ഇസ്രായേൽ-പലസ്‌തീൻ സംഘർഷത്തിനിടയിൽ ഹമാസ് തലവൻ ഇസ്‌മായിൽ ഹനിയയും (62) അംഗരക്ഷകരിൽ ഒരാളും ടെഹ്‌റാനിൽ കൊല്ലപ്പെട്ടതായി സ്ഥിരീകരിച്ചു. ഹിസ്ബുല്ല തലവന്‍മാരിലൊരാളായ ഫൗദ് ഷുകറിനെ വധിച്ചെന്ന് ഇസ്രയേല്‍ സൈന്യം അവകാശപ്പെട്ടതിന്‍റെ പിന്നാലെയാണ്‌ ഹനിയയുടെയും മരണം സ്ഥിരീകരിക്കപ്പെട്ടത്. ഇസ്രായേൽ വ്യോമാക്രമണത്തിലാണ് ഹനിയ കൊല്ലപ്പെട്ടതെന്ന് ഹമാസ് ആരോപിച്ചു.
ഇറാന്‍റെ പുതിയ പ്രസിഡന്‍റിന്‍റെ സ്ഥാനാരോഹണ ചടങ്ങിൽ പങ്കെടുത്ത ശേഷമാണ് ഇറാന്‍ തലസ്ഥാനമായ ടെഹ്റാനില്‍ ഇസ്ലാമിസ്റ്റ് ഗ്രൂപ്പായ ഹമാസിന്‍റെ നേതാവ് ഹനിയ കൊല ചെയ്യപ്പെട്ടതെന്ന് ഇസ്ലാമിക് റെവല്യൂഷണറി ഗാർഡ് കോർപ്‌സ്‌ (ഐആർജിസി) പ്രസ്താവനയില്‍ പറയുന്നു.
"ഇന്ന് രാവിലെ (ജൂലൈ 31) ഇസ്ലാമിക് റെസിസ്റ്റൻസ് ഓഫ് ഹമാസിന്‍റെ രാഷ്‌ട്രീയ കാര്യാലയത്തിന്‍റെ തലവൻ ഇസ്‌മായിൽ ഹനിയയുടെ വസതിയിൽ, ടെഹ്‌റാനിൽ ആക്രമണം ഉണ്ടായി, ഈ സംഭവത്തെത്തുടർന്ന് അദ്ദേഹത്തിന്‍റെ ഒരു അംഗരക്ഷകനും കൊലപ്പെട്ടു." ഐആർജിസി പ്രസ്‌താവനയിൽ വ്യക്തമാക്കി.
സംഭവത്തിന്‍റെ സാഹചര്യങ്ങൾ അന്വേഷിക്കുകയാണെന്ന് ഇറാന്‍റെ റെവല്യൂഷണറി ഗാർഡ്‌സ്‌ പറഞ്ഞു. ഹനിയയുടെ കൊലപാതകത്തെക്കുറിച്ച് ഇസ്രായേൽ ഇതുവരെ പ്രതികരിച്ചിട്ടില്ല. പലസ്‌തീനിലെ തീവ്രവാദ സംഘടനയും രാഷ്‌ട്രീയ സംഘടനയുമായ
1980 കളുടെ അവസാനത്തിൽ ഹമാസ് സ്ഥാപിതമായപ്പോൾ, അതിന്‍റെ ലക്ഷ്യങ്ങൾ ഇസ്രായേൽ അധിനിവേശത്തെ എതിർക്കലും അധഃസ്ഥിതരായ പലസ്‌തീനികളെ സഹായിക്കലുമായിരുന്നു. 1990 കളുടെ തുടക്കത്തിൽ, ഹാനിയെ അതിന്‍റെ ജീവകാരുണ്യ പ്രവർത്തനങ്ങളിലൂടെയും പിന്നീട് അതിന്‍റെ രാഷ്‌ട്രീയ വിഭാഗത്തിലൂടെയും ഹമാസുമായി ബന്ധപ്പെട്ടു. പലസ്‌തീൻ ലക്ഷ്യത്തോടുള്ള സമർപ്പണത്താൽ അദ്ദേഹം ഹമാസിനുള്ളിൽ മുന്നേറി.ഹമാസിന്‍റെ ഉയർച്ച ഹനിയയുടെ രാഷ്‌ട്രീയ ജീവിതത്തില്‍ നിര്‍ണായക സ്വാധീനം ചെലുത്തി.
1948 ലെ അറബ്-ഇസ്രായേൽ യുദ്ധത്തിൽ ഒരു അഭയാർഥി ക്യാമ്പിൽ ഹനിയയുടെ കുടുംബം വേരോടെ പിഴുതെറിയപ്പെട്ടത് അദ്ദേഹത്തിന്‍റെ രാഷ്‌ട്രീയ വിശ്വാസങ്ങളെ സ്വാധീനിച്ചു. 1987 ൽ ഒന്നാം ഇൻതിഫാദയുടെ കാലത്ത് ഹമാസ് സ്ഥാപിതമായതുമുതൽ, ഹനിയേ സംഘടനയ്ക്കുള്ളിൽ പ്രാമുഖ്യം നേടി. ഷെയ്ഖ് അഹമ്മദ് യാസിനുമായുള്ള ശക്തമായ ബന്ധമാണ് ഹമാസിനകത്ത് അദ്ദേഹത്തിന്‍റെ ഉയർച്ചയെ ത്വരിതപ്പെടുത്തിയത്.
1993 ൽ ഗാസയിലേക്ക് മടങ്ങിയതിനെത്തുടർന്ന്, യാസിന്‍റെ ഓഫീസ് മേധാവി എന്ന നിലയിൽ ഹനിയേ തന്‍റെ സ്ഥാനം ശക്തിപ്പെടുത്തുകയും രണ്ടാം ഇൻതിഫാദയുടെ പ്രക്ഷുബ്‌ധമായ രാഷ്‌ട്രീയ അന്തരീക്ഷം സമർത്ഥമായി ഉപയോഗിക്കുകയും ചെയ്‌തു. 1980 കളിലും 1990 കളിലും അദ്ദേഹം നിരവധി തവണ ഇസ്രായേലിൽ തടവിലായി. 2006 ലെ നിയമസഭ തെരഞ്ഞെടുപ്പിൽ ഹമാസ് വിജയിച്ചതിന് ശേഷം അദ്ദേഹം പലസ്‌തീന്‍ അതോറിറ്റിയുടെ പ്രധാനമന്ത്രിയായി നിയമിതനായി. പക്ഷേ പ്രസിഡന്‍റ്‌ മഹ്മൂദ് അബ്ബാസ് 2007 ൽ അദ്ദേഹത്തെ സ്ഥാനത്തുനിന്നും നീക്കി.
2017 ൽ ഖാലിദ് മഷാലിന്‍റെ പിൻഗാമിയായി ഹമാസിന്‍റെ പൊളിറ്റിക്കൽ ബ്യൂറോ ചെയർമാനായി ഹനിയേ അധികാരമേറ്റു. ഹമാസിന്‍റെ തന്ത്രങ്ങൾ രൂപപ്പെടുത്തുന്നതിൽ, പ്രത്യേകിച്ച് ഇസ്രയേലിനെയും പലസ്‌തീൻ അതോറിറ്റിയെയും സംബന്ധിച്ചുള്ള വിഷയങ്ങളില്‍ അദ്ദേഹത്തിന്‍റെ നിലപാടുകള്‍ സംഘടനയില്‍ അവസാന വാക്കായിരുന്നു.
ജറുസലേം ഔദ്യോഗികമായി ഇസ്രായേലിന്‍റെ തലസ്ഥാനമാണെന്ന യുഎസ് പ്രസിഡന്‍റ്‌ ഡൊണാൾഡ് ട്രംപിന്‍റെ പ്രഖ്യാപനത്തോടുള്ള പ്രതികരണമെന്ന നിലയിൽ,2017 ഡിസംബറിൽ, ഇസ്രായേൽ അധിനിവേശത്തെ ചെറുക്കുന്നതിന് പലസ്‌തീൻ കലാപം അല്ലെങ്കിൽ ഇൻഫിറ്റാഡയ്ക്ക് ഹനിയേ ആഹ്വാനം ചെയ്‌തു.
2018 ജനുവരി 31 ന് ഹനിയയെ ആഗോള ഭീകരനായി അമേരിക്ക പ്രഖ്യാപിച്ചു. ഹനിയയുടെ മക്കൾ ഹമാസ് പോരാളികളാണെന്ന ഇസ്രായേലി ആരോപണങ്ങൾ അദ്ദേഹം നിഷേധിച്ചു. അദ്ദേഹത്തിന്‍റെ മൂന്ന് മക്കളായ ഹസീം, അമീർ, മുഹമ്മദ് എന്നിവർ ഏപ്രിൽ 10 ന് ഇസ്രായേൽ വ്യോമാക്രമണത്തിൽ കൊല്ലപ്പെട്ടിരുന്നു.
ALSO READ: ഹമാസ് തലവന്‍ ഇസ്‌മയിൽ ഹനിയ കൊല്ലപ്പെട്ടു
