ന്യൂഡൽഹി: അൾട്രാ പ്രോസസ് ചെയ്‌ത ഭക്ഷണങ്ങളുടെ പതിവ് ഉപഭോഗവും മോശം ജീവിതശൈലിയും ഇന്ത്യയിൽ 40 വയസിന് താഴെയുള്ളവരിൽ കാൻസർ കേസുകൾ വർധിപ്പിക്കുന്നതായി ഡോക്‌ടർമാർ. ഇന്ത്യയിലെ ചെറുപ്പക്കാർക്കിടയിലെ ക്യാൻസർ കേസുകളുടെ വർദ്ധനവിന് നിരവധി ഘടകങ്ങൾ കാരണമാകുന്നു. സംസ്‌കരിച്ച ഭക്ഷണങ്ങൾ, പുകയില, മദ്യം എന്നിവയുടെ വർദ്ധിച്ച ഉപഭോഗം, ഉദാസീനമായ ജീവിതശൈലി, അമിതവണ്ണം, സമ്മർദം എന്നിവയാണ് പ്രാഥമിക കാരണങ്ങളില്‍ ചിലത്.
പരിസ്ഥിതി മലിനീകരണമാണ് മറ്റൊരു നിർണായക ഘടകം. ഇന്ത്യയിലെ നഗരങ്ങൾ ഉയർന്ന തോതിലുള്ള മലിനീകരണത്താൽ വലയുകയാണ്, ഇത് വിവിധ തരത്തിലുള്ള ക്യാൻസറുമായി ബന്ധപ്പെട്ടിരിക്കുന്നു. വായു, ജല മലിനീകരണം വ്യക്തികളെ അർബുദ പദാർത്ഥങ്ങളിലേക്ക് തുറന്നുകാട്ടുന്നു, ഇത് അവരുടെ കാൻസർ സാധ്യത ഗണ്യമായി വർദ്ധിപ്പിക്കുന്നു.
"അൾട്രാ-പ്രോസസ്‌ഡ് ഫുഡുകളും ഉദാസീനമായ ജീവിതശൈലികളും യുവ ഇന്ത്യക്കാർക്കിടയിൽ വർദ്ധിച്ചുവരുന്ന കാൻസർ നിരക്കിന് കാര്യമായ സംഭാവന നൽകുന്നവരായി ഉയർന്നുവരുന്നു. "അനാരോഗ്യകരമായ അഡിറ്റീവുകൾ നിറഞ്ഞ ഈ ഭക്ഷണങ്ങളുടെ ഉയർന്ന ഉപഭോഗവും ശാരീരിക നിഷ്‌ക്രിയത്വവും ചേർന്ന് ആരോഗ്യ പ്രതിസന്ധി സൃഷ്‌ടിക്കുന്നു," എന്ന് ഫോർട്ടിസ് മെമ്മോറിയൽ റിസർച്ച് ഇൻസ്‌റ്റിറ്റ്യൂട്ടിലെ ഹെമറ്റോളജി ആൻഡ് ബിഎംടി വിഭാഗം ഡയറക്‌ടറും മേധാവിയുമായ ഡോ. രാഹുൽ ഭാർഗവ പറഞ്ഞു. ഈ പ്രവണത തടയുന്നതിന് ആരോഗ്യകരമായ ഭക്ഷണ ശീലങ്ങളും സജീവമായ ഒരു ജീവിതശൈലിയും സ്വീകരിക്കേണ്ടത് അത്യന്താപേക്ഷിതമാണെന്നും അദ്ദേഹം കൂട്ടിച്ചേർത്തു.
ഡൽഹി ആസ്ഥാനമായുള്ള നോൺ പ്രോഫിറ്റ് ഫൗണ്ടേഷനായ കാൻസർ മുക്ത് ഭാരത് ഫൗണ്ടേഷന്‍റെ സമീപകാല പഠനമനുസരിച്ച്, ഇന്ത്യയിലെ ക്യാൻസർ കേസുകളിൽ 20 ശതമാനവും ഇപ്പോൾ 40 വയസിന് താഴെയുള്ളവരിലാണ് രോഗനിർണയം നടത്തുന്നത്. ഈ യുവ കാൻസർ രോഗികളിൽ 60 ശതമാനവും പുരുഷൻമാരാണെന്നും ബാക്കി 40 ശതമാനം സ്‌ത്രീകളാണെന്നും പഠനം വ്യക്തമാക്കുന്നു.
ഉദാസീനമായ ജീവിതശൈലി ക്യാൻസർ നിരക്കുമായി ബന്ധപ്പെട്ടിരിക്കുന്നതായി ഡൽഹിയിലെ യുണീക്ക് ഹോസ്‌പിറ്റൽ കാൻസർ സെൻ്ററിലെ പ്രിൻസിപ്പൽ ഇൻവെസ്‌റ്റിഗേറ്ററും സീനിയർ ഓങ്കോളജിസ്‌റ്റുമായ ഡോ. ആശിഷ് ഗുപ്‌ത പറഞ്ഞു.യുവാക്കൾക്കിടയിൽ വർധിച്ചുവരുന്ന ക്യാൻസർ നിരക്കിനെ ചെറുക്കുന്നതിന് ജീവിതശൈലി ഇടപെടലുകൾ അടിയന്തിരമായി ആവശ്യമാണെന്ന് ഡോക്‌ടർമാർ ആവശ്യപ്പെട്ടു.
ഇന്ത്യയിലെ ക്യാൻസർ മുക്ത് ഭാരത് കാമ്പെയ്‌നിന്‍റെ തലവനായ ഡോ. ആശിഷ്, "യുവാക്കൾക്കിടയിൽ വർദ്ധിച്ചുവരുന്ന കാൻസർ നിരക്ക് കൈകാര്യം ചെയ്യാൻ സർക്കാരിന്‍റെയും ആരോഗ്യ പരിപാലന വിദഗ്‌ധരുടെയും സമൂഹത്തിന്‍റെയും സംയുക്ത ശ്രമത്തിന്‍റെ " പ്രാധാന്യം ഊന്നിപ്പറഞ്ഞു. “ശുദ്ധവായുവും വെള്ളവും, പതിവ് ശാരീരിക പ്രവർത്തനങ്ങൾ, പോഷകസമൃദ്ധമായ ഭക്ഷണം എന്നിവ പ്രോത്സാഹിപ്പിക്കുന്ന നയങ്ങൾ മുൻഗണന നൽകണം. കൂടാതെ, കൃത്യസമയത്ത് രോഗനിർണയവും ചികിത്സയും ഉറപ്പാക്കുന്നതിന് മെച്ചപ്പെട്ട ആരോഗ്യ പരിരക്ഷാ ഇൻഫ്രാസ്ട്രക്‌ടറിൽ ഞങ്ങൾ നിക്ഷേപിക്കണം," എന്നും അദ്ദേഹം പറഞ്ഞു.
