മോഹന്‍ലാലിനെ കേന്ദ്രകഥാപാത്രമാക്കി തരുണ്‍ മൂര്‍ത്തി സംവിധാനം ചെയ്യുന്ന പുതിയ ചിത്രം 'എല്‍360'യുടെ ചിത്രീകരണം പൂര്‍ത്തിയായി. പല ഷെഡ്യൂളുകളിലായി 99 ദിവസത്തെ ചിത്രീകരണമായിരുന്നു സിനിമയ്‌ക്ക്. മോഹന്‍ലാലിന്‍റെ കരിയറിലെ 360-ാമത് ചിത്രമായതിനാല്‍ സിനിമയ്‌ക്ക് താല്‍ക്കാലികമായി 'എല്‍ 360' എന്നാണ് പേരിട്ടിരിക്കുന്നത്.
ചിത്രീകരണം പൂര്‍ത്തിയാക്കിയ വിവരം സംവിധായകന്‍ തരുണ്‍ മൂര്‍ത്തിയാണ് സോഷ്യല്‍ മീഡിയയിലൂടെ പങ്കുവച്ചിരിക്കുന്നത്. "99 ദിവസങ്ങളിലെ ഫാന്‍ ബോയ് നിമിഷങ്ങള്‍. പുതിയ അപ്‌ഡേറ്റ് നവംബര്‍ 8ന്" -എന്ന അടിക്കുറിപ്പോടു കൂടിയാണ് തരുണ്‍ മൂര്‍ത്തി ഇക്കാര്യം ഫേസ്‌ബുക്കിലൂടെ അറിയിച്ചിരിക്കുന്നത്. L360 യുടെ ലൊക്കേഷനില്‍ നിന്നുള്ള പാക്കപ്പ് ചിത്രങ്ങളും സംവിധായകന്‍ പങ്കുവച്ചിട്ടുണ്ട്.
നവംബര്‍ 8ന് സിനിമയുടെ പേര് പ്രഖ്യാപിച്ച് കൊണ്ടുള്ള ഫസ്‌റ്റ് ലുക്ക് പോസ്‌റ്റര്‍ റിലീസ് ചെയ്യുമെന്നാണ് സൂചന. കേരളപ്പിറവി ദിനമായ നവംബര്‍ 1ന് സിനിമയുടെ ടൈറ്റില്‍ പുറത്തിറക്കാന്‍ തീരുമാനിച്ചിരുന്നെങ്കിലും എഡിറ്റര്‍ നിഷാദിന്‍റെ മരണത്തോടെ ടൈറ്റില്‍ അനൗണ്‍സ്‌മെന്‍റ് മാറ്റിവയ്‌ക്കുകയായിരുന്നു.
ഒരു ഫാമിലി ആക്ഷന്‍ ഡ്രാമ ജോണറിലായാണ് സംവിധായകന്‍ ചിത്രം ഒരുക്കിയിരിക്കുന്നത്. സാധാരണക്കാരുടെ ജീവിത സമൂഹവുമായി ബന്ധപ്പെട്ടാണ് സിനിമയുടെ കഥ പുരോഗമിക്കുന്നത്. വന്‍ മുതല്‍ മുടക്കില്‍ വിശാലമായ ക്യാന്‍വാസില്‍ വലിയ താരനിരയുടെ അകമ്പടിയോടെയാണ് ചിത്രം തിയേറ്ററുകളിലെത്തുക.
സമീപകാല മോഹന്‍ലാല്‍ സിനിമകളില്‍ ഏറ്റവും മികച്ച ആക്ഷന്‍ ത്രില്ലര്‍ ആയിരിക്കും L360 എന്നാണ് അണിയറ പ്രവര്‍ത്തകരുടെ അവകാശവാദം. ശോഭനയാണ് ചിത്രത്തില്‍ നായകിയായി എത്തുന്നത്. ശോഭന ഒരിടവേളയ്‌ക്ക് ശേഷം നായികയായി തിരികെയെത്തുന്നു എന്നതും സിനിമയുടെ പ്രത്യേകതകയാണ്. സാധാരണക്കാരനായ ഒരു ടാക്‌സി ഡ്രൈവറുടെ വേഷമാണ് ചിത്രത്തില്‍ മോഹന്‍ലാലിന്.
ഫര്‍ഹാന്‍ ഫാസില്‍, കൃഷ്‌ണ പ്രഭ, മണിയന്‍പിള്ള രാജു, ആര്‍ഷ ബൈജു, തോമസ് മാത്യു, ബിനു പപ്പു, ഇര്‍ഷാദ്, നന്ദു, പ്രകാശ് വര്‍മ്മ, അരവിന്ദ് എന്നിവരും സുപ്രധാന വേഷത്തില്‍ എത്തുന്നുണ്ട്. ഇവര്‍ക്കൊപ്പം നിരവധി പുതുമുഖങ്ങളും ഈ ചിത്രത്തില്‍ അണിനിരക്കുന്നുണ്ട്.
രജപുത്ര വിഷ്വല്‍ മീഡിയയുടെ ബാനറില്‍ എം രഞ്ജിത്താണ് സിനിമയുടെ നിര്‍മ്മാണം. കെആര്‍ സുനിലിന്‍റെ കഥക്ക് തരുണ്‍ മൂര്‍ത്തിയും, കെആര്‍ സുനിലും ചേര്‍ന്നാണ് തിരക്കഥ ഒരുക്കിയിരിക്കുന്നത്. ഷാജികുമാര്‍ ഛായാഗ്രഹണവും നിഷാദ് യൂസഫ് ചിത്രസംയോജനവും നിര്‍വ്വഹിക്കും.
കലാ സംവിധാനം - ഗോകുല്‍ ദാസ്, മേക്കപ്പ് - പട്ടണം റഷീദ്, കോസ്റ്റ്യും ഡിസൈന്‍ - സമീറ സനീഷ്, പ്രൊഡക്ഷന്‍ മാനേജര്‍ - ശിവന്‍ പൂജപ്പുര, പ്രൊഡക്ഷന്‍ എക്‌സിക്ക്യൂട്ടീവ് - രാജേഷ് മേനോന്‍, പ്രൊഡക്ഷന്‍ കണ്‍ട്രോളര്‍ - ഡിക്‌സന്‍ പൊടുത്താസ്, പിആര്‍ഒ - വാഴൂര്‍ ജോസ് എന്നിവരാണ് ചിത്രത്തിലെ മറ്റ് അണിയറപ്രവര്‍ത്തകര്‍.
Also Read: ടാക്‌സി ഡ്രൈവറായി മോഹന്‍ലാല്‍, നായികയായി ശോഭന; L360 അവസാന ഘട്ടത്തില്‍
