍സിന്‍റെ ലീഡ് സ്വന്തമാക്കിയ ശേഷമായിരുന്നു ഇന്ത്യ മത്സരം കൈവിട്ടത്. ടോസ് നേടി ആദ്യം ബാറ്റ് ചെയ്‌ത ഇംഗ്ലണ്ടിന് ആദ്യ ഇന്നിങ്‌സില്‍ 246 റണ്‍സ് മാത്രമാണ് നേടാന്‍ സാധിച്ചത്. മറുപടി ബാറ്റിങ്ങില്‍ ഇന്ത്യ 436 റണ്‍സ് നേടി പുറത്തായി.
Also Read: 'യുവതാരങ്ങള്‍ വിരാട് കോലിയില്‍ നിന്നും പഠിക്കേണ്ടത് ഈ കാര്യങ്ങളാണ്'; വിശദീകരിച്ച് രോഹിത് ശര്‍മ
തുടര്‍ന്ന്, രണ്ടാം ഇന്നിങ്‌സ് ബാറ്റ് ചെയ്യാനെത്തിയ ഇംഗ്ലണ്ട് 420 റണ്‍സാണ് അടിച്ചെടുത്തത്. 196 റണ്‍സ് നേടിയ ഒലീ പോപ്പിന്‍റെ പ്രകടനമായിരുന്നു ഇംഗ്ലണ്ട് ഇന്നിങ്‌സില്‍ നിര്‍ണായകമായത്. മറുപടി ബാറ്റിങ്ങിനിറങ്ങിയ ഇന്ത്യയെ, ഏഴ് വിക്കറ്റ് നേടിയ അരങ്ങേറ്റക്കാരന്‍ ടോം ഹാര്‍ട്‌ലിയുടെ പ്രകടനമാണ് തകര്‍ത്തത്. 39 റണ്‍സ് നേടിയ രോഹിത് ശര്‍മയായിരുന്നു രണ്ടാം ഇന്നിങ്‌സില്‍ ഇന്ത്യയുടെ ടോപ് സ്കോറര്‍.
