നെറ്റ്ഫ്ലിക്സ് ഡോക്യുമെന്‍ററി വിവാദത്തിനിടെ ഒന്നിച്ചൊരു ചടങ്ങില്‍ പ്രത്യക്ഷപ്പെട്ട് നയന്‍താരയും ധനുഷും. നിര്‍മ്മാതാവ് ആകാശ് ഭാസ്‌കരന്‍റെ വിവാഹത്തില്‍ പങ്കെടുക്കാന്‍ എത്തിയതായിരുന്നു താരങ്ങള്‍. സംവിധായകനും ഭര്‍ത്താവുമായ വിഘ്നേഷ് ശിവനൊപ്പമാണ് നയന്‍താര ചടങ്ങിനെത്തിയത്.
നയന്‍താരയും വിഘ്‌നേഷും എത്തുമ്പോല്‍ സദസ്സിന്‍റെ മുന്‍നിരയില്‍ തന്നെ ധനുഷ് ഉണ്ടായിരുന്നു. ചടങ്ങില്‍ ധനുഷ് ഇരുന്നതിന്‍റെ തൊട്ടടുത്ത ഇരിപ്പിടത്തില്‍ മുന്‍നിരയില്‍ തന്നെയാണ് നയന്‍താരയും ഇരുന്നത്. എന്നാല്‍ നയന്‍താരയും ധനുഷും പരസ്‌പരം മുഖം കൊടുത്തില്ല.
അതേസമയം ചടങ്ങില്‍ പങ്കെടുത്ത ശിവകാര്‍ത്തികേയനോട് നയന്‍താരയും വിഘ്‌നേഷും സംസാരിച്ചിരുന്നു. ഇതിന്‍റെ ദൃശ്യങ്ങളും സോഷ്യല്‍ മീഡിയയില്‍ വൈറലാവുകയാണ്. അനിരുദ്ധ് രവിചന്ദറും വിവാഹ ചടങ്ങില്‍ എത്തിയിരുന്നു. ധനുഷ് സംവിധാനം ചെയ്യുന്ന പുതിയ ചിത്രം 'ഇഡ്‌ലി കട'യുടെ നിര്‍മ്മാതാവ് കൂടിയാണ് ആകാശ്.
നയന്‍താരയും ധനുഷും തമ്മിലുള്ള യുദ്ധം നടക്കുന്നതിനിടെ ഇരുവരെയും ഒരുമിച്ച് കണ്ടപ്പോള്‍ ആരാധകരും ആവേശത്തിലായി. അതുകൊണ്ട് തന്നെ ഒരേ വേദിയിലെത്തിയ നയന്‍താരയുടെയും ധനുഷിന്‍റെയും വീഡിയോ സോഷ്യല്‍ മീഡിയയില്‍ വൈറലായി.
നയന്‍താരയുടെ ജീവിതത്തെ ആസ്‌പദമാക്കി നെറ്റ്ഫ്ലിക്സ് പുറത്തിറക്കിയ 'നയന്‍താര ബിയോണ്ട് ദി ഫെയറി ടെയില്‍' എന്ന ഡോക്യുമെന്‍ററിയില്‍ 'നാനും റൗഡി താന്‍' എന്ന സിനിമയിലെ മൂന്ന് സെക്കന്‍ഡ് ദൈര്‍ഘ്യമുള്ള ദൃശ്യം ഉള്‍പ്പെടുത്തിയിരുന്നു. ഇതിനെതിരെ ധനുഷ് 10 കോടി രൂപ കോപ്പി റൈറ്റ് ഇനത്തില്‍ ചോദിച്ച സംഭവം വലിയ ചര്‍ച്ചയായിരുന്നു.
നെറ്റ്ഫ്ലിക്സ് ഡോക്യുമെന്‍ററിയില്‍ ഉപയോഗിച്ച 'നാനും റൗഡി താന്‍' എന്ന ചിത്രത്തിലെ മൂന്ന് സെക്കന്‍ഡ് ദൃശ്യം 24 മണിക്കൂറിനുള്ളില്‍ പിന്‍വലിച്ചില്ലെങ്കില്‍ ഇതിന്‍റെ പ്രത്യാഘാതം 10 കോടി രൂപയില്‍ ഒതുങ്ങില്ലെന്നും ഗുരുതരമായ നിയമ നടപടി നേരിടേണ്ടി വരുമെന്നുമാണ് ഡോക്യുമെന്‍ററി റിലീസിന് പിന്നാലെ ധനുഷിന്‍റെ അഭിഭാഷകന്‍ നയന്‍താരയ്ക്ക് വക്കീല്‍ നോട്ടീസ് അയച്ചത്.
വിഘ്നേഷ് സംവിധാനം ചെയ്‌ത 'നാനും റൗഡി താന്‍' എന്ന ചിത്രം നിര്‍മ്മിച്ചത് ധനുഷ് ആയിരുന്നു. സിനിമയുടെ സെറ്റില്‍ വച്ചാണ് നയന്‍താരയും വിഘ്നേഷ് ശിവനും പരിചയപ്പെടുന്നതും പ്രണയത്തിലാവുന്നതും. അതുകൊണ്ട് തന്നെ വിവാഹ ഡോക്യുമെന്‍ററിയില്‍ ഈ സിനിമയെ കുറിച്ച് പരാമര്‍ശിക്കുന്നുണ്ട്.
സിനിമയിലെ ഗാനം ഡോക്യുമെന്‍ററിയില്‍ ഉള്‍പ്പെടുത്താന്‍ നിര്‍മ്മാണ കമ്പനിയോട് അനുവാദം ചോദിച്ചെങ്കിലും ലഭിച്ചില്ലിരുന്നില്ല. രണ്ട് വര്‍ഷം വരെ കാത്തിരുന്നെന്നും കൂടാതെ ഈ ആവശ്യം പരിഗണിക്കുന്നത് വൈകിക്കുകയും ചെയ്‌തുവെന്നാണ് നയന്‍താര പറയുന്നത്.
'നാനും റൗഡി താന്‍' സിനിമയുടെ ദൃശ്യങ്ങള്‍ ഉപയോഗിക്കാന്‍ നോ ഒബ്‌ജക്ഷന്‍ സര്‍ട്ടിഫിക്കേറ്റ് നല്‍കാതിരുന്നതിനെ തുടര്‍ന്ന് ധനുഷിനെതിരെ രൂക്ഷ വിമര്‍ശനം ഉന്നയിച്ച് നയന്‍താര രംഗത്തെത്തുകയായിരുന്നു. ധനുഷിനെതിരെ നയന്‍താര പങ്കുവച്ച തുറന്ന കത്ത് വലിയ വിവാദമാവുകയും ചെയ്‌തു.
Also Read: ധനുഷും ഐശ്വര്യയും വേര്‍പിരിയാന്‍ തന്നെ തീരുമാനിച്ചു; അന്തിമ വിധി 27ന്
