ഹൈദരാബാദ് : തിരക്കേറിയ ജീവിതശൈലി കാരണം സമ്മർദം അനുഭവിക്കുന്നവരുടെ എണ്ണം വളരെ കൂടുതലാണ്. സമ്മർദത്തെ അതിജീവിക്കാനുള്ള വഴികളെല്ലാം ശ്രമിച്ച് നോക്കുന്നവരുമുണ്ട്. എന്നാൽ മിതമായ തോതിലോ കുറഞ്ഞ തോതിലോ ഒക്കെയുള്ള സമ്മർദം തലച്ചോറിന്‍റെ പ്രവർത്തനത്തിന് ഗുണം ചെയ്യുമെന്നാണ് പഠനങ്ങൾ പറയുന്നത്.
സമ്മർദം നമ്മുടെ ജീവിതത്തിന്‍റെ ഒരു ഭാഗമാണ്. എന്നാൽ അത് അമിതമായാൽ ഹൃദയസംബന്ധമായ പ്രശ്‌നങ്ങളിലേക്ക് നമ്മെ നയിച്ചേക്കാം. അടുത്തിടെ അമേരിക്കൻ ഹാർട്ട് അസോസിയേഷൻ (എഎച്ച്എ) നടത്തിയ പഠനത്തിൽ ജോലി സംബന്ധമായ സമ്മർദത്തിന്‍റെ ഫലമായി നമുക്ക് ഉണ്ടാകുന്ന പ്രശ്‌നങ്ങളെ കുറിച്ച് പറയുന്നുണ്ട്.
കഠിനമായ സമ്മർദം ഹൃദയമിടിപ്പിലെ പ്രവചനാതീതമായ മാറ്റങ്ങൾക്ക് കാരണമാകുമെന്ന് പഠനം വെളിപ്പെടുത്തി. ഇത് വെൻട്രിക്കുലാർ ടാക്കിക്കാർഡിയ, വെൻട്രിക്കുലാർ ഫൈബ്രിലേഷൻ തുടങ്ങിയ അവസ്ഥകളിലേക്ക് നയിക്കും. ഇവ രണ്ടും ഹൃദയത്തിന്‍റെ താഴത്തെ അറകളെയാണ് ബാധിക്കുന്നത്. 18 മുതൽ 60 വയസ് വരെ പ്രായമുള്ള 6000 പേരെ 18 വർഷമെടുത്ത് നിരീക്ഷിച്ച് തയ്യാറാക്കി പഠനത്തിലാണ് ഇതിനെ കുറിച്ച് പറയുന്നത്.
സ്ട്രെസ് കുറവുള്ളവരുമായി താരതമ്യപ്പെടുത്തുമ്പോൾ കഠിനമായ സമ്മർദം അനുഭവിക്കുന്ന ആളുകൾക്ക് ഏട്രിയൽ ഫൈബ്രിലേഷൻ (എഎഫ്-ഹൃദയമിടിപ്പ് ക്രമരഹിതമാകുന്ന അവസ്ഥ) ഉണ്ടാകാനുള്ള സാധ്യത 83 ശതമാനം കൂടുതലാണെന്ന് ഗവേഷണത്തിലൂടെ കണ്ടെത്തിയിട്ടുണ്ട്. മാത്രമല്ല, തങ്ങളുടെ ജോലിക്ക് മതിയായ പ്രതിഫലം ലഭിക്കുന്നില്ലെന്ന് കരുതുന്ന വ്യക്തികൾക്കും ഏട്രിയൽ ഫൈബ്രിലേഷൻ അനുഭവിക്കാനുള്ള സാധ്യത 44 ശതമാനം കൂടുതലാണെന്നും ഗവേഷണത്തിൽ പറയുന്നു.
അതേസമയം ഫലപ്രദമായ ആസൂത്രണവും സ്ട്രെസ് മാനേജ്മെന്‍റും സമ്മർദം മൂലമുണ്ടാകുന്ന ഹൃദ്രോഗങ്ങൾ തടയുന്നതിന് പ്രധാനമാണ്. ഇതേപ്പറ്റി സ്‌റ്റാർ ഹോസ്‌പിറ്റലിലെ മുതിർന്ന കാർഡിയോളജിസ്‌റ്റ് ഡോ രമേഷ് ഗുഡപതിക്ക് പറയാനുള്ളത് എന്താണെന്ന് നോക്കാം.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
സമ്മർദം എങ്ങനെ ഹൃദയത്തെ ബാധിക്കുന്നു?: എഎഫ് ഉള്ള ആളുകളുടെ ഹൃദയത്തിൽ രക്തം പെട്ടെന്ന് കട്ടപിടിക്കാനുള്ള സാധ്യത കൂടുതലാണ്. ഇത് പിന്നീട് തലച്ചോറിലേക്ക് എത്തി സ്ട്രോക്ക് ഉണ്ടാവാൻ കാരണമാകും.
മനുഷ്യന്‍റെ വളർച്ചയിലെ ഒരു പ്രധാന ഘടകമാണ് സമ്മർദം. പ്രായത്തിനനുസരിച്ച് ഹൃദയമിടിപ്പ് അല്ലെങ്കിൽ ക്രമരഹിതമായ ഹൃദയമിടിപ്പ് സാധാരണമായി തീരാറുണ്ട്.
സമ്മർദത്തിൻ്റെ കാരണങ്ങൾ: തൊഴിൽ, കുടുംബം, സാമ്പത്തികം, വിദ്യാഭ്യാസം, സാമൂഹിക ബന്ധങ്ങൾ എന്നിവയുൾപ്പെടെ ഒന്നിലധികം കാരണങ്ങൾ കൊണ്ട് സമ്മർദം അനുഭവപ്പെടാം. ഒരാളുടെ കഴിവിനപ്പുറമുള്ള പ്രതീക്ഷകൾ സ്ഥാപിക്കുന്നതാണ് സമ്മർദം ഉണ്ടാകാനുള്ള പ്രധാന കാരണം.
ഉദാഹരണത്തിന്, ഒരാളുടെ കഴിവിൽ കവിയുന്ന ഒരു പ്രകടന നില പ്രതീക്ഷിക്കുന്നത് ആ വ്യക്തിയെ സമ്മർദത്തിലേക്ക് നയിക്കുന്നു. നിങ്ങളുടെ പരിധികൾ മനസിലാക്കുന്നതും യാഥാർഥ്യബോധമുള്ള പ്രതീക്ഷകൾ നിലനിർത്തുന്നതും സമ്മർദം കുറയ്ക്കാൻ സഹായിക്കുമെന്ന് ഡോ രമേഷ് ഗുഡപതി വ്യക്തമാക്കി.
നീണ്ടുനിൽക്കുന്ന, തീവ്രമായ സമ്മർദം സ്ട്രെസ് ഹോർമോണുകളുടെ ഉത്‌പാദനത്തിന് കാരണമാകും. ഇത് രക്തസമ്മർദം ഉയർത്തുകയും ക്ഷീണം ഉണ്ടാക്കുകയും ഹൃദയത്തിലെ രക്തക്കുഴലുകളിൽ തടസങ്ങൾ ഉണ്ടാകാനുള്ള സാധ്യത വർധിപ്പിക്കുകയും ചെയ്യും.
ഹൃദയമിടിപ്പ്, ഉയർന്ന സമ്മർദം എന്നിവയുടെ ലക്ഷണങ്ങൾ:
ഹൃദയാഘാതം:
- വിശ്രമിക്കുമ്പോൾ പോലും ദ്രുതഗതിയിലുള്ള ഹൃദയമിടിപ്പ്
- കടുത്ത ക്ഷീണം
- തലകറക്കം
- ബലഹീനത
ഉയർന്ന സമ്മർദം:
- ഉറക്കമില്ലായ്‌മ
- പേശി വേദനയും തലവേദനയും
- കടുത്ത ക്ഷീണം
- ഉത്കണ്‌ഠ, ക്ഷോഭം, വിഷാദം തുടങ്ങിയ വൈകാരിക മാറ്റങ്ങൾ
- അമിതമായി ഭക്ഷണം കഴിക്കുക അല്ലെങ്കിൽ വിശപ്പില്ലായ്‌മ
ഡയഗ്നോസ്‌റ്റിക് ടെസ്‌റ്റുകൾ:
സമ്മർദം മൂലമുണ്ടാകുന്ന ഹൃദയസംബന്ധമായ പ്രശ്‌നങ്ങൾ വിവിധ പരിശോധനകളിലൂടെ കണ്ടെത്താനാകും.
- ഇസിജി (ഇലക്‌ട്രോകാർഡിയോഗ്രാം)
- 2D എക്കോ
- ഹോൾട്ടർ മോണിറ്ററിങ്: ശരീരത്തിൽ ഘടിപ്പിച്ചിരിക്കുന്ന ഉപകരണം തീവ്രതയനുസരിച്ച് 24 മണിക്കൂർ അല്ലെങ്കിൽ ഒരാഴ്‌ചയോ അതിൽ കൂടുതലോ ഹൃദയത്തിന്‍റെ പ്രവർത്തനം രേഖപ്പെടുത്തുന്നു.How Stress Affects the Heart (ETV Bharat)
സ്ട്രെസ് എങ്ങനെ നിയന്ത്രിക്കാം, അല്ലെങ്കിൽ കുറയ്ക്കാം:
ടൈം മാനേജ്‌മെന്‍റ്: ജോലി സ്ഥലത്തെ പ്രശ്‌നങ്ങളെ പോസിറ്റീവ് ആയി നേരിടുക. അതുപോലെ തന്നെ ടൈം മാനേജ്‌മെന്‍റ് യാഥ്യാര്‍ഥ്യ ബോധത്തോടെയുള്ള ലക്ഷ്യങ്ങൾ സജ്ജീകരിക്കുന്നതിൽ നിർണായകമാണ്.
യഥാര്‍ഥ്യം ഉള്‍ക്കൊണ്ടുള്ള പ്രതീക്ഷകൾ: നിങ്ങളുടെ അമിതഭാരം ഒഴിവാക്കുന്നതിന് പരിശ്രമിക്കുക. നിങ്ങളുടെ യഥാർഥ കഴിവുകൾ തിരിച്ചറിയുക.
കുടുംബാംഗങ്ങളുമായും സുഹൃത്തുക്കളുമായും സമയം ചെലവഴിക്കുക: സാമൂഹിക പിന്തുണ സമ്മർദം കുറയ്ക്കുന്നതിന് സഹായിക്കും. പ്രിയപ്പെട്ടവരുമായി സമയം ചെലവഴിക്കുന്നതും നിങ്ങളുടെ ആശങ്കകൾ പങ്കുവക്കുന്നതും വളരെ പ്രയോജനപ്രദമായിരിക്കും.
വ്യായാമം: സമ്മർദം കുറയ്ക്കുന്നതിനുള്ള ഏറ്റവും ഫലപ്രദമായ മാർഗങ്ങളിലൊന്നാണ് വ്യായാമം. പതിവായി വ്യായാമം ചെയ്യുന്നത് നമ്മുടെ മനസിനും ശരീരത്തിനും ഊർജം പകരും. യോഗ, ധ്യാനം എന്നിവ സ്ട്രെസ് മാനേജ്മെന്‍റിന് സഹായകമാണ്.
ഹാനികരമായ ശീലങ്ങൾ ഒഴിവാക്കുക: പുകവലി അല്ലെങ്കിൽ മദ്യപാനം എന്നീ ശീലങ്ങൾ ഒഴിവാക്കുക. ഇവ നിങ്ങളിൽ സമ്മർദം ഉണ്ടാകാൻ കരണമാകുകയും, ആരോഗ്യപ്രശ്‌നങ്ങൾ ഉണ്ടാക്കുകയും ചെയ്യും.
സമീകൃതാഹാരം: സമ്മർദവുമായി ബന്ധപ്പെട്ട അമിതഭക്ഷണമോ വിശപ്പില്ലായ്‌മയോ തടയാൻ ആരോഗ്യകരമായ ഭക്ഷണക്രമം നിലനിർത്തുക.
മതിയായ ഉറക്കം: ശരിയായ വിശ്രമത്തിനായി നിങ്ങൾക്ക് ദിവസവും 6-8 മണിക്കൂർ ഉറക്കം ലഭിക്കുന്നുണ്ടെന്ന് ഉറപ്പാക്കുക.
സമ്മർദം മൂലമുണ്ടാകുന്ന ഹൃദയ പ്രശ്‌നങ്ങൾക്കുള്ള ചികിത്സ:
ഹൃദയത്തിൽ രക്തം കട്ടപിടിക്കുന്നതാണ് ഹൃദയസ്‌തംഭനം ഉണ്ടാകാനുള്ള കാരണം. ഇത് തടയുന്നതിനായി രക്തം നേർത്തതാക്കുന്ന മരുന്നുകൾ നിർദേശിക്കപ്പെടാം.
അതേസമയം വെൻട്രിക്കുലാർ ഫൈബ്രിലേഷൻ കേസുകളിൽ, ഹൃദയമിടിപ്പ് നിയന്ത്രിക്കാൻ ഇംപ്ലാന്‍റ് ചെയ്യാവുന്ന ഉപകരണങ്ങൾ ആവശ്യമായി വന്നേക്കാം.
കൂടുതൽ ഗുരുതരമായ ആരോഗ്യപ്രശ്‌നങ്ങൾ ഒഴിവാക്കുന്നതിന് സമ്മർദം മൂലമുണ്ടാകുന്ന ഹൃദയമിടിപ്പ് നേരത്തെ തിരിച്ചറിയുകയും സമയബന്ധിതമായി ചികിത്സ തേടുകയും ചെയ്യേണ്ടത് അത്യാവശ്യമാണെന്ന് ഡോ. രമേഷ് ഗുഡപതി വ്യക്തമാക്കി.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read: ഹൃദയാഘാതം; ശരീരം പ്രകടിപ്പിക്കുന്ന ഈ സൂചനകൾ നിസാരമാക്കരുകത്
