അഹമ്മദാബാദ്: ഇന്ത്യന്‍ പ്രീമിയര്‍ ലീഗ് എലിമിനേറ്ററില്‍ രാജസ്ഥാന് റോയല്‍സ് ഇന്ന് റോയല്‍ ചലഞ്ചേഴ്‌സ് ബെംഗളൂരുവിനെതിരെ. അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ വൈകീട്ട് ഏഴരയ്‌ക്കാണ് ഇരു ടീമുകളും പോരിനിറങ്ങുന്നത്. തോല്‍ക്കുന്ന ടീമിന് പുറത്തേക്കുള്ള വാതില്‍ തുറക്കുമെന്നിരിക്കെ ഇരുവര്‍ക്കുമിത് ജീവന്‍ മരണപ്പോരാട്ടമാണ്.
വിജയിച്ചാല്‍ രണ്ടാം ക്വാളിഫയറിന് യോഗ്യത നേടി ഫൈനലിന് ഒരുപടി അടുക്കാന്‍ കഴിയും. ലീഗ് ഘട്ടത്തില്‍ മൂന്നാമതായിരുന്നു രാജസ്ഥാന് റോയല്‍സ് ഫിനിഷ് ചെയ്യുന്നത്. സഞ്‌ജു സാംസണ്‍ നയിക്കുന്ന രാജസ്ഥാന് സീസണില്‍ സ്വപ്‌ന തുല്യമായ തുടക്കമായിരുന്നു നേടിയത്.
ആദ്യത്തെ ഒമ്പത് മത്സരങ്ങളിൽ എട്ടും ജയിച്ച് പോയിന്‍റ് പട്ടികയില്‍ തലപ്പത്തായിരുന്നു അവര്‍. എന്നാല്‍ പിന്നീട് ടീം തീര്‍ത്തും നിറം മങ്ങി. അവസാനത്തെ അഞ്ച് മത്സരങ്ങളില്‍ ഒന്നില്‍ പോലും ടീമിന് വിജയിക്കാന്‍ കഴിഞ്ഞിട്ടില്ല. അവസാനത്തെ മത്സരം മഴയെടുത്തതും രാജസ്ഥാന് തിരിച്ചടിയായി. ഇതോടെയാണ് ക്വാളിഫയര്‍ കളിക്കുമെന്ന് പ്രതീക്ഷിച്ച ടീമിന് എലിമിനേറ്ററിന് ഇറങ്ങേണ്ടി വന്നത്.
നാട്ടിലേക്ക് മടങ്ങിയ ഓപ്പണര്‍ ജോസ്‌ ബട്‌ലര്‍ക്ക് പകരക്കാരനെ കണ്ടെത്താന്‍ ഇതേവരെ രാജസ്ഥാന് കഴിഞ്ഞിട്ടില്ല. ബാറ്റിങ്ങില്‍ റിയാന്‍ പരാഗ് മാത്രമാണ് സ്ഥിരതയോടെ കളിക്കുന്നത്. നിര്‍ണായക മത്സരത്തില്‍ യശസ്വി ജയ്‌സ്വാളും സഞ്‌ജുവും ഉള്‍പ്പെടെയുള്ള താരങ്ങള്‍ മികവിനൊത്ത് ഉയര്‍ന്നില്ലെങ്കില്‍ രാജസ്ഥാന് പ്രതിരോധത്തിലാവും. സ്‌പിന്നര്‍മാര്‍ക്ക് മികവ് പുലര്‍ത്താന്‍ കഴിയുന്ന അഹമ്മദാബാദില്‍ യുസ്‌വേന്ദ്ര ചാഹല്‍, ആര്‍ അശ്വിന്‍ എന്നിവരുടെ പ്രകടനം ടീമിന് ഏറെ നിര്‍ണായകമാണ്.
മറുവശത്ത് പോയിന്‍റ് ടേബിളില്‍ നാലാം സ്ഥാനത്ത് എത്തിയാണ് ബെംഗളൂരു എലിമിനേറ്ററില്‍ സീറ്റുറപ്പിച്ചത്. അതും അമ്പരപ്പിക്കുന്ന കുതിപ്പുമായി. ആദ്യ ഘട്ടത്തില്‍ തുടര്‍ തോല്‍വികളാല്‍ വലയുകയായിരുന്നു ബെംഗളൂരു.
എട്ട് മത്സരങ്ങളില്‍ ഏഴിലും തോല്‍വി വഴങ്ങി. എന്നാല്‍ പിന്നീട് ടീമിന്‍റെ വമ്പന്‍ ഉയര്‍ത്തെഴുന്നേല്‍പ്പാണ് കാണാന്‍ കഴിഞ്ഞത്. തുടര്‍ന്ന് കളിച്ച ആറ് മത്സരങ്ങളിലും ഫാഫ് ഡുപ്ലെസിസിന്‍റെ സംഘം വിജയം പിടിച്ചു. ബാറ്റിങ് യൂണിറ്റ് തിളങ്ങുമ്പോളും ബോളിങ് യൂണിറ്റിന്‍റെ മോശം പ്രകടനമായിരുന്നു ടീമിന് ഏറെ തലവേദനയായത്.
ALSO READ: പടിക്കെട്ടിലിരുന്ന് കരഞ്ഞ് രാഹുല്‍ ത്രിപാഠി; ഹൃദയഭേദകമെന്ന് ആരാധകര്‍ - Rahul Tripathi Run Out
നിലവില്‍ മികച്ച ഫോമിലാണ് ബെംഗളൂരു ബോളര്‍മാര്‍ പന്തെറിയുന്നത്. ടീം ഗെയിമാണ് അവര്‍ കളിക്കുന്നത്. വിരാട് കോലി, ഫാഫ് ഡുപ്ലെസിസ്, രജത് പടിദാര്‍, കാമറൂണ്‍ ഗ്രീന്‍, ദിനേശ് കാര്‍ത്തിക് എന്നിവരെ പിടിച്ചുകെട്ടാന്‍ രാജസ്ഥാന് വിയര്‍ക്കേണ്ടി വരും.
എന്നാല്‍ ലീഗ് ഘട്ടത്തിൽ തമ്മില്‍ ഏറ്റുമുട്ടിയപ്പോള്‍ ബെംഗളൂരുവിനെ തോല്‍പ്പിച്ചതിന്‍റെ ആത്മവിശ്വാസം രാജസ്ഥാന് ആത്മവിശ്വാസം പകരുന്നതാണ്. മത്സരം ടെലിവിഷനില്‍ സ്റ്റാർ സ്പോർട്‌സ് ചാനലുകളിലും ഓള്‍ലൈനായി ജിയോസിനിമ അപ്ലിക്കേഷനിലും തത്സമയം കാണാം.
