ലണ്ടൻ: ഇൻസ്‌റ്റാഗ്രാമില്‍ നഗ്നത അടങ്ങിയ സന്ദേശങ്ങൾ ബ്ലര്‍ ചെയ്യുന്ന ഫീച്ചറുകൾ പരീക്ഷിച്ച് വരികയാണെന്ന് കമ്പനി. കൗമാര പ്രായക്കാര ഉപയോക്താക്കളിലേക്ക് അത്തരം ഉള്ളടക്കങ്ങള്‍ എത്തുന്നത് തടയാനും ലൈംഗിക ചൂഷണത്തിൽ നിന്ന് സംരക്ഷണം നല്‍കുന്നതിനുമാണ് പുതിയ ഫീച്ചറെന്ന് ഇന്‍സ്‌റ്റാഗ്രാം അറിയിച്ചു.
ഇത്തരം ഉള്ളടക്കങ്ങളില്‍ നിന്ന് യുവാക്കളെ സംരക്ഷിക്കാൻ വേണ്ടത്ര നടപടിയെടുക്കുന്നില്ലെന്ന് ഇൻസ്‌റ്റാഗ്രാമിനും മറ്റ് സോഷ്യൽ മീഡിയ കമ്പനികള്‍ക്കും നേരെ വിമർശനങ്ങൾ ഉയര്‍ന്നിരുന്നു. ഈ വർഷമാദ്യം നടന്ന സെനറ്റ് ഹിയറിങ്ങിനിടെ ഇത്തരം ദുരുപയോഗത്തിന് ഇരയായവരുടെ മാതാപിതാക്കളോട് മെറ്റ സിഇഒ മാർക്ക് സക്കർബർഗ് ക്ഷമാപണം നടത്തിയിരുന്നു.
ഡിഎമ്മുകളിലെ നഗ്നതാ ഉള്ളടക്കങ്ങളുടെ സംരക്ഷണം
ഇൻസ്‌റ്റാഗ്രാം ഡിഎമ്മുകളിൽ പുതിയ നഗ്നതാ സംരക്ഷണ ഫീച്ചർ ഉടൻ പരീക്ഷിച്ച് തുടങ്ങുമെന്നാണ് ഇൻസ്‌റ്റാഗ്രാം അറിയിച്ചത്. നഗ്നത അടങ്ങിയതായി കണ്ടെത്തുന്ന ചിത്രങ്ങള്‍, ഫീച്ചര്‍ ഓട്ടോമാറ്റിക്കായി ബ്ലര്‍ ചെയ്യും.
ഫീച്ചര്‍ 18 വയസിന് താഴെയുള്ള കൗമാരക്കാർക്ക്
18 വയസിന് താഴെയുള്ള കൗമാരക്കാർക്ക് നഗ്നതാ സംരക്ഷണം ഡിഫോൾട്ടായി ആപ്പ് ഓണാക്കും. മുതിർന്നവര്‍ക്ക് അത് ഓണാക്കാൻ പ്രോത്സാഹിപ്പിക്കുന്ന അറിയിപ്പുകളും ആപ്പ് നല്‍കും.
ജാഗ്രതാ സന്ദേശം
ഫീച്ചര്‍ ഓണായിരിക്കുമ്പോൾ, നഗ്നത അടങ്ങിയ ചിത്രങ്ങൾ അയയ്‌ക്കുന്ന ആളുകൾക്ക് ജാഗ്രതാ നിര്‍ദേശം ലഭിക്കും. ഈ ഉള്ളടക്കം അണ്‍സെന്‍ഡ് ചെയ്യാനുള്ള ഓപ്ഷനും നല്‍കും. നഗ്നചിത്രങ്ങള്‍ ഫോർവേഡ് ചെയ്യാൻ ശ്രമിക്കുന്നവര്‍ക്കും അലേര്‍ട്ട് ലഭിക്കും.
ഇത്തരം ചിത്രങ്ങൾ അയയ്‌ക്കുമ്പോഴും സ്വീകരിക്കുമ്പോഴും സുരക്ഷാ മാനദണ്ഡങ്ങളിലേക്ക് ഉപയോക്താക്കളെ ആപ്പ് നയിക്കുമെന്നും ഇൻസ്‌റ്റാഗ്രാം അറിയിച്ചു.
Also Read : വാട്‌സ്‌ആപ്പില്‍ പുതിയ എഐ ചാറ്റ്ബോട്ട് സംവിധാനം; ഇന്ത്യയിലടക്കം ലഭ്യമാകും - WhatsApp Testing Meta AI Chatbot
