ഹൈദരാബാദ് : രജത് പട്ടീദാര്‍ എന്ന മധ്യപ്രദേശ് താരത്തെ അറിയുക ചേതേശ്വര്‍ പൂജാരയും അജിങ്ക്യ രഹാനെയും പോലുളള മുതിര്‍ന്ന താരങ്ങള്‍ ടീമിലേക്കുള്ള വിളി കാത്തിരിക്കുമ്പോള്‍ വിരാട് കോഹ്ലിക്ക് പകരക്കാരനായി ടീമിലേക്ക് വിളി എത്തിയ താരത്തെ അധികമാര്‍ക്കും പരിചയം കാണില്ല(Indian Cricketer Rajat Patidar And His Importance). മധ്യ പ്രദേശ് ബാറ്റര്‍ മുപ്പതു കാരനായ രജത് പട്ടീദാര്‍ ഇംഗ്ലണ്ടിനെതിരെ അഹമ്മദാബാദില്‍ ഇന്ത്യാ എ ടീമിനു വേണ്ടി നടത്തിയ മിന്നുന്ന പ്രകടനമാണ് ടീമിലേക്കുള്ള വഴി തുറന്നത്.
ഇംഗ്ലണ്ട് ലയണ്‍സിനെതിരെ ഇന്ത്യ എ യ്ക്കg വേണ്ടി ക്രീസിലെത്തിയ രജത് പട്ടീദാര്‍ 158 പന്തില്‍ നിന്ന് 151 റണ്‍സ് എടുത്തിരുന്നു. ഫസ്റ്റ് ക്ലാസ് ക്രിക്കറ്റില്‍ 12 സെഞ്ച്വറികള്‍ അടക്കം 4000 റണ്‍സ് ആണ് ഈ സ്പെഷ്യലിസ്റ്റ് ബാറ്ററുടെ സംഭാവന. ഏറെക്കാലം തഴയപ്പെട്ട ശേഷം ഇക്കഴിഞ്ഞ ഡിസംബറിലാണ് രജത് പട്ടീദാര്‍ ഏകദിന അന്താരാഷ്ട്ര ക്രിക്കറ്റില്‍ അരങ്ങേറ്റം കുറിച്ചത്. അതും ദക്ഷിണാഫ്രിക്കക്കെതിരെ. 93 ഇന്നിങ്ങ്സുകളില്‍ നിന്നായി 45.97 ശരാശരിയില്‍ ഇരുപത്തി രണ്ട് അര്‍ദ്ധശതകങ്ങളും രജതിന്‍റെ പേരിലുണ്ട്.
2022 ജൂണില്‍ മധ്യ പ്രദേശ് നടാടെ രഞ്ജി കിരീടത്തില്‍ മുത്തമിട്ടപ്പോള്‍ ഇന്നിങ്ങ്സിന്‍റെ നെടുംതൂണായി നിന്നത് രജതായിരുന്നു. മുംബൈക്കെതിരായ ഫൈനലില്‍ സെഞ്ച്വറി നേടി ഉജ്വല പ്രകടനമാണ് രജത് കാഴ്ച വെച്ചത്. പ്രതികൂല സാഹചര്യങ്ങളോട് പൊരുതി മുന്നേറിയ ചരിത്രമാണ് ഈ മധ്യ പ്രദേശ് താരത്തിന് എന്നും. 2022 ഐ പി എല്‍ താര ലേലത്തില്‍ ലേലം കൊള്ളാന്‍ ആരുമില്ലാതെ പോയ താരമായിരുന്നു രജത് പട്ടീദാര്‍. എന്നാല്‍ അത് കാര്യമാക്കാതെ തൊട്ടടുത്ത ദിവസം തന്നെ രഞ്ജി സീസണ്‍ കളിക്കാനിറങ്ങിയ പട്ടീദാര്‍ ഗുജറാത്തിനെതിരെ നേടിയ രണ്ട് അര്‍ധ സെഞ്ച്വറികളിലൂടെ മധ്യ പ്രദേശിന് നിര്‍ണ്ണായക ലീഡ് നേടിക്കൊടുത്തു.
നാല് ഇന്നിങ്ങ്സുകളില്‍ നിന്നായി 83.75 ശരാശരിയില്‍ 335 റണ്‍സ് അടിച്ചെടുത്ത പട്ടീദാറിനെ തേടി ഏറെ വൈകാതെ റോയല്‍ ചാലഞ്ചേഴ്സ് ബാംഗ്ളൂരില്‍ നിന്ന് വിളിയെത്തി. വിവാഹത്തിനൊരുങ്ങുകയായിരുന്ന രജത് പട്ടീദാര്‍ എല്ലാം മാറ്റി വെച്ച് ഐ പിഎല്‍ കളിക്കാനെത്തി. പ്ലേ ഓഫ് മല്‍സരത്തില്‍ സെഞ്ച്വറി അടിച്ച അണ്‍കാപ്പ്ഡ് ഇന്ത്യന്‍ താരമെന്ന ബഹുമതിയും രജത് സ്വന്തമാക്കി.
ലഖ്നൗ സൂപ്പര്‍ ജയന്‍റ്സിനെതിരെ ഈഡന്‍ ഗാര്‍ഡന്‍സിലായിരുന്നു ആ പ്രകടനം. 8 ഇന്നിങ്ങ്സുകളില്‍ നിന്നായി 152.5 ശരാശരിയില്‍ 323 റണ്‍സായിരുന്നു ആ ഐ പി എല്‍ സീസണിലെ പട്ടീദാറിന്‍റെ സമ്പാദ്യം. 2022 ല്‍ത്തന്നെ ഇന്ത്യ എ ക്കു വേണ്ടിയും പട്ടീദാര്‍ അരങ്ങേറ്റം കുറിച്ചു. ന്യൂസിലണ്ട് എ ടീമിനെതിരെ രണ്ട് സെഞ്ച്വറികളടിച്ച് വരവറിയിച്ച താരം സെലക്റ്റര്‍മാരുടെ ശ്രദ്ധ പിടിച്ചു പറ്റി.
ആദ്യം ഫാസ്റ്റ് ബൗളറാകാന്‍ കൊതിച്ച പട്ടീദാര്‍ അത് സാധിക്കാതെ വന്നതോടെ ഓഫ് സ്പിന്നറാകാന്‍ ശ്രമം തുടങ്ങി. പരിക്കിനെത്തുടര്‍ന്ന് ബൗളറാവാനുള്ള ശ്രമങ്ങള്‍ ഉപേക്ഷിച്ച ബാറ്റിങ്ങില്‍ ശ്രദ്ധ കേന്ദ്രീകരിച്ചു. ബറോഡക്കെതിരായ രഞ്ജി അരങ്ങേറ്റത്തില്‍ത്തന്നെ രജത് സെഞ്ച്വറി നേടിയിരുന്നു.
ശുഭ്മാന്‍ ഗില്‍, കെ എല്‍ രാഹുല്‍, ശ്രേയസ് അയ്യര്‍, വിക്കറ്റ് കീപ്പര്‍ ബാറ്റ്സ്മാന്‍മാരായ കെ എസ് ഭരത്, ധ്രുവ് ജൂറെല്‍ എന്നിവരില്‍ ഒരാളും അടക്കമുള്ള ബാറ്റിങ്ങ് നിര മധ്യ നിരയ്ക്ക് കരുത്തു പകരാനുള്ളപ്പോള്‍ കളത്തിലിറങ്ങാന്‍ രജത് പട്ടീദാറിന് ഇനിയും കാത്തിരിക്കേണ്ടി വന്നേക്കാം.
ഇംഗ്ലണ്ടിനെതിരായ അഞ്ച് മല്‍സരങ്ങളടങ്ങിയ ടെസ്റ്റ് പരമ്പരയിലെ ആദ്യ രണ്ട് ടെസ്റ്റുകള്‍ക്കുള്ള പതിനാറംഗ ടീമിനെ കഴിഞ്ഞയാഴ്ച പ്രഖ്യാപിച്ചിരുന്നു. ശുഭമാന്‍ ഗില്‍, യശസ്വി ജയിസ്വാള്‍, ശ്രേയസ് അയ്യര്‍, കെ എല്‍ രാഹുല്‍, കെ എസ് ഭരത്, ധ്രുവ് ജൂറെല്‍, ആര്‍ അശ്വിന്‍, രവീന്ദ്ര ജഡേജ, അക്സര്‍ പട്ടേല്‍, കുല്‍ദീപ് യാദവ്, മൊഹമ്മദ് സിറാജ്, മുകേഷ് കുമാര്‍, ജസ്പ്രീത് ബുംറ,അവേഷ് ഖാന്‍, ക്യാപ്റ്റന്‍ രോഹിത് ശര്‍മ എന്നിവരടങ്ങിയതാണ് ടീം.
വിരാട് കോഹ്ലി അവധിക്കപേക്ഷിച്ചതോടെ ടീമിലേക്ക് വന്ന ഒഴിവിലേക്ക് അവസരം ലഭിക്കുമെന്ന് ടെസ്റ്റ് സ്പെഷ്യലിസ്റ്റുകളായ പൂജാരയും രഹാനെയും പ്രതീക്ഷിച്ചിരുന്നു. എന്നാല്‍ ഇരുവരേയും പരിഗണിക്കാതെയാണ് രജതിന് അവസരം നല്‍കിയത്. ഹൈദരാബാദില്‍ ടെസ്റ്റിന് മുന്നോടിയായി മാധ്യമങ്ങളെ കണ്ട ക്യാപ്റ്റന്‍ രോഹിത് ശര്‍മയോട് ഇതേക്കുറിച്ച് ചോദിച്ചപ്പോള്‍ മറുപടി ഇങ്ങിനെയായിരുന്നു. " അനുഭവ സമ്പത്തുള്ള മുതിര്‍ന്ന താരങ്ങളെ പരിഗണിക്കണമെന്ന് ഞങ്ങള്‍ ആലോചിച്ചിരുന്നു.
തീര്‍ച്ചയായും അവരുടെ പരിചയസമ്പത്തും നിര്‍ണായക ഘട്ടങ്ങളില്‍ അവര്‍ നടത്തിയ പ്രകടനങ്ങളും കണക്കിലെടുക്കാതെ പോകരുത്. അതേ സമയം യുവ താരങ്ങള്‍ക്ക് അവസരം കിട്ടാതെ പോകാനും പാടില്ല. അവര്‍ എത്ര കാലം കാത്തിരിക്കും. എല്ലാം കൊണ്ടും തെരഞ്ഞെടുപ്പ് കഠിനമായ പരീക്ഷണമായിരുന്നു." മുതിര്‍ന്ന താരങ്ങള്‍ക്ക് മുന്നില്‍ അവസരങ്ങലുടെ വാതില്‍ അടയുന്നില്ലെന്നും മികച്ച പ്രകടനങ്ങള്‍ തുടര്‍ന്നാല്‍ അവര്‍ക്കും അവസരം ലഭിക്കുമെന്നും രോഹിത് ശര്‍മ്മ പറഞ്ഞു.
