സംവിധായകൻ ലോകേഷ് കനകരാജിന്‍റെ പ്രൊഡക്ഷൻ ഹൗസായ 'ജി സ്‌ക്വാഡ്' ആദ്യമായി അവതരിപ്പിച്ച ചിത്രമാണ് 'ഫൈറ്റ് ക്ലബ്'. ഡിസംബർ 15 ന് ആണ് ഈ ചിത്രം തിയേറ്ററുകളിൽ പ്രദർശനത്തിനെത്തിയത്. ഇപ്പോഴിതാ 'ഫൈറ്റ് ക്ലബ്' ഒടിടിയിൽ പ്രദർശനം ആരംഭിച്ചിരിക്കുകയാണ് (Fight Club OTT Release).
പ്രമുഖ ഒടിടി പ്ലാറ്റ്‍ഫോം ആയ ഡിസ്‌നി പ്ലസ് ഹോട്ട്സ്റ്റാറിലൂടെയാണ് 'ഫൈറ്റ് ക്ലബ്' സ്‌ട്രീമിംഗ് ആരംഭിച്ചത്. തമിഴ് ഒറിജിനലിന് പുറമെ തെലുഗു, ഹിന്ദി, മലയാളം, കന്നഡ ഭാഷകളിലും ഹോട്ട്സ്റ്റാറില്‍ ചിത്രം കാണാം (Fight Club streaming on Disney plus Hotstar). അബ്ബാസ് എ റഹ്‍മത്ത് സംവിധാനം ചെയ്‌ത ഈ ചിത്രത്തില്‍ വിജയ് കുമാര്‍ ആയിരുന്നു നായകന്‍. ഉറിയടി എന്ന ചിത്രത്തിലൂടെ ശ്രദ്ധേയനായ വിജയ് കുമാര്‍ തകർപ്പൻ പ്രകടനമാണ് 'ഫൈറ്റ് ക്ലബി'ൽ കാഴ്‌ചവച്ചത്.
മലയാളിയായ മോനിഷ നായികയായ ചിത്രത്തിൽ കാർത്തികേയൻ സന്താനം, ശങ്കർ ദാസ് തുടങ്ങിയവരും സുപ്രധാന വേഷങ്ങളിൽ അണിനിരന്നു. ലോകേഷ് കനകരാജ് അവതരിപ്പിക്കുന്ന ചിത്രമെന്ന നിലയില്‍ റിലീസിന് മുന്‍പ് തന്നെ വാർത്തകളിൽ നിറഞ്ഞ സിനിമയായിരുന്നു 'ഫൈറ്റ് ക്ലബ്'. ശശിയുടെ കഥയ്‌ക്ക് സംവിധായകൻ അബ്ബാസ് എ റഹ്‍മത്ത് തന്നെയാണ് തിരക്കഥ ഒരുക്കിയതും.
സംഭാഷണങ്ങൾ രചിച്ചത് ശശി, വിജയ്‌കുമാർ, അബ്ബാസ് എ റഹ്‍മത്ത് എന്നിവർ ചേർന്നാണ്. ആദിത്യ ആണ് നിർമാണം. ഗോവിന്ദ് വസന്തയാണ് ചിത്രത്തിന് സംഗീതം പകർന്നത്. ഛായാഗ്രഹണം ലിയോൺ ബ്രിട്ടോയും ചിത്രസംയോജനം പി കൃപകരനുമാണ് നിർവഹിച്ചത്.
വിക്കി, അമ്രിൻ അബൂബക്കർ എന്നിവരാണ് ആക്ഷനും ഏറെ പ്രധാന്യമുള്ള ഈ ചിത്രത്തിനായി സംഘട്ടനം ഒരുക്കിയത്. ആർ ബാലകുമാർ ആണ് ചിത്രത്തിന്‍റെ എക്‌സിക്യൂട്ടീവ് പ്രൊഡ്യൂസർ. സൗണ്ട് ഡിസൈനിംഗ്/എഡിറ്റിംഗ് : രംഗനാഥ് രവി, സൗണ്ട് മിക്‌സിംഗ് : കണ്ണൻ ഗണപത്, കൊറിയോഗ്രാഫി : സാൻഡി, ക്രിയേറ്റിവ് പ്രൊഡ്യൂസർ : വിജയ് കുമാർ, വസ്‌ത്രാലങ്കാരം : ദിനേശ് മനോഹരൻ, മേക്കപ്പ് : രഗു റാം, വേൽമുരുകൻ, പബ്ലിസിറ്റി ഡിസൈനർ : കബിലൻ, പ്രൊമോഷൻ ഹെഡ് : ദിനേശ് എസ്, പ്രൊഡക്ഷൻ കൺട്രോളർ : സി ഹരി വെങ്കട്ട്, കളറിസ്റ്റ് : അരുൺ സംഗമേശ്വർ എന്നിവരാണ് ചിത്രത്തിന്‍റെ മറ്റ് അണിയറ പ്രവർത്തകർ.
റീല്‍ ഗുഡ് ഫിലിംസ് പുറത്തുവിട്ട കണക്ക് പ്രകാരം ആദ്യ വാരാന്ത്യത്തില്‍ 5.75 കോടി രൂപയാണ് 'ഫൈറ്റ് ക്ലബ്' നേടിയത്. കേരളത്തിൽ ഡ്രീം ബിഗ് ഫിലിംസ് ആണ് ചിത്രം പ്രദർശനത്തിന് എത്തിച്ചത്. മറ്റ് തെന്നിന്ത്യൻ ഭാഷകളിൽ 'ഫൈറ്റ് ക്ലബ്' വിതരണം ചെയ്‌തത് ശക്തി ഫിലിം ഫാക്‌ടറിയാണ്.
