ധര്‍മ്മശാല: ഐപിഎല്ലില്‍ രവീന്ദ്ര ജഡേജയുടെ ഓള്‍റൗണ്ടിങ് മികവില്‍ പഞ്ചാബ് കിങ്സിനെ 28 റണ്‍സിന് തോല്‍പ്പിച്ച് ചെന്നൈ സൂപ്പര്‍ കിങ്‌സ്. ആദ്യം ബാറ്റ് ചെയ്‌ത ചെന്നൈ ഉയര്‍ത്തിയ 168 റണ്‍സിന്‍റെ വിജയലക്ഷ്യം പിന്തുടര്‍ന്ന പഞ്ചാബിന് നിശ്ചിത ഓവറില്‍ ഒമ്പത് വിക്കറ്റ് നഷ്‌ടത്തില്‍ 139 റണ്‍സെടുക്കാനെ സാധിച്ചുള്ളൂ. ബാറ്റെടുത്തപ്പോള്‍ 26 പന്തില്‍ 43 റണ്‍സ് നേടി ചെന്നൈയുടെ ടോപ് സ്കോററായ ജഡേജ പന്തെടുത്തപ്പോള്‍ മൂന്ന് വിക്കറ്റുകളുമായി തിളങ്ങി. നാല് ഓവറില്‍ വെറും 20 റണ്‍സ് മാത്രമാണ് താരം വഴങ്ങിയത്.
ലക്ഷ്യം പിന്തുടരാനിറങ്ങിയ പഞ്ചാബ് കിങ്‌സിന് മോശം തുടക്കമായിരുന്നു ലഭിച്ചത്. ജോണി ബെയര്‍‌സ്റ്റോ (6 പന്തില്‍ 7), റിലീ റോസോ (3 പന്തില്‍ 0) എന്നിവരെ രണ്ടാം ഓവറില്‍ തന്നെ തുഷാര്‍ ദേശ്‌പാണ്ഡെ തിരിച്ചയച്ചു. തുടര്‍ന്ന് ഒന്നിച്ച പ്രഭ്‌സിമ്രാന്‍ സിങ്ങും ശശാങ്ക് സിങ്ങും നന്നായി കളിച്ചു. 53 റണ്‍സ് നീണ്ടുനിന്ന കൂട്ടുകെട്ട് പൊളിച്ച് അപകടമൊഴിവാക്കിയത് മിച്ചല്‍ സാന്‍റ്‌നറാണ്.
ശശാങ്ക് സിങ്ങിനെ (20 പന്തില്‍ 27) സിമര്‍ജീത് സിങ് കയ്യിലൊതുക്കുകയായിരുന്നു. വൈകാതെ പ്രഭ്‌സിമ്രാനെ ജഡേജ മടക്കുമ്പോള്‍ 8.6 ഓവറില്‍ നാലിന് 68 റണ്‍സായിരുന്നു പഞ്ചാബ് ടോട്ടലില്‍. എന്നാല്‍ വെറും 10 റണ്‍സ് കൂട്ടിച്ചേര്‍ക്കുന്നതിനിടെ ജിതേഷ് ശര്‍മ (1 പന്തില്‍ 0), സാം കറന്‍ (11 പന്തില്‍ 7), അശുതോഷ് ശര്‍മ (10 പന്തില്‍ 3) എന്നിവര്‍ കൂടി വീണതോടെ പഞ്ചാബ് പ്രതിരോധത്തിലായി.
