ശരീരത്തിൽ യൂറിക് ആസിഡിന്‍റെ അളവ് കൂടുന്നത് പല ആരോഗ്യ പ്രശ്‌നങ്ങളിലേക്കും ശാരീരിക അസ്വസ്ഥതകളിലേക്കും നയിക്കും. ചെറുപ്പക്കാരും മുതിർന്നവരും ഇന്ന് ഒരേ പോലെ നേരിടുന്ന പ്രശ്‌നം കൂടിയാണ് യൂറിക് ആസിഡ്. ഇതിന്‍റെ അളവ് വർധിക്കുന്നത് വാതം, വൃക്കയിൽ കല്ല്, ഹൃദ്രോഗങ്ങൾ, വൃക്ക സ്‌തംഭനം, രക്തസമ്മർദ്ദം തുടങ്ങിയ ആരോഗ്യ പ്രശ്‌നങ്ങൾക്ക് കാരണമാകുന്നു. ശരീരത്തിൽ അധികമായി യൂറിക് ആസിഡ് ഉത്പാദിപ്പിക്കുമ്പോൾ ക്രിസ്റ്റലുകളായി രൂപപ്പെടുകയും ക്രമേണ സന്ധികൾക്ക് ചുറ്റും അടിഞ്ഞു കൂടുകയും ചെയ്യും. ഇത് കഠിനമായ വേദന അനുഭവപ്പെടാനും നീർക്കെട്ട്, വിരൽ അനക്കാൻ പറ്റാത്ത അവസ്ഥ എന്നിവയിലേക്ക് നയിക്കും. എന്നാൽ തികച്ചും പ്രകൃതിദത്തമായ ചില മാർഗങ്ങളിലൂടെ യൂറിക് ആസിഡ് നിയന്ത്രിക്കാൻ സാധിയ്ക്കും. അതിനായി ഭക്ഷണക്രമത്തിൽ സമീകൃതാഹാരം ഉൾപ്പെടുത്തേണ്ടത് വളരെ പ്രധാനമാണ്. യൂറിക് ആസിഡ് അളവ് കുറയ്ക്കാൻ സഹായിക്കുന്ന ഭക്ഷണങ്ങൾ ഏതൊക്കെയെന്ന് പരിചയപ്പെടാം.
ചെറി
ചെറി പഴത്തിൽ ആന്‍റി ഓക്‌സിഡന്‍റ് ഗുണങ്ങൾ അടങ്ങിയിട്ടുള്ളതിനാൽ യൂറിക് ആസിഡിന്‍റെ അളവ് നിയന്ത്രിയ്ക്കാൻ ഇത് സഹായിക്കും. ഡയറ്റിൽ പതിവായി ചെറി പഴം ഉൾപ്പെടുത്താൻ ശ്രമിക്കുക.
ബ്ലൂബെറി
ഫൈബറും ആന്‍റി ഓക്‌സിഡന്‍റുകളും ധാരാളം അടങ്ങിയിട്ടുള്ള പഴമാണ് ബ്ലൂബെറി. ഇത് സ്ഥിരമായി ഭക്ഷണക്രമത്തിൽ ഉൾപ്പെടുത്തുന്നത് യൂറിക് ആസിഡിന്‍റെ അളവ് കുറയ്ക്കാൻ വളരെയധികം ഗുണം ചെയ്യും.
സ്ട്രോബെറി
ആന്‍റി ഓക്‌സിഡന്‍റ്, വിറ്റാമിൻ സി, ഫൈബർ എന്നിവയുടെ നല്ലൊരു ഉറവിടമാണ് സ്ട്രോബെറി. യൂറിക് ആസിഡ് നിയന്ത്രിക്കാനുള്ള കഴിവ് ഈ പോക്ഷങ്ങൾക്കുണ്ട്. അതിനാൽ ദിവസവും സ്ട്രോബെറി കഴിക്കാം. ഇത് മൊത്തത്തിലുള്ള ആരോഗ്യത്തിനും വളരെയധികം ഗുണം ചെയ്യും.
സെലറി
ശരീരത്തിൽ അടിഞ്ഞുകൂടിയിട്ടുള്ള യൂറിക് ആസിഡ് പുറന്തള്ളാൻ സഹായിക്കുന്ന നല്ലൊരു ഡൈയൂററ്റിക്കാണ് സെലറി. ഇതിൽ അടങ്ങിയിട്ടുള്ള എപിജെനിൻ സംയുക്തം വീക്കം കുറയ്ക്കാനും സഹായിക്കും.
ഗ്രീൻ ടീ
ആന്‍റ് ഓക്‌സിഡന്‍റ്, പോളിഫെനോളുകൾ എന്നിവയാൽ സമ്പന്നമാണ് ഗ്രീൻ ടീ. യൂറിക് ആസിഡ് ലെവൽ കുറയ്ക്കാൻ ഇത് ഫലം നൽകും. ഗ്രീൻ ടീയിൽ കാറ്റെച്ചിനുകൾ അടങ്ങിയിട്ടുള്ളതിനാൽ വൃക്കയുടെ ആരോഗ്യം സംരക്ഷിക്കാനും ഗുണം ചെയ്യും.
വെള്ളരി
ജലാംശവും പൊട്ടാസ്യവും ഉയർന്ന അളവിൽ അടങ്ങിയിട്ടുള്ള ഒന്നാണ് വെള്ളരി. ഇത് യൂറിക് ആസിഡ് പുറന്തള്ളാൻ ഫലപ്രദമാണ്. വെള്ളരിയിലെ ആന്‍റി ഓക്‌സിഡന്‍റ് ഗുണങ്ങൾ ശരീരത്തിലെ വീക്കം കുറയ്ക്കാനും സഹായിക്കും.
ക്യാരറ്റ്
ക്യാരറ്റിൽ ഫൈബർ, വിറ്റാമിൻ സി, ആന്‍റി ഓക്‌സിഡന്‍റുകൾ എന്നിവ ധാരാളം അടങ്ങിയിട്ടുണ്ട്. ഇത് യൂറിക് ആസിഡിന്‍റെ അളവ് കുറയ്ക്കാൻ സഹായിക്കും. അതിനാൽ പതിവായി ക്യാരറ്റ് കഴിക്കാം.
ഡ്രൈ ഫ്രൂട്‌സ്
യൂറിക് ആസിഡിന്‍റെ അളവ് കുറയ്ക്കാൻ സഹായിക്കുന്നവയാണ് ഡ്രൈ ഫ്രൂട്‌സ്. വാൾനട്ട്, ക്യാഷ്യൂനട്ട്, പിസ്‌ത, ബദാം, കാരക്ക എന്നിവ യൂറിക് ആസിഡ് നിയന്ത്രിക്കാൻ ഫലപ്രദമാണ്. അതിനാൽ ഇവ ഭക്ഷണക്രമത്തിൽ ഉൾപ്പെടുത്താം.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read: വെറും വയറ്റിൽ ഈ ഭക്ഷണങ്ങൾ കഴിക്കുന്നവർ സൂക്ഷിക്കുക... എട്ടിന്‍റെ പണി കിട്ടും
