സുവ (ഫിജി) : സുവയിൽ ഇന്ന് (27-03-2024) പുലർച്ചെ റിക്‌ടർ സ്‌കെയിലിൽ 6.4 തീവ്രത രേഖപ്പെടുത്തിയ ഭൂചലനം അനുഭവപ്പെട്ടതായി നാഷണൽ സെന്‍റർ ഫോർ സീസ്മോളജി (എൻസിഎസ്) റിപ്പോർട്ട് ചെയ്‌തു. വിവരമനുസരിച്ച് ഇന്ത്യൻ സമയം 6:58 നാണ് ഫിജിയിൽ ഭൂചലനം അനുഭവപ്പെട്ടത്.
നാഷണൽ സെന്‍റർ ഓഫ് സീസ്മോളജിയുടെ (എൻസിഎസ്) റിപ്പോർട്ടുകൾ പ്രകാരം 21.21 അക്ഷാംശത്തിലും 173.85 രേഖാംശത്തിലുമാണ് ഭൂകമ്പം ഉണ്ടായത്. ഭൂകമ്പത്തിന്‍റെ പ്രഭവകേന്ദ്രം ഭൗമോപരിതലത്തിൽ നിന്ന് 10 കിലോമീറ്റർ താഴെയായിരുന്നു എന്നത് ശ്രദ്ധേയമാണ്. ഫിജിയിലെ സുവയിൽ നിന്ന് 591 കിലോമീറ്റർ തെക്ക് - പടിഞ്ഞാറായിരുന്നു ഭൂകമ്പത്തിന്‍റെ പ്രഭവകേന്ദ്രം.
"മാഗ്നിറ്റ്യൂഡ് : 6.4, 27-03-2024-നാണ് ഭൂകമ്പം ഉണ്ടായത്, 06:58:17 IST, ലാറ്റ്: -21.21 & ദൈർഘ്യം: 173.85, ആഴം: 10 കി.മീ., സ്ഥാനം: 591 കി.മീ എസ്‌ ഡബ്ല്യു എന്ന് ഫിജിയിലെ ഭൂകമ്പത്തെക്കുറിച്ച് അറിയിക്കാൻ എൻസിഎസ് അവരുടെ സാമൂഹിക മാധ്യമമായ എക്‌സിൽ കുറിച്ചു.
ഭൂകമ്പ പ്രവർത്തനങ്ങൾ നിരീക്ഷിക്കുന്നതിനുള്ള ഇന്ത്യാ ഗവൺമെന്‍റിന്‍റെ നോഡൽ ഏജൻസിയാണ് നാഷണൽ സെൻ്റർ ഫോർ സീസ്മോളജി (NCS). ഇതുവരെ ആളപായമൊന്നും റിപ്പോർട്ട് ചെയ്‌തിട്ടില്ലെന്ന് അധികൃതർ പറഞ്ഞു.
മഹാരാഷ്ട്രയില്‍ ഭൂചലനം ; റിക്‌ടർ സ്‌കെയിലിൽ 4.5 തീവ്രത : മഹാരാഷ്‌ട്രയിലെ ഹിംഗോലി ജില്ലയിൽ ഭൂചലനം (MH Earthquake). മാർച്ച് 21 ന് രാവിലെ 6.09 നാണ് റിക്‌ടർ സ്‌കെയിലിൽ 4.5 തീവ്രത രേഖപ്പെടുത്തിയ ഭൂചലനം അനുഭവപ്പെട്ടത്. അഖാര ബാലാപൂരിൽ നിന്ന് 15 കിലോമീറ്റർ അകലെയാണ് ഭൂചലനത്തിന്‍റെ പ്രഭവകേന്ദ്രമെന്നും നാഷണൽ സെന്‍റർ ഫോർ സീസ്മോളജി അറിയിച്ചു.
നാഷണൽ എർത്ത്‌ക്വേക്ക് സയൻസ് സെന്‍ററും ഭൂകമ്പത്തെക്കുറിച്ചുള്ള വിവരങ്ങൾ സോഷ്യൽ മീഡിയയിൽ പോസ്‌റ്റ് ചെയ്‌തു. ഭൂചലനം ജനങ്ങളെ ഭീതിയിലാഴ്‌ത്തി. നന്ദേഡ്, പർഭാനി ജില്ലകളിലും പ്രകമ്പനങ്ങളുണ്ടായി. ഇവിടങ്ങളിലെ ചില ഗ്രാമങ്ങളിൽ ഭൂമിക്കടിയിൽ നിന്ന് ശബ്‌ദം ഉയര്‍ന്നതായും വിവരമുണ്ട്. കൽമാനൂരി താലൂക്കിലെ ദണ്ഡേഗാവ് മേഖലയിൽ ഭൂചലനത്തില്‍ മതിൽ ഇടിഞ്ഞുവീണു. പ്രകമ്പനത്തെ തുടർന്ന് ആളുകൾ വീടുവിട്ട് പുറത്തിറങ്ങി നിന്നു.
കഴിഞ്ഞ അഞ്ച് വർഷമായി ഹിംഗോലി ജില്ലയിൽ ഭൂചലനങ്ങൾ ഏറിയും കുറഞ്ഞും അനുഭവപ്പെടുന്നുണ്ട്. ഭൂമിയ്ക്ക‌ടിയിൽ നിന്ന് ശബ്‌ദങ്ങൾ വരുന്നതായി പലതവണ വെളിപ്പെട്ടിട്ടുണ്ട്. കൽമാനൂരി വാസ്‌മത്ത് താലൂക്കിലെ ചില ഗ്രാമങ്ങളിലും ഭൂചലനം അനുഭവപ്പെട്ടു. വാസ്‌മത്ത് താലൂക്കിലെ പാൻഗ്ര ഷിൻഡെ ഗ്രാമത്തിലും സമീപ പ്രദേശങ്ങളിലും ഭൂമിയ്ക്ക‌ടിയില്‍ നിന്ന് ശബ്‌ദം കേട്ടതായി നാട്ടുകാര്‍ പറയുന്നു.
ALSO READ : ആന്ധ്രപ്രദേശില്‍ ഭൂചലനം; 3.9 തീവ്രത രേഖപ്പെടുത്തി
