ബെംഗളൂരു: ചിന്നസ്വാമി സ്റ്റേഡിയത്തിൽ ടോസ് നേടിയ ബംഗളൂരു ക്യാപ്റ്റൻ ഫാഫ് ഡ്യൂപ്ലെസിസ് പഞ്ചാബിനെ ബാറ്റ് ചെയ്യാൻ അയക്കുകയായിരുന്നു. നായകൻ്റെ തീരുമാനം ശരിവെക്കുന്ന തരത്തിലുള്ള ബൌളിങ്ങാണ് പേസർ യാഷ് ദയാൽ പുറത്തെടുത്തത്. പിച്ചിൽ മികച്ച ലെങ്ത്തും സ്വിങ്ങും കണ്ടെത്താനായ ദയാലിൻ്റെ പന്തുകൾ ശിഖർ ധവാനടക്കമുള്ള പഞ്ചാബ് ബാറ്റിങ്ങ് നിരയെ വല്ലാതെ കുഴക്കി.ആദ്യ ആറ് ഓവറുകൾ മന്ദഗതിയിലായിരുന്ന സ്കോറിങ്ങ് പതുക്കെ ഉച്ചസ്ഥായിയിലെത്തി. ശിഖർ ധവാൻ്റെ നായകത്വത്തിലിറങ്ങിയ പഞ്ചാബ് കിങ്ങ്സ് പിന്നീടങ്ങോട്ട് കാണികളെ പുളകം കൊള്ളിച്ച ബാറ്റിങ്ങ് പ്രകടനം തന്നെ പുറത്തെടുത്തു. 37 പന്തിൽ 45 റൺസ് നേടിയ നായകൻ തൊട്ട് ബാറ്റ് ചെയ്യാനിറങ്ങിയ എട്ടു പേരും ട്വൻ്റി ട്വൻ്റി സ്റ്റൈലിൽ കളിച്ചപ്പോൾ സ്കോർ ബോർഡിൽ പഞ്ചാബ് എഴുതിച്ചേർത്തത് 6 വിക്കറ്റിന് 176 റൺസ്.
മറുപടി ബാറ്റിങ്ങിനിറങ്ങിയ ബംഗളൂരു നിരയിൽ വിദേശ താരങ്ങൾ നിറം മങ്ങിയപ്പോൾ അനുഭവ സമ്പന്നരായ വിരാട് കോഹ്ലിയും ദിനേഷ് കാർത്തിക്കും നടത്തിയ ഉജ്വല ബാറ്റിങ്ങിൻ്റെ ബലത്തിൽ ലക്ഷ്യം നേടി. ഏഴ് പന്തിൽ മൂന്ന് റൺസെടുത്ത ഡ്യൂപ്ലെസിസും 5 പന്തിൽ 3 റൺസെടുത്ത കാമറൂൺ ഗ്രീനും 5 പന്തിൽ 3 റൺസെടുത്ത ഗ്ലെൻ മാക്സ്വെല്ലും താളം കണ്ടെത്താൻ ബുദ്ധിമുട്ടിയ അനുജ് റാവത്തും ബാക്കിവെച്ചതൊക്കെ ചുമലിലേറ്റാൻ കോലിയും കൂട്ടായത് ഫിഫ്ത്ത് ഡൌണായി ഇറങ്ങിയ ദിനേഷ് കാർത്തിക്കും മഹിപാൽ ലൊംറോറും മാത്രമാണ് ഉണ്ടായത്.
49 പന്തിൽ നിന്ന് 77 റൺസെടുത്ത വിരാട് കോഹ്ലി ഐ പിഎല്ലിലെ റൺ വേട്ടയ്ക്കും തുടക്കമിട്ടു. രണ്ട് കളികളിൽ നിന്ന് 93 റൺസെടുത്ത കോഹ്ലി ഓറഞ്ച് ക്യാപ്പ് പട്ടികയിലും മുന്നിലെത്തി. ട്വൻ്റി ട്വൻ്റിയിൽ നൂറാം അർദ്ധ സെഞ്ച്വറിയെന്ന നേട്ടവും ചിന്നസ്വാമി സ്റ്റേഡിയത്തിൽ ഹോളി ദിനത്തിൽ കോഹ്ലി സ്വന്തമാക്കി.11 ഫോറും രണ്ട് കൂറ്റൻ സിക്സും അടങ്ങിയതായിരുന്നു കോഹ്ലിയുടെ ഇന്നിങ്ങ്സ്.രണ്ടുതവണ , ആദ്യം പൂജ്യത്തിലും പിന്നീട് 33 ലും വെച്ച് സാം കരണിൻ്റെ പന്തുകളിൽ കൈവിട്ട ക്യാച്ചുകളിലൂടെ പുനർജീവൻ നേടിയാണ് കോഹ്ലി ചിന്നസ്വാമിയിൽ തകർപ്പൻ ഇന്നിങ്ങ്സ് കാഴ്ചവെച്ചത്. നിർണ്ണായക മുഹൂർത്തത്തിൽ കോഹ്ലിയുടെ വിക്കറ്റ് വീണതോടെ ബംഗളൂരു ആരാധകർ നിശ്ശബ്ദരായി.
ഹർഷൽ പട്ടേലിൻ്റെ പന്തിൽ ഹർപ്രീത് ബ്രാറിന് ക്യാച്ച് സമ്മാനിച്ച് കോലി മടങ്ങുമ്പോൾ ബംഗളൂരുവിന് ജയിക്കാൻ 24 പന്തിൽ നിന്ന് 47 റൺസ് വേണ്ടിയിരുന്നു. പരിചയ സമ്പന്നനായ ദിനേഷ് കാർത്തിക്കും രാജസ്ഥാൻ താരം മഹിപാൽ ലോംറോറും ചേർന്ന് പിന്നെ നടത്തിയത് 'പഞ്ചാബ് ദഹനം'തന്നെയായിരുന്നു.10 പന്തിൽ നിന്ന് 3 ഫോറും 2 സിക്സും പായിച്ച് ദിനേഷ് കാർത്തിക് 28 റൺസ് നേടി. 8 പന്തിൽ നിന്ന് രണ്ട് ഫോറും ഒരു സിക്സുമടക്കം മഹിപാൽ 17 റൺസ് നേടി.നിർണ്ണായകമായ അവസാന ഓവറുകളിൽ പഞ്ചാബ് ബൌളർമാരായ ഹർഷൽ പട്ടേലിനും സാം കരണിനും അർഷദിപ് സിങ്ങിനുമൊന്നും റണ്ണൊഴുക്ക് തടയാനായില്ല.
