മുതിര്‍ന്നവർക്ക് പകൽ സമയത്ത് ഉറക്കമാകാം... പക്ഷേ ജാഗ്രതയോടെ - daytime sleep important for adults

പകൽ ഉറക്കം അലസതയുടെ ലക്ഷണമല്ലെന്ന് പഠനം. ഇത് മസ്‌തിഷ്‌ക ശക്തി വർധിപ്പിക്കുയും പ്രതിരോധ ശേഷി വർധിക്കുകയും ചെയ്യുന്നു. ഉച്ചയ്ക്ക് 1 നും 3 നും ഇടയിൽ ഉറങ്ങുന്നതാണ് ആരോഗ്യത്തിന് നല്ലതെന്ന് ഗവേഷകർ പറയുന്നു.

രാത്രിയിൽ നന്നായി ഉറങ്ങിയിട്ടും പകൽ ഉറക്കം തൂങ്ങുന്ന ആളുകൾ നമുക്കിടയിലുണ്ട്. കുട്ടികളിൽ മസ്‌തിഷ്‌ക വളർച്ചയ്ക്കും ഓർമശക്തി വർധിപ്പിക്കാനും പകൽ ഉറക്കം പ്രധാന പങ്ക് വഹിക്കുന്നതായി പഠനങ്ങൾ തെളിയിച്ചിട്ടുണ്ട്. എന്നാൽ പകൽ ഉറക്കം ആരോഗ്യത്തിനു നല്ലതാണോ? പലയിടങ്ങളിൽ നിന്നായി നമ്മൾ കേട്ടതും അറിഞ്ഞതും പകൽ ഉറങ്ങുന്നത് ആരോഗ്യത്തിന് നല്ലതല്ലെന്നാണ്. എന്നാൽ അതിശയകരമെന്ന് പറയട്ടെ മുതിർന്നവർക്കും പകൽ ഉറക്കം വളരെ പ്രധാനമാണെന്ന് സമീപകാല പഠനങ്ങൾ വെളിപ്പെടുത്തുന്നു. മുതിർന്നവരിൽ ഹ്രസ്വകാല ഓർമ്മകൾ സൂക്ഷിക്കുന്നതിനായി ഇടയ്ക്കിടെ വിശ്രമം ആവശ്യമാണെന്ന് ഗവേഷകർ പറയുന്നു.

അലസതയുടെ ലക്ഷണമല്ല

പകൽ ഉറക്കം പലപ്പോഴും അലസതയുടെ ഭാഗമാണന്നാണ് പൊതുവെയുള്ള ധാരണ. എന്നാൽ ഇത് ആരോഗ്യകരമായ ഒരു ശീലമാണ്. ചില ജോലിസ്ഥലങ്ങളിൽ ഉറക്കത്തെ പ്രോത്സാഹിപ്പിക്കുന്നതിനായി പ്രത്യേകം 'സ്ലീപ്പിങ് റൂമുകൾ' പോലുമുണ്ട്. പകൽ സമയത്ത് വിശ്രമിക്കണമെന്ന് തോന്നുന്നത് വളരെ സ്വാഭാവികമാണ്. പ്രത്യേകിച്ചും തലേദിവസം രാത്രി നല്ല ഉറക്കം ലഭിക്കാതെ വരികയോ രാവിലെ ക്ഷീണം അനുഭവപ്പെടുകയോ ചെയ്യുന്നുണ്ടങ്കിൽ. ചില ആളുകളിൽ പകൽ ഉറക്കം ഒരു ശീലമാണ്. ഇത് ആരോഗ്യകരമായ ഒരു പരിശീലനമാണെന്നാണ് സമീപകാല പഠനങ്ങൾ പറയുന്നത്. ഇത് നിങ്ങളിൽ ഉന്മേഷം വർധിപ്പിക്കുകയും ഓർമ്മ മെച്ചപ്പെടുത്താനും സഹായിക്കുന്നു. മയങ്ങിയിട്ട് എഴുന്നേറ്റതിനു ശേഷം ആളുകളിൽ അക്കങ്ങളും വാക്കുകളും കൂടുതൽ ഫലപ്രദമായി ഓർമ്മിക്കാൻ കഴിയുമെന്ന് പഠനങ്ങൾ തെളിയിക്കുന്നു. പരുക്കൻ സ്വഭാവമുള്ളവരും ഉറക്കത്തിനു ശേഷം ശാന്തരും ആയിരിക്കുമെന്നാണ് കണ്ടെത്തൽ.

മസ്‌തിഷ്‌ക ശക്തി വർധിപ്പിക്കുന്നു

കെമിക്കൽ സിഗ്നലുകളിലൂടെയാണ് മസ്‌തിഷ്‌കം പ്രവർത്തിക്കുന്നത്. പ്രായമാകുന്നതിനനുസരിച്ച് ഇത് കുറയുന്നു. ചെറിയ മയക്കത്തിലൂടെ തലച്ചോറിന് നവോന്മേഷം നൽകാൻ സാധിക്കുകയും അതിലൂടെ മറവിയെ ചെറുക്കാൻ സഹായിക്കുകയും ചെയ്യുന്നു.

ക്ഷീണത്തിനെതിരെ പോരാടുന്നു

മിക്കയാളുകൾക്കും ശരീരത്തിന് ക്ഷീണം അനുഭവപ്പെടാറ് പതിവാണ്. എന്നാൽ ഇത് അപകടകരമായ ഒരു അവസ്ഥയാണ്. പ്രത്യേകിച്ച് വാഹനമോടിക്കുമ്പോഴോ വലിയ യന്ത്രങ്ങൾ പ്രവർത്തിക്കുമ്പോ വലിയ ഭീഷണിയാണ് ഇതുണ്ടാക്കുന്നത്. ഒരു ചെറിയ മയക്കം നിങ്ങളെ അപകടങ്ങളിൽ നിന്ന് തടയാൻ സഹായിക്കുകയും നിങ്ങളുടെ പ്രതികരണ വേഗത കൂട്ടുകയും ചെയ്യുന്നു. നിങ്ങൾ ദീർഘയാത്രയ്ക്ക് തയ്യാറെടുക്കുന്നവരാണെങ്കിൽ നല്ല വിശ്രമം ലഭിക്കേണ്ടതുണ്ട്. അതിനാൽ യാത്രയ്ക്ക് മുമ്പ് നല്ല ഉറക്കം ആവശ്യമാണ്.

പ്രതിരോധശേഷി ശക്തിപ്പെടുത്തൽ

പകൽസമയത്തെ ഉറക്കം നിങ്ങളുടെ രോഗപ്രതിരോധ ശേഷി വർദ്ധിപ്പിക്കുന്നു. മാത്രമല്ല അണുബാധകളും ശരീരത്തിലുണ്ടാകുന്ന വീക്കവും വേഗത്തിൽ കുറയ്ക്കാൻ ഇത് സഹായിക്കുന്നു. അതിനാലാണ് അസുഖമുള്ളവരോട് വിശ്രമിക്കാൻ ഡോക്‌ടർമാർ നിർദ്ദേശിക്കുന്നത്.

ഹൃദയാരോഗ്യ ഗുണങ്ങൾ

പകൽ സമയത്തെ ഉറക്കം രക്തസമ്മർദ്ദം കുറയ്ക്കുകയും അതിലൂടെ ഹൃദയാരോഗ്യത്തിന് ഗുണം ചെയ്യുകയും ചെയ്യുന്നു. കൂടാതെ രക്തസമ്മർദ്ദം മികച്ച രീതിയിൽ നിയന്ത്രിക്കാനും സഹായിക്കുന്നു.

സമയവും ദൈർഘ്യവും ശ്രദ്ധിക്കുക

6 മുതൽ 8 മണിക്കൂർ വരെയുള്ള ഉറക്കം നല്ല ആരോഗ്യത്തിന് നിർബന്ധമാണ്. ഇത് നിങ്ങളെ ഉണർന്നിരിക്കാൻ സഹായിക്കുന്നതിനോടൊപ്പം സമ്മർദ്ദമുണ്ടാക്കുന്ന കോർട്ടിസോൾ ഹോർമോണിൻ്റെ അളവ് കുറയ്ക്കാനും സഹായിക്കുന്നു. ഗാഢനിദ്രയിലേക്ക് വീഴാതെ വെറുതെ വിശ്രമിക്കുന്നത് നിങ്ങളുടെ സർഗ്ഗാത്മകത വർദ്ധിപ്പിക്കുകയും പ്രശ്‌നപരിഹാര കഴിവുകൾ മെച്ചപ്പെടുത്തുകയും ചെയ്യുന്നു.

പകൽ ഉറക്കത്തിനു മുമ്പ് ചില മുൻകരുതലുകൾ പ്രധാനമാണ്:

ദൈർഘ്യം: ചില ആളുകൾക്ക് 10 മുതൽ15 മിനിറ്റ് ഉറക്കം മതിയാകും. ചിലർക്ക് കൂടുതൽ സമയം വേണ്ടിവന്നേക്കാം. എന്നാൽ 90 മിനിറ്റിൽ കൂടുതൽ സമയം ഉറങ്ങുന്നത് നല്ലതല്ലെന്നാണ് പഠനം പറയുന്നത്. 30-40 മിനിറ്റാണ് പകൽ ഉറക്കത്തിന് ഏറ്റവും അനുയോജ്യമായ സമയം.

ഉറക്കച്ചടവ് ഒഴിവാക്കുക: രണ്ട് മണിക്കൂറോ അതിൽ കൂടുതലോ നേരം ഉറങ്ങുന്നത് ഉറക്കച്ചടവിന് കാരണമാകും. പക്ഷാഘാതം അല്ലെങ്കിൽ ജോലി സ്ഥലത്തെ അലസതയിലേക്കും ഇത് നയികുന്നു.

സമയം: ഉച്ചയ്ക്ക് 1 നും 3 നും ഇടയിൽ ഉറങ്ങുന്നതാണ് ഉത്തമം. തൊഴിൽ വൈദഗ്ധ്യം വർദ്ധിപ്പിക്കുക മാത്രമല്ല, കഫീനേക്കാൾ കൂടുതൽ ഗുണം ചെയ്യും. 3 മണിക്ക് ശേഷം ഉറങ്ങുന്നത് ഒഴിവാക്കുക, ഇത് രാത്രി ഉറക്കത്തെ തടസപ്പെടുത്തും.

ഭക്ഷണത്തിനു ശേഷമുള്ള ഉറക്കം: ഭക്ഷണം കഴിച്ചയുടൻ ഉറങ്ങുന്നത് ആരോഗ്യത്തെ മോശമായി ബാധിക്കുന്നു. അതിനാൽ ആഹാരത്തിനു ശേഷമുള്ള ഉറക്കം ഒഴിവാക്കുക