ടെൽ അവീവ്: ഗാസയില്‍ ഇസ്രയേലിന്‍റെ വെടിനിര്‍ത്തല്‍ നിര്‍ദേശം തള്ളിയ ഹമാസ് പുതിയ വെടിനിര്‍ത്തല്‍ കരാര്‍ അവതരിപ്പിച്ചു. ഒക്‌ടോബർ 7 മുതൽ ഭീകരസംഘം ബന്ദികളാക്കിയ 129 പേരെ സ്വീകരിക്കുന്നതിന് മുന്‍പ് ഇസ്രയേല്‍ ആറാഴ്‌ചത്തെ വെടിനിർത്തൽ പാലിക്കണമെന്നാണ് ഹമാസിന്‍റെ ആവശ്യം. ശനിയാഴ്‌ച (ഏപ്രിൽ 13) രാത്രി അമേരിക്കയുടെ മധ്യസ്ഥതയിലുള്ള കരാർ നിരസിച്ചതിന് പിന്നാലെയാണ് തീവ്രവാദ ഗ്രൂപ്പ് പുതിയ നിർദേശം സമർപ്പിച്ചതെന്നാണ് റിപ്പോർട്ട്.
ഹമാസ് ഇസ്രയേൽ ഡിഫൻസ് ഫോഴ്‌സിനോട് (ഐഡിഎഫ്) ഗാസയിലെ എല്ല യുദ്ധങ്ങളും അവസാനിപ്പിച്ച് ആറാഴ്‌ചത്തേക്ക് നഗരപ്രദേശങ്ങളിൽ നിന്ന് പിൻവാങ്ങണമെന്ന് നിബന്ധന വെച്ചിട്ടുണ്ട്. പലസ്‌തീനികളെ വടക്കോട്ട് മടങ്ങാൻ അനുവദിക്കുമെന്നും റിപ്പോർട്ട് ചെയ്‌തിട്ടുണ്ട്. ആറാഴ്‌ച അവസാനിച്ചതിന് ശേഷം മാത്രമേ ഏതെങ്കിലും ബന്ദികളെ മോചിപ്പിക്കൂ, ബന്ദികളെ കണ്ടെത്താനും അവർ ഏത് അവസ്ഥയിലാണെന്ന് കണ്ടെത്താനും താൽക്കാലികമായി വെടിവയ്‌പ്പ് നിർത്തിവച്ച ആഴ്‌ചകൾ ഉപയോഗിക്കുമെന്നും റിപ്പോർട്ടിൽ പറയുന്നു.
ഓരോ ഇസ്രയേലി സിവിലിയനുമായി 30 പലസ്‌തീൻ തടവുകാരെ വിട്ടയക്കുമെന്ന് തീവ്രവാദ ഗ്രൂപ്പിന്‍റെ ഡ്രാഫ്റ്റ് കൂട്ടിച്ചേർത്തു. തടവിലാക്കപ്പെട്ട ഓരോ സൈനികനും വേണ്ടി 50 പലസ്‌തീൻ തടവുകാരും അവരിൽ ജീവപര്യന്തം ശിക്ഷ അനുഭവിക്കുന്ന 30 തടവുകാരെയും വിട്ടയക്കണമെന്നും ഹമാസ് ആവശ്യപ്പെട്ടു.
സമാനമായ ആവശ്യങ്ങൾ 'വ്യാമോഹം' എന്ന് പറഞ്ഞ് ഇസ്രയേൽ നേരത്തെ തള്ളിയിരുന്നുവെന്നും ഹമാസ് ആവശ്യപ്പെട്ട പലസ്‌തീൻ തടവുകാരുടെ എണ്ണവും അവരുടെ കുറ്റകൃത്യങ്ങളുടെ തീവ്രതയും മുൻകാല ചർച്ചകളിൽ ഒരു പ്രധാന പോയിന്‍റായിരുന്നുവെന്ന് മാധ്യമങ്ങൾ റിപ്പോർട്ട് ചെയ്‌തിരുന്നു. ശനിയാഴ്‌ച, ഹമാസ് ഇസ്രായേലിന്‍റെ ബന്ദി ഇടപാട് ചർച്ചകൾക്കും വെടിനിർത്തലിനുമുള്ള പ്രതികരണം സമർപ്പിക്കുകയും രണ്ടാമത്തെ നിർദേശം നിരസിക്കുകയും അവരുടെ യഥാർഥ ആവശ്യങ്ങളിൽ ഉറച്ചുനിൽക്കുകയും ചെയ്‌തിരുന്നുവെന്ന് ഇസ്രയേലി മാധ്യമങ്ങൾ റിപ്പോർട്ട് ചെയ്‌തു.
സ്ഥിരമായ വെടിനിർത്തൽ, ഗാസയിൽ നിന്ന് ഇസ്രയേൽ സൈന്യത്തെ പിൻവലിക്കുക, വടക്കൻ ഗാസയിലേക്കും മറ്റ് പ്രദേശങ്ങളിലേക്കും പലസ്‌തീനികളുടെ തിരിച്ചുവരവ്, മാനുഷിക സഹായത്തിന്‍റെ കുതിപ്പ്, സ്ട്രിപ്പിന്‍റെ പുനർനിർമ്മാണം ആരംഭിക്കുക തുടങ്ങിയ തങ്ങളുടെ യഥാർത്ഥ ആവശ്യങ്ങളിൽ തങ്ങൾ ഉറച്ചുനിൽക്കുകയാണെന്ന് ഭീകര സംഘടന പറഞ്ഞു.
