മുന്‍ പരിചയവുമൊന്നുമില്ലാത്ത ആളുകളോടൊപ്പം ഒരു വീട്ടില്‍ ദിവസങ്ങളോളം കഴിയുകയെന്നത് അല്‌പം ശ്രമകരമായ കാര്യമാണെങ്കിലും അതിനൊപ്പം ചില ടാസ്‌കുകളും ഗെയിമുകളൊക്കെ ഉണ്ടെങ്കില്‍ അത് പൊളിക്കുമല്ലേ. മാത്രമല്ല അതിന് നേതൃത്വം നല്‍കുന്നത് ലെജന്‍ഡായ ഒരു താരം കൂടിയാണെങ്കിലോ അപ്പോള്‍ അതിലേറെ രസകരമായിരിക്കും. ഈ ഗെയിമിലൂടെയും ടാസ്‌കിലൂടെയുമൊക്കെ മുന്നേറി ഒടുവില്‍ ഇതില്‍ ഒരു വിജയിയുണ്ടാവും. അതാണ് ബിഗ് ബോസ് എന്ന റിയാലിറ്റി ഷോ. നിലവിൽ ഹിന്ദി, മറാത്തി, തെലുങ്ക്, കന്നഡ, തമിഴ്, മലയാളം തുടങ്ങിയ ഭാഷകളിൽ ഷോ നടക്കുന്നുണ്ട്.
ഓരോ മേഖലയിലും മുന്‍നിര താരങ്ങള്‍ തന്നെയാണ് ഷോയുടെ അവതാരകനായി എത്തുന്നത്. മലയാളത്തില്‍ അത് മോഹന്‍ലാല്‍ ആണ്. കഴിഞ്ഞ ആറ് സീസണുകളിലും മോഹൻലാൽ തന്നെയായിരുന്നു മലയാളം ബിഗ് ബോസിലെ അവതാരകൻ. ഇനി വരാനിരിക്കുന്നത് ഏഴാമത്തെ സീസൺ ആണ്. എന്നാല്‍ ഷോ എന്ന് തുടങ്ങും എന്ന കാര്യത്തിൽ തീരുമാനങ്ങളൊന്നും ഇതുവരെ വന്നിട്ടില്ല. അതേസമയം മോഹൻലാൽ പുതിയ സീസണിൽ അവതാരകനായി ഉണ്ടാകില്ലെന്ന തരത്തിൽ ചർച്ചകൾ നടക്കുകയാണ്.
ഇടിവി ഭാരത് കേരളം ഇനി വാട്‌സ്‌ആപ്പിലും
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക.
ആറാം സീസൺ വരെയായിരുന്നു ഷോയുടെ കോൺട്രാക്ടിൽ മോഹൻലാൽ ഒപ്പു വച്ചത്. പുതിയ സീസണിൽ മറ്റൊരു താരമാകും അവതാരകനായി എത്തുക എന്നതാണ് സോഷ്യൽ മീഡിയ പ്രചരണം. തമിഴ് ബിഗ് ബോസിൽ നിന്നും കമൽഹാസൻ പിന്മാറിയിരുന്നു. പകരം വിജയ് സേതുപതിയാണ് അവതാരകനായി എത്തിയത്. ഇതോടെയാണ് മലയാളത്തില്‍ മോഹന്‍ലാലും മാറുമെന്ന തരത്തില്‍ പ്രചരണം നടക്കുന്നത്. എന്തായാലും ബിഗ് ബോസിൽ മോഹൻലാൽ ഉണ്ടാകുമോ ഇല്ലയോ എന്നറിയാൻ കുറച്ച് നാൾ കൂടി കാത്തിരിക്കേണ്ടി വരും.
Also Read:'ആ ക്ലാസിക് ക്രിമിനല്‍ ഉടന്‍ തിരിച്ചു വരില്ല'; വ്യാജ വാര്‍ത്തയാണ് വരുന്നതെന്ന് ജീത്തു ജോസഫ്
