ഗാസ: മധ്യ ഗാസയില്‍ ഇസ്രയേല്‍ നടത്തിയ വ്യോമാക്രമണത്തില്‍ കുട്ടികളും സ്ത്രീകളും അടക്കം 20 പേര്‍ കൊല്ലപ്പെട്ടു. യുദ്ധത്തെ തുടര്‍ന്ന് പാലായനം ചെയ്‌ത പലസ്‌തീനികള്‍ അഭയംപ്രാപിച്ച സ്‌കൂളിന് നേരെയാണ് ഇസ്രയേല്‍ വ്യോമാക്രണം നടത്തിയത്. രണ്ട് സ്ത്രീകളും നിരവധി കുട്ടികളും ഉള്‍പ്പെടെ നുസൈറത്ത് എന്ന പ്രദേശത്തെ ഒരു സ്‌കൂളിനെ നേരെ ഇസ്രയേല്‍ നടത്തിയ വ്യോമാക്രമണത്തില്‍ 20 പേര്‍ കൊല്ലപ്പെട്ടെന്ന് പ്രാദേശിക ആശുപത്രികളിൽ നിന്നുള്ള റിപ്പോർട്ടുകളില്‍ വ്യക്തമാക്കുന്നു.
വ്യോമാക്രമണത്തില്‍ കൊല്ലപ്പെട്ടവരുടെ മൃതദേഹങ്ങള്‍ നുസൈറത്തിലെ അൽ-അവ്ദ ആശുപത്രിയിലും, ദേർ അൽ-ബലാഹിലെ അൽ-അഖ്‌സ രക്തസാക്ഷി ആശുപത്രിയിലും സൂക്ഷിച്ചിരിക്കുകയാണെന്ന് അധികൃതര്‍ അറിയിച്ചു. കൊല്ലപ്പെട്ടവരില്‍ ഭൂരിഭാഗവും കുട്ടികള്‍ ആണെന്നും ആശുപത്രി അധികൃതര്‍ വ്യക്തമാക്കുന്നു. അഭയാര്‍ഥി ക്യാമ്പുകള്‍ ആക്രമിക്കരുതെന്ന അന്താരാഷ്‌ട്ര നിയമം ലംഘിച്ച് കൊണ്ടാണ് ഇസ്രയേല്‍ വ്യോമാക്രമണം തുടരുന്നത്. കുട്ടികളും സ്ത്രീകളും ഉള്‍പ്പെടെ സാധാരണക്കാരായ ജനങ്ങള്‍ അഭയം തേടുന്ന അഭയാര്‍ഥി ക്യാമ്പുകളിലേക്ക് ആക്രമണം നടത്തുന്നതില്‍ നിന്ന് ഇസ്രയേല്‍ സൈന്യം പിന്മാറണമെന്ന് ഐക്യരാഷ്‌ട്ര സഭ നേരത്തെ മുന്നറിയിപ്പ് നല്‍കിയിരുന്നു. എന്നാല്‍ ഈ മുന്നറിയിപ്പുകളൊന്നും വകവയ്‌ക്കാൻ ഇസ്രയേല്‍ തയ്യാറായിട്ടില്ല.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ഗാസയിലെ ആശുപത്രികളിലും അഭയാര്‍ഥി ക്യാമ്പുകളിലും ഹമാസ് സംഘം ഒളിച്ചിരിക്കുന്നുവെന്ന വാദം ഉയര്‍ത്തിയാണ് ഇസ്രയേല്‍ വ്യോമാക്രമണം കടുപ്പിക്കുന്നത്. കഴിഞ്ഞ ദിവസവും വടക്കൻ ഗാസയിൽ ഇസ്രയേൽ കനത്ത ബോംബാക്രമണം നടത്തിയിരുന്നു. ആക്രമണത്തില്‍ 22 പേരാണ് കൊല്ലപ്പെട്ടത്. ലെബനനിൽ ഹിസ്ബുള്ളയ്‌ക്കെതിരായ വ്യോമാക്രമണം കടുപ്പിക്കുകയെന്ന പേരിലാണ് ഇസ്രയേൽ സൈന്യം വടക്കൻ ഗാസയിലും ആക്രമണം രൂക്ഷമാക്കിയത്. ആക്രമണം തുടരുമ്പോഴും ഒക്‌ടോബർ 1 മുതൽ ഇവിടേക്ക് ആവശ്യമായ ഭക്ഷ്യ സഹായം എത്തിയിട്ടില്ലെന്ന് യുഎൻ വേൾഡ് ഫുഡ് പ്രോഗ്രാം അറിയിച്ചു.
4 സൈനികര്‍ കൊല്ലപ്പെട്ടെന്ന് ഇസ്രയേല്‍:
അതേസമയം, ഹിസ്‌ബുള്ള നടത്തിയ വ്യോമാക്രമണത്തില്‍ 4 ഇസ്രയേല്‍ സൈനികര്‍ കൊല്ലപ്പെട്ടതായി ഇസ്രയേല്‍ പ്രതിരോധ സേനയും അറിയിച്ചു. ഹിസ്‌ബുള്ളയുടെ ഡ്രോണ്‍ ആക്രമണത്തില്‍ 61 ഓളം പേര്‍ക്ക് പരിക്കേറ്റതായും ഇസ്രയേല്‍ സൈന്യം വ്യക്തമാക്കി. രണ്ട് ദിവസം മുമ്പ് തെക്കൻ ലെബനനിലെ യുഎൻ സമാധാന സേന താവളങ്ങൾക്ക് നേരെ ഇസ്രയേൽ നടത്തിയ ആക്രമണങ്ങളില്‍ യുഎൻ സുരക്ഷാ സേനാംഗങ്ങള്‍ക്കും പരിക്കേറ്റിരുന്നു. ഇസ്രയേലിന്‍റെ നീക്കത്തിനെതിരെ അമേരിക്ക, ബ്രിട്ടൻ, ഇറ്റലി, ഫ്രാൻസ്, സ്‌പെയിൻ ഉള്‍പ്പെടെയുള്ള രാജ്യങ്ങള്‍ രംഗത്തെത്തുകയും ചെയ്‌തിരുന്നു.
ഒക്‌ടോബര്‍ 7 മുതല്‍ ഉണ്ടായ ഹമാസ്-ഇസ്രയേല്‍ സംഘര്‍ഷത്തിന് പിന്നാലെ പലസ്‌തീനില്‍ ഇതുവരെ 42000 പേര്‍ കൊല്ലപ്പെട്ടെന്ന് ഗാസ ആരോഗ്യ മന്ത്രാലയം അറിയിച്ചു. കൊല്ലപ്പെട്ടവരില്‍ ഭൂരിഭാഗവും സ്ത്രീകളും കുട്ടികളുമാണ്. ഹമാസ് ഇസ്രയേലില്‍ നടത്തിയ ആക്രമണത്തില്‍ 1400 ഓളം പേരാണ് കൊല്ലപ്പെട്ടത്.
Read Also: വടക്കൻ ഗാസയിൽ ഇസ്രയേൽ ആക്രമണത്തിൽ 22 മരണം; ലെബനനിലെ യുഎൻ സമാധാന സേനാ ആസ്ഥാനത്തും ആക്രമണം തുടരുന്നു
