200 കോടി ക്ലബിൽ 'മഞ്ഞുമ്മൽ ബോയ്‌സ്'; മലയാളത്തിൽ ഇതാദ്യം, ചരിത്രനേട്ടം

'2018'നെ വെട്ടി, മലയാളത്തിലെ ഏറ്റവും ഉയർന്ന തിയേറ്റർ കളക്ഷൻ നേടിയ ചിത്രമെന്ന റെക്കോർഡ് ഇനി 'മഞ്ഞുമ്മൽ ബോയ്‌സി'ന് സ്വന്തം

മലയാള സിനിമയിൽ ചരിത്രനേട്ടം കുറിച്ച് ചിദംബരം സംവിധാനം ചെയ്‌ത ചിത്രം 'മഞ്ഞുമ്മൽ ബോയ്‌സ്'. മലയാളത്തിലെ ഏറ്റവും ഉയർന്ന തിയേറ്റർ കളക്ഷൻ നേടിയ ചിത്രമെന്ന റെക്കോർഡാണ് 'മഞ്ഞുമ്മൽ ബോയ്‌സ്' സ്വന്തമാക്കിയത്. 200 കോടിയിലേറെ കലക്ഷനാണ് ഈ ചിത്രം തിയേറ്ററുകളിൽ നിന്നും വാരിക്കൂട്ടിയത്. 2024 ഫെബ്രുവരി 22ന് റിലീസ് ചെയ്‌ത സിനിമ തിയേറ്ററിലെത്തി 27-ാം ദിവസമാണ് 200 കോടി പിന്നിട്ടത്.

ജൂഡ് ആന്‍റണി ജോസഫിന്‍റെ '2018' എന്ന ചിത്രത്തിനായിരുന്നു നിലവിൽ മലയാളത്തിലെ ഏറ്റവും ഉയർന്ന കളക്ഷൻ റെക്കോർഡ്. ഇതാണ് ഇപ്പോൾ 'മഞ്ഞുമ്മൽ ബോയ്‌സ്' തിരുത്തി എഴുതിയത്. കേരളത്തിന് പുറത്തും 'മഞ്ഞുമ്മൽ ബോയ്‌സ്' സിനിമയ്‌ക്ക് ​ഗംഭീര സ്വീകരണം ലഭിച്ചു. ആ​ഗോള ​ഗ്രോസ് കളക്ഷനിലാണ് ഇപ്പോൾ ഈ ചിത്രം സർവകാല റെക്കോർഡിട്ടത്.

ഒപ്പം തമിഴ്‌നാട്, കർണാടക എന്നിവിടങ്ങളിൽ ഏറ്റവും ഉയർന്ന ​ഗ്രോസ് നേടിയ മലയാള ചിത്രമാകാനും 'മഞ്ഞുമ്മൽ ബോയ്‌സി'നായി. തമിഴ്‌നാട്ടിൽ നിന്ന് മാത്രം 50 കോടിയിലേറെ നേട്ടമാണ് ഈ ചിത്രമുണ്ടാക്കിയത്. മലയാളത്തിലെ ആദ്യ 100 കോടി ക്ലബ് ചിത്രമായ 'പുലിമുരുക'ന്‍റെ ​ഗ്ലോബൽ കളക്ഷനെ 'മഞ്ഞുമ്മൽ ബോയ്‌സ്' നേരത്തെ പിന്നിലാക്കിയിരുന്നു. 139.5 കോടിയായിരുന്നു 'പുലിമുരുകൻ' സിനിമയുടെ ​ഗ്ലോബൽ കളക്ഷൻ. 140 കോടി നേടിയാണ് 'മഞ്ഞുമ്മൽ ബോയ്‌സ്' ഈ റെക്കോർഡ് മറികടന്നത്.

കൂടാതെ അമേരിക്കയിൽ ഒരു മില്യൻ ഡോളർ കലക്ഷൻ (ഏകദേശം 8 കോടി രൂപ) സ്വന്തമാക്കുന്ന ആദ്യ മലയാള സിനിമയെന്ന റെക്കോർഡും ഇനി 'മഞ്ഞുമ്മലി'ന് സ്വന്തമാണ്. അതേസമയം കേരളത്തിലും തമിഴ്‌നാട്ടിലുമായാണ് ഈ സിനിമ ചിത്രീകരിച്ചത്. യഥാർഥ സംഭവത്തെ ആധാരമാക്കിയാണ് സംവിധായകൻ ചിദംബരം 'മഞ്ഞുമ്മൽ ബോയ്‌സ്' ഒരുക്കിയത്.

കൊച്ചിയിലെ മഞ്ഞുമ്മലിൽ നിന്ന് കൊടൈക്കനാലിലെ ​ഗുണ കേവിലേക്ക് ടൂർ പോകുന്ന ഒരുകൂട്ടം സുഹൃത്തുക്കളുടെ കഥയാണ് ഈ ചിത്രം പറയുന്നത്. സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, ചന്തു സലീംകുമാർ, അഭിറാം രാധാകൃഷ്‌ണൻ, ദീപക് പറമ്പോൽ, ഖാലിദ് റഹ്‌മാൻ, അരുൺ കുര്യൻ, വിഷ്‌ണു രഘു തുടങ്ങിയവരാണ് ഈ സർവൈവൽ ത്രില്ലറിൽ കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്.

പറവ ഫിലിംസിന്‍റെ ബാനറിൽ സൗബിൻ ഷാഹിർ, ബാബു ഷാഹിർ, ഷോൺ എന്നിവർക്കൊപ്പം ​ഗോകുലം മൂവീസും ചേർന്നാണ് ഈ സിനിമയുടെ നിർമാണം. അജയൻ ചാലിശേരിയുടെ പ്രൊഡക്ഷൻ ഡിസൈനും ഷൈജു ഖാലിദിന്‍റെ ഛായാഗ്രാഹണവും സുഷിൻ ശ്യാമിന്‍റെ മ്യൂസിക്കുമെല്ലാം കയ്യടിനേടിയിരുന്നു. വിവേക് ഹർഷനാണ് ഈ ചിത്രത്തിന്‍റെ എഡിറ്റിങ് നിർവഹിച്ചത്.